سؤال ...ضمان الوكيل ليه لازمة فعلا ؟

[karemof]

أنا فاهم ان الضمان اللي بيقدمه الوكيل بيكون ضد عيوب الصناعة ,طيب هو بيكون شامل ايه:
- هل اي مكون يكون فيه مشكلة بيغيره بدون اي تكاليف
- هل في اي علاقة بين الضمان وتكاليف الصيانة الدورية
- هل لو كان العيب سبب في حادثة لا قدر الله التوكيل بيكون عنده شفافية كافية ويتحمل تكاليف التصليح كلها

أنا بسأل ليه ؟ علشان الأفضلية الوحيدة لسيارات الوكيل عن الخليجي هي الضمان , يا ريت نفيد بعض ونعرف الضمان ده ليه لازمة فعلا ولا حاجة كدة زي عفريت العلبة بيخوفونا بيها علشان نشتري عربياتهم

[alzwawy]

لأ طبعا ليه لازمه معأني خليجي علشان محدش يقول هو بيقول كده علشان هو وكيل والله انا برئ انا هاي لاين خليجي :d
بص لو في مشكله من عيوب الصناعه مشكله ظهرت لوحدها اي حاجه انت ملاكش دخل بيها الوكيل بيصلحها من نفسه انما لو حاجه منك انت حادثه بتاع الوكيل ملهوش دعوه انت الي بتدفع بس طبعا الاسعار الي انت بتتعامل بيها اقل كتير من الاسعار الي الخليجي
وفي الصيانه الدوريه يا سيدي انت برده بتدفع اقل من الخليجي الخليجي بيدفع دلوقتي 30% زياده علي اي حاجه جوه الوكيل انما انت بتدفع سعرها عادي
وخلي بالك دلوقتي الخليجي ممنوع من الصيانه خالص ولا 30% ولا صيانه خالص
بس الوكيل بقي تقييد 5 سنين مش هتعرف تركب ورقه في العربيه كل حاجه يقولك هتطلع من الضمان و يقرفك غير ان الخليجي استلام فوري غير ان الخليجي تقفيل احسن بويه احسن تكييف احسن كماليات اكتر

[Ahmed Samy]

الضمان ميزة طبعا
و الوكيل محترم في الحتة دي

بس أنا مش شايف انه سبب كافي لترجيح سيارة الوكيل مع فرق الكماليات و السعر و الوقت
خصوصا ان الخليجي لا غبار عليه و لا مشاكل جوهرية متعلقة بالضمان

حتى الأن سيارات الوكيل هي فقط تتمتع بحق الصيانة في الفروع الكبرى زي أبو رواش ودهي محاولة لترجيح كفة السيارة عند الشراء لأنه واضح ان الضمان مش لوحده مش كافي

انا اشتريت خليجي

ولو هاشتري تاني (وده احتمال كبير) هاتكون خليجي برضه

[karemof]

أسمع أن التوكيل أوقات بيتحجج أن بعض قطع غيار الخليجي مش زي عربيات التوكيل وبكدة مش حيقدر يعملها صيانة كما يجب

[Ahmed Samy]

أسمع أن التوكيل أوقات بيتحجج أن بعض قطع غيار الخليجي مش زي عربيات التوكيل وبكدة مش حيقدر يعملها صيانة كما يجب

الحجة دي يروح يقولها في مدرسة اعدادية بنات

[M.Osman]

الحجة دي يروح يقولها في مدرسة اعدادية بنات

هههههههههههه

[devilishtigers]

انا عن نفسي افضل التوكيل
خليك في المضمون وريح دماغك

[yasserelsayad]

الضمان ليه لازمة طبعا وعن تجربة
التوكيل غير لى الكاسيت كله بالوش وكل حاجة عشان كان فى زرار بيعلق
(زرار رقم واحد اللى هو بتاع الراديو دا تقريبا السوستة بتاعته اتكسرت)
وكمان غيرلى الكلاكس عشان كان صوته مش تمام
الكاسيت اخد حوالى اسبوعين عقبال ما جيه من كوريا وكلمونى قلولى تعالى فى اى وقت راكبه

[karemof]

أنا كنت في معرض عربيات النهاردة بسأل عن الكارينز الهاي لاين التوكيل صاحب المعرض كان بيحاول يقنعني بالخليجي وقالي بالنسبة للضمان فهو حيديني شهادة ضمان تمن الضمان ده 2400 جنيه لمدة 3 سنوات من شركة .....أخدت نظرة على الشهادة لقيت أشهر المراكز اللي بتقدم الصيانات الدورية لكيا هي وليد توفيق و أمير&جوزيف , مش عارف الكلام دة صح ولا ايه ؟؟؟