ياجماعه الحل ايه - ابيعها !!

[ethan82]

انا مبتكلمش عن مشاكل عربيتي في المنتدي كتير وبحتفظ بأرائي لنفسي ولبعض الناس .

المهم انا من يوم مجبت العربية وبيحصل معايا حاجه عايز اقولكو عليها وياريت لو حد بجد يقولي اعمل ايه ..

العربية بتبطل وانا ماشي وده حصل معايا لحد دلوقتي حوالي 5 مرات من 2008 وعملت حادثة تاني مرة واتبهدلت وانا عامل كل الصيانات لحد ال 30 الف وبيقولولي العربية مفيهاش حاجه.

بس الموضوع لسه حاصل تاني معايا من يومين وبجد زهقت . ياجماعه انا بكون ماشي مش اقل من 80 لما بيحصل كدا . ولاحظت ان الموضوع ده بيحصل لما بشغل التكييف.
المهم انا زهقت بجد ومستغرب اذاي العربية تفصل مرة واحده والاقي الدريكسون بقي حجر وطبعا دي حاجه بتلبخ وممكن تؤدي لأذي ...

حاجه كمان ياجماعه .. وده اهمال مني انا .. كتاب الضمان انا مش فاكر ضايعتو والا ماخدتوش اصلا لاكن انا عربيتي وكيل و مش خليجي وكل الصيانات دي كنت بعملها كده . عايز اعرف ايه الفرق لو كان معايا كتاب الضمان وكمان عايز اعرف اذاي اجيبه وهل ممكن اعدل الريكورد في التوكيل..

اسف علي الإطاله وأخيرا محدش عايز يشتري سيراتو سودا 2008

[Samir_Adel]

انا مبتكلمش عن مشاكل عربيتي في المنتدي كتير وبحتفظ بأرائي لنفسي ولبعض الناس .

المهم انا من يوم مجبت العربية وبيحصل معايا حاجه عايز اقولكو عليها وياريت لو حد بجد يقولي اعمل ايه ..

العربية بتبطل وانا ماشي وده حصل معايا لحد دلوقتي حوالي 5 مرات من 2008 وعملت حادثة تاني مرة واتبهدلت وانا عامل كل الصيانات لحد ال 30 الف وبيقولولي العربية مفيهاش حاجه.

بس الموضوع لسه حاصل تاني معايا من يومين وبجد زهقت . ياجماعه انا بكون ماشي مش اقل من 80 لما بيحصل كدا . ولاحظت ان الموضوع ده بيحصل لما بشغل التكييف.
المهم انا زهقت بجد ومستغرب اذاي العربية تفصل مرة واحده والاقي الدريكسون بقي حجر وطبعا دي حاجه بتلبخ وممكن تؤدي لأذي ...

حاجه كمان ياجماعه .. وده اهمال مني انا .. كتاب الضمان انا مش فاكر ضايعتو والا ماخدتوش اصلا لاكن انا عربيتي وكيل و مش خليجي وكل الصيانات دي كنت بعملها كده . عايز اعرف ايه الفرق لو كان معايا كتاب الضمان وكمان عايز اعرف اذاي اجيبه وهل ممكن اعدل الريكورد في التوكيل..

اسف علي الإطاله وأخيرا محدش عايز يشتري سيراتو سودا 2008

معلش هو سؤال غريب شوية, المشاكل دي كلها حصلت بعد الحادثة الأولي؟ ولا و هي العربية فابريكة؟!
بالنسبة لموضوع كتيب الضمان, انا شايف انة ملوش لازمة اوي يعني عشان بكل بساطة العربية وكيل و مثبوتة عندهم رقميا و جميع الصيانات مثبوتة و بالمواعيد كمان! يعني هي هي!

[ethan82]

لا ياباشا الموضوع ده من قبل الحادثه .. وهوا اصلا سبب الحادثة

[mameen]

هو ممكن يطالب بكتيب الضمان لو احتاج اي تغيير

[Samir_Adel]

لا ياباشا الموضوع ده من قبل الحادثه .. وهوا اصلا سبب الحادثة

أنا اسف, مش هقدر افيدك! بس كل اللي اقدر اقلهولك ان انت لازم تروح لحد متخصص في كيا و يشيك علي العربية حتة حتة و ابعد عن التوكيل, التوكيل بيشيل و يحط بس! للأسف معندوش عمالة مهرة. و ألف حمد الله على سلامتك.

