النيو سيراتو ومرض الوسواس القهرى

[Conspirator]

السلام عليكم ورحمة الله وبركاته

من حوالى شهرين كنت عايز أشترى عربية جديده وكنت بدور على النت على أراء الناس فى النيو سيراتو ودخلت على المنتدى هنا وعجبنى جدا واشتركت فيه وبدات اتابع المواضيع بس للاسف فى ناس خلتنى اغير رأيى وأفكر فى حاجه غير السيراتو من الكلام اللى كان بيتقال انها بتضرب شقلبظات لوحدها وبتحدف وعمود البيالوك بيلوك وعمود الزربيئ بيزيئ والعافشه قفشه والحياه ناشفه وكل الكلام ده لدرجة خلت الناس اللى معاهم العربيه يجيلهم مرض الوسواس القهرى ويركزوا مع العربيه فى دبة النمله عشان يشوفوا اتضحك عليهم فى العربية ولا لأ واللى يقولك كورى مين يا عم انا اركب هوندا فاضيه من غير كماليات احسن وفتيس الكورى مش عارف ايه وكل الكلام ده
المهم بدأت فى رحلة البحث عن البدائل وحساب قيمة السعر امام الكماليات وقطع الغيار وسعر اعادة البيع المهم فى الاخر السيراتو بردو كسبت
المهم عشان مطولش عليكم عملت استخاره وجبت السيراتو

ودلوقتى بس أقدر اقول لكل اللى كانوا بيهاجموا العربية ويقولك دى مع ابن عمى وسقتها ودى مع بنت خالتى ولمحتها وهى ماشيه وكان ادائها وحش من غير ما يزعلوا منى انهم حاجه من اتنين يا مش راكيبة عربيات ومبيفهموش فيها يا بيتكلم سماعى يا اما هو مبيعرفش ازاى يستخدم العربيه اللى تحت رجله ويطلع كل امكانيتها

بجد بجد بجد كيا تفوقت على نفسها فى العربيه دى بالنسبة لامكانيات العربيه وسعرها
وعشان الناس اللى هتقولك ده بس فرحان بالعربيه عشان لسه جديده احب اقولهم ان دى رابع عربيه لي وانا ركبت الاوكتافيا a5 والهوندا والمازدا 3 والجين 2 والبرسونا والتريوس
فى شباب بياخد العربيه من صاحبه ويقولك هجربها ويركبها وفاكر نافسه ركب ماكلارين F1 وهوبا يطلع ويضرب غرز وملفات وشقلبظات ويضربله 12 مطب على حفره فى السكه وينزل يقولك العربيه تعبانه قوى هو مش فاهم ان دى عربيه سيدان عائليه بتحققلك كل المطلوب من ده مش اكتر

حاجه مهمه عشان الناس اللى بتشتكى من العفشه اظبط الكاوتش عند حد عنده عداد ديجيتال زى امارات مصر مثلا انا مثلا اول لما استلمت العربيه لقيت الكاوتش على 50 وطبعا ده كان محسسنى ان مفيهاش عفشه بس اول لما ظبطه الحياه بقت فله هما بينفخوه زياده عشان الشحن والتخزين وركنه العربيه والكلام ده

فى ناس تركب العربيه تجربها وتقولك عفشتها وحشه وهو اول مره فى حياته يركب عربيه جنط 17 انا اصحابى مركبين 17 فى مازدا 3 بيصوتوا من العفشه يا جماعه الجنط ال 17 لو بروفايل من الاخر وبصراحه مينفعش فى شوارع مصر عشان كده انا جبت العربيه هاى لاين بس جنط 16 وده احسن كتير

مبررروك لكل السيراتاويه عليهم العربيه وكل اللى بيفكر بقول له توكل على الله وهاتها ومش هتندم ان شاء الله

[darehawk]

عربية محترمة جدن وكلنا شايفين ادائها وتواجدها في الشوارع

[mameen]

شكرا يا باشا على تقييمك وعندك حق في كل كلمة قلتها
واضف الى ذلك حرب التجار اللي احتمال كبير يكونوا هما اللي بيحركو الحمله دي
ولو جمعتلك المتناقضات الموجودة لو دخلت على كل الاقسام حتلاقي الناس بتشتم في كل الماركات
لان المقاييس مختلفة والمزاجات مختلفة والا كنا كلنا ركبنا عربية واحدة

[medoxmedox]

يا جماعه
انا بجد مش لاقي واحد معاه السيراتو و بيشتم فيها
كل اللي بيشتم و يهاجم معندوش ,, و عمرو ممكن مركبهاش
بس بجد ,,, محدش يجيلو هسس في دماغو زي اللي جالي
كلنا ركبنا عربيتنا و عرفينها كويس
و الحمد لله اللي معاه سيراتو راضي عنها

[Atrees]

هههههههههههههههه كل ما يشتموا فيها الاقيها بتزيد في الشوارع

انا كنت اول واحد جابها في المنطقة عندي - دلوقتي فية 5 عربيات - ههههههههههههههههههه

[TAMER2020]

معلش يا باشا ممكن صور للعربيه

[ghost1900]

هههههههههههههههه كل ما يشتموا فيها الاقيها بتزيد في الشوارع

انا كنت اول واحد جابها في المنطقة عندي - دلوقتي فية 5 عربيات - ههههههههههههههههههه

أنت بتقول فيها أنا الشارع اللى فيه بيتى كان فيه عربيتين من 3 شهور (عربيته وعربيه جارى والاتنين فضى)، دلوقتى المعرض فتح ونزل منها كل الالوان ههههه - آخر مره عديتهم كانوا 7 عربيات.

