بفكر أبيع الجانت ال-١٧ !!!!!!!!!!!!

[solid_khaled]

ازيكم يا رجالة الكيا

أنا معاية SX جانت ١٧ طبعاً وكيل عمل بالعربية ٤٢٠٠ كيلو بس بجد تعبت من نشفيت العفشة و أصوات التخبيط و فيه ناس بتقول إن العملية بتنعم بعد ال-٥٠٠٠ بس دة كلام بصراحة حاسس إن مش مظبوط

أنا بفكر انشالله استنى لحد هما أعمل صيانة ال-5000ألف يمكن مثلاً يزبته حاجة كدة ولا العفشة عايزة تربيت و لو حسيت انها مازلت ناشفة أوي بفكر أبيع الجانت ال-١٧ و أجيب طاسات ١٥

هتؤلولي له مش ١٦ أولاً شكلو مش عجبني أوي تاني حاجة ركبت عربية جانت ١٦ و حاسس انها بردو ناشفة بس مفيهاش صوت التخبيط العندي

فألت أجيب ال-١٥ أهو نعومة و شكلو لذيذ و شكل ال-١٧ والعربية مشية يا رت حد معه ال-١٥ يقولي هو فعلاً ناعم ولا عادي و يا سلام لو كان من مصر الجديدة أو مدينة نصر أقبله و اركب معه العربية أشفهة عملة ازاي ...

السؤال
١- لو بعت ال-١٧ يجبلي كام؟ معه ٤ فرد بس سليمة والاستبن فيها بلونة عشان لبست في نقرة أبل كدة على سرعة ٨٠
٢- بكم الكوتش ال-١٥ الفردة ؟
٣-أجيب منن طاسات ال-١٥ ؟
٤-ينفع اركب ١٥ بس يكون نفس عرض ال-١٧ فيكون بردو ستابل ؟ ولا هيئاسر على النعومية ؟
٥-هل الوكيل ممكن يخرجني مل ضمان لو ركبت ١٥ بدل ١٧ أعتقد لأ أكيد بس بخاف من استهبال الووكالة


أنا الحمدلله العربية عجباني معدة النشفية و صوت الموتور بعد ال-١٢٠ بس طبعاً أنا بكون بسماع ال كاسيت فمبحسش بحاجة

[Atrees]

بص بقي - انا ضد تماما اللي انت بتقولة بس انا مش وصي عليك - ههههههههه

عموما الجنط ال 17 في اي عربية لازم يخبط ودة اكيد مش بس في السيراتو

اذا كنت عايز تغير في اصلا جنط 15 في السيراتو مش بس طاسات بس شكلة زي ال 16 عموما

ال 17 سعرة في التوكيل 1500 للفردة من غير كاوتش - والكاوتش يعمل تقريبا 500 جنية جديد

احسبها انت بقي - او لو عايز تلعبها صح - جرب تبدل الجنط مع حد عندو 15 وعايز يغير وظبطوها مع بعض - او شوف معرض عربيات ياخدهم ويديك ال 15 ( بس اكيد دة حيبقي حرام عشان اكيد مش حيقول للي اشتري انهم مستعملين ودة نصب

[ahmadyusuf]

انا عاوز حضرتك تتاكد بس ان الموضوع ده من الجنط لان عربيتى زى عربيه حضرتك بالظبط و الحمد لله , و العفشه نشفه اه بس مش قوى يعنى , يعنى مش حاجه تضايق , انا مثلا ركبت مع واحد صاحبى عربيه رينو ميجان و كانت انشف من عربيتى بكتير , اما موضوع الاصوات و التخطبيط دى فمش موجود خالص و الحمد لله , فياريت حضرتك تراجع على ضغط الكاوتش و العفشه و المساعدين الاول قبل ما تاخد قرار تغيير الجنط و ربنا يوفقك

[mameen]