[Cutevampire]

كتيب الضمان مفيد ليك لسبيين :
- اي مشكلة مع التوكيل لان الاثبات الوحيد عندهم
- لو حبيت تبيع العربية بيفرق مع اللي بيشتري اذا كان معملوها صيانة في التوكيلو لا لأ

[NaderNabil]

مش هاقدر أفتيك في موضوع الفصل المفاجئ

لكن بالنسبة لدفتر الضمان و تسجيل الصيانات عليه...الهدف الوحيد من ورائها هو الريكورد الشخصي ليك...و علشان تتذكر المواعيد و الكيلومتر فقط لا غير...و لكن أمامك إختيارين

أولا: التوكيل عنده داتا بيز كامله بكل اللي إتعمل في العربية من أول يوم شامل الصيانات و الحوادث و التكاليف و التواريخ و الكيلومتر و كل حاجة...يعني لو حبيت تبيع العربية هتاخد الشاري و توديه التوكيل و هما مش هايخبوا عليه حاجة

ثانياً: انت ممكن تاخد دفتر الضمان الفاضي و الفواتير اللي معاك كلها و تخليهم يختموا كل الصيانات في الدفتر...و معندهمش أي مشاكل في كده...
واحد صاحبي عمل كده لما دفتره ضاع و كتبوا كل حاجة في واحد جديد و إدهولوا

[د.محمود صلاح]

هل هي مانيوال ؟ وهل بتبطل على السلانسيه ؟ ( لما ترفع رجلك من دواسة البنزين وتمور ؟)

[ahmed_su]

طيب ما نحاول نحلل الموضوع يمكن نوصل لنتيجة او طريقة للحل

انت بتقول ان الفصل ده بيحصل عادة بعد تشغيل التكيف

يعنى اثناء تطبيق حمل اضافى اللى هو التكيف (بس علشان نستمر فى التحليل فى الاتجاه ده لازم تأكد انهم فى الخمس مرات كنت مشغل التكيف)

الموتور بيقف فى احد الحالات يا اما قطع وقود اوكهرباء وده الاحتمال الاوقع بعد تشغيل التكيف ...( بس لما الموتور يبطل

وترجع تدوره بيدور على طول ولا لاء ) عاوز الاجابة على التساؤلات دى علشان نعرف نكمل

وبعدين فيه حاجة مهمة ماتروح لخالد فاروق ديركت لانى اعتقد انك

لو وضعت العربية على السكانر ممكن تقولنا تاريخ المشاكل السابقة

مستنى ردك

[amrelsaqqa]

فيه كذا سبب يا باشا
ممكن فلتر البنزين او الهوا او الرشاشات او البوجيهات وساعات البوبينة

بس ممكن نستبعد البوبينة شوية

طيب بتفصل والعربية ماشية بس ولا ممكن تفصل على السلانسيه ؟
والفصل مرتبط بسرعة معينة ولا rpm معين ولا مش مرتبط بأي حاجة ؟
وهل فعلا مرتبط على طول بالتكييف ولا كانت صدفة مرة واحدة ؟

[Eslam_moustafa]

المشكلة دي حصلت معايا في الاكسنت و هي بسيطة ان شاء الله يعني مش من الموتور ولا التكيف الفكرة ان في حاجة مش فاكر الحقيقة اسمها وظيفتها بالبلدي كده انها بتزبط الار بي ام بتاع الموتور مع التكييف فهي لما تفصل ولا تتحرق والتكييف شغال تقريبا الموتور مش بيستحمل التكييف فا بيبطل حتى لو ممور او دايس دبرياج
المهم روح التوكيل او كهربائي كويس هيعملهالك وانت واقف و الموضوع 100 جنيه بالتركيب بس عندي فالاكسنت
يا ريت اكون افدت حضرتك و آسف عالاطالة

[M.ABDEEN]

هي مشكلة غريبة شوية واعتقد بنسبة كبيرة حاجة تخص ربط الحساسات عندك ياما عن طريق وصلة ال ار بي ام وبالتبعية مع الكنترول يونيت بتاع العربية .........
على العموم هدي نفسك وروح ابو رواش وهما هيعملوا اللازم وفي هناك كمان خبير كوري محنك اسمه( مستر تشاه )اكيد ممكن يستعينوا بيه ....وربنا يصلحلك الحال يا رب

[ethan82]

شكرا للأهتمام من كل الأخوة الزملاء .

العربية مانيوال مش اوتوماتك
الفصل مش في كل مرة علي السلانسيه زي مبتقولو . في مرتين كان سرعه لا تقل عن 80 او 90
تقريبا موضوع التكييف كان في كل مرة مش صدفة
الموتور بيرجع يدور عادي جدا بدون اي مشاكل

طيب يا احمد باشا لو السكانر طلع ان في مشكلة ممكن تنصحني يكون موقفي ايه او اتعامل اذاي؟؟ ومبروك علي الذهبية


نادر بيه شكرا علي الإفادة بس معندكش فكره انا ممكن اجيب الدفتر ده منين ؟؟ علي اساس انو ضايع مني اصلا.

سمير باشا شاكرين علي المعلومة وانا فعلا كنت عايز اعمل كده فعلا بس معرفش حد كويس ومضمون يكون بيفهم في السيراتو.. وكمان دي مش صيانة فخايف يتلعب في الميكانيكا بتاعتها..

شكرا ياجماعه علي المساعدة

[NaderNabil]

نادر بيه شكرا علي الإفادة بس معندكش فكره انا ممكن اجيب الدفتر ده منين ؟؟ علي اساس انو ضايع مني اصلا.

تروح أبو رواش و تطلب بدل فاقد...بس كده :)

[ethan82]

تروح أبو رواش و تطلب بدل فاقد...بس كده :)

والله دي حاجه جميلة اوي ... صباحك زي الفل ياباشا.