مصفحة للسيراتو

[tamerasala]

السلام عليكم

حد يا جماعة عنده فكرة عن امكانية تركيب مصفحة للسيراتو
الموضوع ده مهم جدا و انا كان معايا بيجو 206 و المصفحة دى حمتنى من كارثة قبل كده
انا من سكان خارج القاهرة و قبل كده سألت عند مركز محمد زكى اللى فى القطامية قالولى مفيش بس واحد صحبى قاللى انه ممكن تركب فى روكسى او ابو رواش

[NoRmAl]

حضرتك قصدك تصفيح أسفل المتور؟

[amr mokhtar]

السلام عليكم

حد يا جماعة عنده فكرة عن امكانية تركيب مصفحة للسيراتو
الموضوع ده مهم جدا و انا كان معايا بيجو 206 و المصفحة دى حمتنى من كارثة قبل كده
انا من سكان خارج القاهرة و قبل كده سألت عند مركز محمد زكى اللى فى القطامية قالولى مفيش بس واحد صحبى قاللى انه ممكن تركب فى روكسى او ابو رواش

إيه ده .... حضرتك زميل
انا برضه كان معايا 206 قبل السيراتو

التصفيح اللى فى البيجو د كان مفيد و نفعنى مرة ... عديت فوق حجر و سمعت صوت حكته فى المصفحة و الحمد لله مجراش اى حاجة فى العربية

انا رفعت السيراتو فى بنزينة قبل كده و بصيت عليها من تحت عشان اشوف الحماية اللى تحت الموتور
لقيت إنها مش متسابة على الهوا هما حطين حماية تحت الفتيس و تقريبآ تحت الكارتيرة الزيت ... بس طبعآ مش زى البيجو

فإن شاء الله متقلقش نفسك و انا لو لقيتها هركبها بصراحة على الأقل حوض الموتور يفضل نضيف شوية

[tamerasala]

هاها نفس اللى حصلى قبل كده
بالمناسبة ايه رأيك بعد ما نزلت من البيجو و ركبت السيراتو؟
انا احتجت 4000 كيلو عشان اتأقلم بس بردو البيجو محترمة و الاوروبى اوروبى

[tamerasala]

بالظبط تصفيح تحت الموتور و الكرتيرة

[amr mokhtar]

بما إنك ركبت بيجو و عارف قيمتها فأنا هكلمك بصراحة
انا لحد دلوقتى لما بشوف 206 ماشية فى الشارع بقول يا ريتنى ما بعتها
بجد العربية دى ليها روح و ليها شخصية كده مميزة
بالرغم من موتورها الصغير 1100 اللى بيطلع 60 حصان فقط إلا إنها عربية أصيلة فوق الوصف
كفاية إنها إتباعت عاملة 144 الف كيلو و عمرها ما زعلتنى فى حاجة
و كفاية إن مكنش فيه حد بيقولى كلمة واحدة فى العربية ... الإنتقاد الوحيد كان فى أسعار قطع الغيار غير كده مفيش
فده كان بيدينى ثقة فى العربية و إحساس إن اللى شارى العربية دى عارف هو راكب إيه
ده غير جودة الخامات الداخلية اللى انا دلوقتى عرفت قيمتها

بس هرجع و أقولك توكيل البيجو فى الفترة الأخيرة كان سىء لأقصى درجة
أسعار قطع الغيار و الصيانة مبالغ فيها جدآ ده غير إنها مش موجودة
و حاجتها فى الإسكندرية مش كتير فبالتالى مفيش قدامك غير التوكيل

عشان محدش يظن إن انا قطعت فى فروة السيراتو
الحمد لله على السيراتو و هى بجد برضه عربية محترمة و انا مش مضايق منها فى حاجة كفاية إن التوكيل محترم و أسعار قطع غيارها معقولة
وبرضه العربية واسعة و صالونها مريح ده بالإضافة إلى محرك متميز فى اداءه

ربنا يباركلنا فيها

بس قوللى رأيك إيه فى النقلة دى؟؟

[amr mokhtar]

البيجو محترمة و الاوروبى اوروبى

البيجو بيجو

[tamerasala]

طب انت فى اسكندرية و بتشتكى امال اللى فى السويس يعمل ايه؟ التوكيل بتاع بيجو الله يجازيه باعنا لمراكز صيانة مصت دمنا. انا قررت ابيع البيجو يوم ما موتور المساحات علق و التوكيل قاللى تمنه 700 جنيه!! بس كل ما افتكر شكل الراجل اللى اشتراها و كان حيموت عليها ازاى و جاب فلوسها قبل المعاد اعرف قد ايه الراجل ده كان عارف قيمتها. الله يمسيها بالخير مفيش عربية نقل هزتها وهى ماشية جنبها. بس الحمد لله على السيراتو و تكمل 88 الف كيلو زى البيجو