انا عاوز حضرتك تتاكد بس ان الموضوع ده من الجنط لان عربيتى زى عربيه حضرتك بالظبط و الحمد لله , و العفشه نشفه اه بس مش قوى يعنى , يعنى مش حاجه تضايق , انا مثلا ركبت مع واحد صاحبى عربيه رينو ميجان و كانت انشف من عربيتى بكتير , اما موضوع الاصوات و التخطبيط دى فمش موجود خالص و الحمد لله , فياريت حضرتك تراجع على ضغط الكاوتش و العفشه و المساعدين الاول قبل ما تاخد قرار تغيير الجنط و ربنا يوفقك

باضبط
راجع الاول على موضوع التخبيط لان الجنط بس مسئول عن نشوفية العفشة

[morasystem]

أقسم بالله العظيم إن الجنط ال 15 هو أحلى جنط نزل للعربية دى من حيث الوزن و العفشة و الشكل مقارنة بالحجم و ثباته لا يقل عن ال 17 فى شئ

بس مش معنى كدة إنى موافق حضرتك على إنك تبيع

الحل كالأتى ... أولا لازم حضرتك تحاول تلين العفشة بتاع العربية بالراحة يعنى مثلا عدى مطبات ناعمة على طريق مفتوح زى الواحات أو المحور بالراحة فى الأول هتلاقى العربية ناشفة و ممكن تحك بس بعد فترة هتلاقى العربية بتظز و بتلين معاك... و على فكرة كمان العفشة فعلا بتتغير تماما بعد الصيانة الأولى و الثانية ... فى التوكيل هم بيظبطوا و بيربطوا العفشة ... ثانيا لازم تظبط الكاوتش كل ما درجة حرارة الجو تتغير ... ثالثا ممكن تعمل الكاوتش نيتروجين أهو هيساعد برضه و الفردة ب 5 جنيه على فكرة و ممكن تزودها هوا عادى لو احتاجت من أى محطة بنزين ... رابع حاجة ممكن فى الصيانة اللى جاية تخليهم يبصوا على العفشة برضه يمكن يكونوا معملوهاش المرة اللى قبلها

خامسا الجنط ال 17 شكله جميل جدا و أحلى من ال16 و ده فى حد ذاته يخلى حضرتك متبيعهوش

[Hosam_Optrawy]

لو مصمم يبقى شوف معرض يبعلك جنوط سبور 15 بتاعت السيراتو او تبدلهم معاه

مش تبقى نزلت من جنط 17 لطاسات :)

[M7amD_7amDy]

لو مصمم يبقى شوف معرض يبعلك جنوط سبور 15 بتاعت السيراتو او تبدلهم معاه

مش تبقى نزلت من جنط 17 لطاسات :)

صح كده

ازاى طاسات؟؟

لو قافش على الجنط ال 15 يبقى خليك فى الجنوط السبور مش طاسات

[amr mokhtar]

انا معايا الجنط 15
و كنت أتمنى إنى أفيدك بس انا مجربتس الجنوط 17 فمش هقدر أقول إذا كان فيه فرق فى الثبات و لا لأ

بس شكلآ الجنط 17 شبه الطاسات 15
لكن الجنوط بتدى شكل جميل و قوى للسيراتو

انا رأيى لو تقدر تبيع الجنوط 17 و تجيب جنوط 15 او 16 حسب ما تحب و يكون ماركة مثلآ مومو أصلى
يبقى كده أفضل حاجة من ناحية الشكل و كمان هتحل مشكلة الجنط 17

و الله أعلم

[All_New_Cerato]

ازيكم يا رجالة الكيا

أنا معاية SX جانت ١٧ طبعاً وكيل عمل بالعربية ٤٢٠٠ كيلو بس بجد تعبت من نشفيت العفشة و أصوات التخبيط و فيه ناس بتقول إن العملية بتنعم بعد ال-٥٠٠٠ بس دة كلام بصراحة حاسس إن مش مظبوط

أنا بفكر انشالله استنى لحد هما أعمل صيانة ال-5000ألف يمكن مثلاً يزبته حاجة كدة ولا العفشة عايزة تربيت و لو حسيت انها مازلت ناشفة أوي بفكر أبيع الجانت ال-١٧ و أجيب طاسات ١٥