[Conspirator]

معلش يا باشا ممكن صور للعربيه

لسه عايز اديها غسله محترمة فى كار كير وأصورها
هى عموما نبيتى

[TeMoON]

فى ناس تركب العربيه تجربها وتقولك عفشتها وحشه وهو اول مره فى حياته يركب عربيه جنط 17 انا اصحابى مركبين 17 فى مازدا 3 بيصوتوا من العفشه يا جماعه الجنط ال 17 لو بروفايل من الاخر وبصراحه مينفعش فى شوارع مصر عشان كده انا جبت العربيه هاى لاين بس جنط 16 وده احسن كتير

ممكن ياباشا تقولى انت جبتها بكام وفارقة اية عن sx غير الجنط 17

[Conspirator]

ممكن ياباشا تقولى انت جبتها بكام وفارقة اية عن sx غير الجنط 17

هى يا باشا فيها كل حاجه ماعدا مفتاح البصمة والجنط 17 ومرايات التعتيم
فتحة سقف تكييف تاتش بارك سنسور فرش جلد نواكل ب 115

[Amr A.salam]

الف مبروك يا باشا .....وكلامك صح فعلاً

[NoRmAl]

فى شباب بياخد العربيه من صاحبه ويقولك هجربها ويركبها وفاكر نافسه ركب ماكلارين F1 وهوبا يطلع ويضرب غرز وملفات وشقلبظات ويضربله 12 مطب على حفره فى السكه وينزل يقولك العربيه تعبانه قوى هو مش فاهم ان دى عربيه سيدان عائليه بتحققلك كل المطلوب من ده مش اكتر

أنا شايف أن دا مربط الفرس
يعنى كمثال
واحد أعرفه واحد صاحبه معاه العربيه
فبيقلى دا بيقلى أنا بعد ال180 مش ثابته أوى
طيب
أولا أنا مجبتش بيها 180 أساسا مقدرش أرد
لكن محدش فاهم أن دى سيتى كار ولا أنا الى جايب سيتى كار وماشى بيها فى حلبه سباق
يعنى أنا الى بستهبل ولا الناس!!!!
الغريب أن ممكن ناس وهنا فى المنتدى كمان تقدر تقنع واحد محتار أنه ميشتريش عربيه معينه لأنها مش ثابته فوق 180
وبالتالى ممكن شومخر يطلع منك فى آخر لاب وتطلع التانى
لنا الله

[د.محمود صلاح]

الإنتشار الزيادة = ثقة المستهلك المصري فيها = وجود نسبة منها حظها وحش وفيها اعطال ولما بتتنشر على النت يبدأ التعميم والبلبلة

[Beeso]

كلام جميل كل ملاك العربية عارفينه وفعلا أكبر دليل هو انتشار العربية الرهييب والتقيم اللي واخدة العربية ده في كل العالم هي مش ناقصهـا غير موتور 2000cc و ESP :) بجد

[system300]

هموووووووووت من كتر التفكير ...... سااااااااااااااعدني

يا جماعة بجد انا تعبت وعاوز اعرف اعمل ايه انا بقالي شهرين بدور على عربية من الاخر فيها كل حاجة وحلوة ومش هقدر اغيرها تاني على الاقل بعد 6 او 7 سنين ومن الاخر انا مش هقدر ادفع اكتر من 100000ومش عارف اعمل ايه اهم حاجة عندي الاوبشنز بتاعتها وتكون ثابتة وخصوصا انا ساكن في 6اكتوبر وشغلي في مدينة نصر . ياعني مشواري سفر كل يوم . وكل الناس بتقولي هات سيراتو المهم انا خلاص اقتنعت بيها بس مش عارف بقى ايه الاحسن الخليجي ولا الوكيل . وبعدين انا سالت لقيت انا السعر اللي انا محدده موجود في الكويتي فل اوبشن اوتوماتيك ب 101000 السوؤال بقى :
1- هل العربية ده فيها كل اللي عاوزه ؟ يعني ثبات وكدا ..... وهي ثابتة لحد كام عشان انا بحب الجري
2- هل الكويتي حلوة ولا ايه ظروفها ولا السعودي احلى ؟ ..(عشان في واحد قالي ابعد عن الكويتي وهات سعودي ..... وفي واحد قالي ابعد عن الخليجي كله ومش معقولة انك هتدفع 100 الف في عربية وهتاخدها من غير ضمان وطبعا انتو عارفين فرق السعر ما بين ده وده ) .
2- هل الالنترا الخليجي احسن منها .

انا اسف على الاطالة بس بجد انا عاوز حد يقولي اعمل ايه عشان انا نازل اجيب النهاردة وبجد مستعجل .