Tweet
صيانة الألف للخلف
يا جماعة انا لما رحت عملت صيانة الألف كم في أبو رواش يوم 18-5-2010 حصلت حاجة غريبة معايا وهي اني كنت رايح بالعربية وهي مظبوطة معايا جدا يعني لا بتحدف لا يمين ولا شمال لكن بعد ما استلمتها من الصيانه لقيت فيها حدفه شمال واضحة جدا جدا مع ان الإستقبال كان كويس ومخدتش وقت كتير يعني أقل من ساعتين بس في الأول حاولت اني أشوف المهندس خالد فاروق علشان أشكره من كتر كلام أعضاء المنتدى عنه لكن كل محاولاتي باءت بالفشل فكل الردود انه يا إما في اجتماع او مش موجود لكن انا قلت مافيش مشكله اكيد هو مش فاضي انه كل شويه يقابل واحد من اللي جايين يعملوا صيانه المهم انتظرت في مكان انتظار العملاء والحقيقة الجماعة بتوع البوفيه كانوا ذوق وبيلبوا الطلبات على طول لكن العيوب كانت ان المكان دوشه جدا اولا لأن كان فيه أطفال كتير مش عارف ليه ثانيا ان الناس كانت بتتكلم مع بعض بصوت عالي واللي كانوا بيتكلموا بصوت عالي هما اللي كانوا بيدخنوا في الأماكن الغير مخصصة للمدخنين وسايبين أماكن المدخنين مش عارف ليه وايضا من العيوب ان كان فيه ذباب كتير جدا لكن اعتقد ان العيوب دي مش جوهرية ونسيت اقولكم ان في شاشة كبيرة عليها متابعة لاعمال الصيانة الخاصة بكل عربية برقمها لكن لما بصيت عليها ملقيتش عربيتي رحت أسألهم قالولي ان اكيد ان بيانات عربيتك دخلت مانيوال علشان كده بيانتها مظهرتش على الشاشة بس مش عارف ايه ذنبي في الموضوع ده وكمان لما جيت أحاسب قلت في الخزينة اني عضو في نايل موتورز والاستيكر على العربية لكن واضح ان بتاع الخزينة مكنش عنده فكره عن الموضوع ده ولما سألولي رجعوا وقالوا ان صيانة الألف مافيهاش خصم لأنها مش محسوب فيها المصنعيات المهم اني خرجت بالعربية ولأول وهلة لقيت ان في ملاحظات على نضافة العربية من الداخل والخارج خصوصا انها متنشفتش كويس وطبعا لما مشيت بيها في طريق أبو رواش الجميل ده التراب جه على الميه وبأت معجنه مع اني ظبت الراجل اللي بينشف في الخباثه بس كأني معملتش أي حاجه ده غير أنهم غرقوا الموتور ميه مع اني كنت فاكر انه حيبقى فوم وهوا بس لكن المشكلة الكبيرة موضوع الحدفه الواضحه جدا شمال المهم لما لقيت كده قعدت اتصل بالصيانه في أبو رواش على التلات أرقام اللي معايا وكان فيه دايما رقم مشغول ورقمين مبيردوش يمكن اكون اتصلت اكترمن عشرين مره لغاية الرقم المشغول رد وقلت أعمل فيها مهم وأسأل على المهندس خالد فاروق شخصيا علشان أقوله على المشكله فلطعوني على الهولد حوالي خمس دقائق وبعدين لقيت واحد بيرد سألته عن المهندس خالد قالي معاك الأمن المهم قلتله عايز المهندس خالد قالي حشوفه وسابني تاني بس المره دي محدش رد عليا لغاية ما قفلت السكه المهم قلت أحاول أتصرف ورحت لمركز خدمة سيارات في 6 أكتوبر ولقيت عنده نيتروجين قلت أجربه بالمره وقلت ظبط على 32 والحمدلله لقيت الحدفه الشمال انتهت لكن حاسس دلوقتي ان في حدفه خفيفه يمين وجايز تكون من ضغط العجل الغريب ان تاني يوم حد اتصل بيا من الصيانه بيتابع يعني فقلتلهم على مشكلة الحدفه وان محدش عبرني فقالولي ممكن تبقى تيجي ابو رواش تاني علشان تشوف الموضوع ساعتها حسيت ان موضوع المتابعه ده زي موضوع الشاشه بالظبط ودي كانت حكايتي مع صيانة الألف للخلف. 
Comment