هتؤلولي له مش ١٦ أولاً شكلو مش عجبني أوي تاني حاجة ركبت عربية جانت ١٦ و حاسس انها بردو ناشفة بس مفيهاش صوت التخبيط العندي

فألت أجيب ال-١٥ أهو نعومة و شكلو لذيذ و شكل ال-١٧ والعربية مشية يا رت حد معه ال-١٥ يقولي هو فعلاً ناعم ولا عادي و يا سلام لو كان من مصر الجديدة أو مدينة نصر أقبله و اركب معه العربية أشفهة عملة ازاي ...

السؤال
١- لو بعت ال-١٧ يجبلي كام؟ معه ٤ فرد بس سليمة والاستبن فيها بلونة عشان لبست في نقرة أبل كدة على سرعة ٨٠
٢- بكم الكوتش ال-١٥ الفردة ؟
٣-أجيب منن طاسات ال-١٥ ؟
٤-ينفع اركب ١٥ بس يكون نفس عرض ال-١٧ فيكون بردو ستابل ؟ ولا هيئاسر على النعومية ؟
٥-هل الوكيل ممكن يخرجني مل ضمان لو ركبت ١٥ بدل ١٧ أعتقد لأ أكيد بس بخاف من استهبال الووكالة


أنا الحمدلله العربية عجباني معدة النشفية و صوت الموتور بعد ال-١٢٠ بس طبعاً أنا بكون بسماع ال كاسيت فمبحسش بحاجة

ايه رايك تدخل ال17 اللي معاك بال15 الي معايا و تاخد الفرق؟؟

مستني ردك

[Samir_Adel]

حضرتك اية رأيك تسيب الجنط في حالة.. و تشتري كاوتش جديد علي 50 او 55! كدة هيكون في مسافة.. و لو في اي حاجة في الأرض مهما كانت نقرة او بلاعة..الخ هياخد و يدي معاها فا هتحس ان الموضوع اريح بمراحل. و خسارة تبيع جنط الفابريكة!

[Atrees]

اهو يا عم زي ما قولتلك - الراجل حبيبنا All new Cerato عرض عليك البدل - زبط معاة بقي وتبقي مننا فينا وكل حاجة تبقي مضمونة

[solid_khaled]

ايه رايك تدخل ال17 اللي معاك بال15 الي معايا و تاخد الفرق؟؟

مستني ردك:y_hi_3[1]:

باشا حضرتك ساكن في مدينة نصر أو مصر الجديدة لو نقدر نتقبل أجرب العربية أشوفها لو نعمة يبقى عل بركة بس طبعاً بعد صيانة5000 العربية عندي عشان أتأكد فعلاً انها عيب الجانت فالنشفية

[solid_khaled]

محدش يعرفه العربية بتبقى نعمة ولا لأ بالطاسات ال-١٥ ؟

[xShadow]

محدش يعرفه العربية بتبقى نعمة ولا لأ بالطاسات ال-١٥ ؟

أكيد عامةً هيبقى في فرق شاسع فلنعومة بسبب الفرق فلمسافة بين الكاوتش والأرض .. الطاسات ال-١٥ كوتشهة كبير فهياخد و يدي جامد فلخبطات من غير متحس بحاجة ، على عكس الكاوتش ال-١٧ low-profile يعني مسافة صغيرة أوي بين الجنط والأرض ، والكاوتش الرفيع دة هو إلي بيحسسك بالتخبيط وكدة

[All_New_Cerato]

باشا حضرتك ساكن في مدينة نصر أو مصر الجديدة لو نقدر نتقبل أجرب العربية أشوفها لو نعمة يبقى عل بركة بس طبعاً بعد صيانة5000 العربية عندي عشان أتأكد فعلاً انها عيب الجانت فالنشفية

اوك يا مان, انا من شبرا بس شغلي في المعادي ورايح جاي من الاوتوستراد او في عباس العقاد راشق هناك في الشقة التانيه, شوف كده وقوللي ونمرتي بعتهالك عالخاص