يــــــوم مـــثـــيـــرمـــــن اولــــــه مــع الـــسـيراتــــــو !!!!!!!!

[sefo]

اولا بشكر الاستاذ كريم منير على زوقه
انا اول مره اكلمه على المحمول بس واضح انه انسان زوق جدا
الموضوع ان انا وصلت ل 1300 كيلو سيراتو اس اكس وكيل
يعنى مشوار التوكيل وجب وده مشوار انا كنت عايل همه جدا
لانى عاوز اركب شويه كماليات ومكنتش متأكد انهم هيوافقو
وكنت رايح متأهب ومتحفز لاى شى علشان اخلص فى يوم واحد
بس قلت ابتدى بالذوق معاهم قبل ما اجيب سيره شكوى لكوريا والحوارات دى
المهم اخدت ميعات 8 صباحا وده كان شى صعب جدا لانى اتحركت من البيت 6:30 صباحا وفعلا كنت هناك قبل الموعد واخدت رقم 2
ومن حظى اول ما دخلت لاقيت فى وشى المهندس خالد فاروق بالرغم من انى مكنتش ناوى ازعجه وقلت اخليه لوقت لوحصلت مشكله او وصلت معاهم للاخر ابقى ادخله وده حسب ما نصحنى الا ستاذ كريم منير
بصراحه حظى كان كويس اول ما دخلت هو اللى استقبلنى فى الساحه الخارجيه فقلت قدر الله اتعرف عليه بدون ما اطب اى حاجه بصراحه لاقيته راجل ذوق جدا عرفته بنفسى وانى من نيل موتورز وذوقه شجعنى وقلتله عاوز اعمل صيانه ال1000 واركب انذار ووحدات رفع ومرايا lcd بعدسه كامير خلفيه
بصراحه الراجل مامنعش بس قالى لازم تكون حاجز تركيب انذار غير حجز الدور للصيانه وده لازم اى واحد هيركب انذار يعمل كده
يمكن انا كنت محظوظ ومكنش فى غير واحد بس حاجز ففعلا اخدت دورى فى التركيب
طبعا انا كان معايا حاجات تانى عاوز اركبها ذى قفل للجنوط وعرقات للكراسى وشويه حبشتكنات بس قلت يا واد لايمها وخلص المهم والباقى ملوش علاقه بالضمان اركبه بره
لغايه كده كله تمام
استلمو العربيه ونزلت الاستراحه وشوفت اسمى على الشاشه ومكنش فى بالاستراحه الا انا وواحد كمان. منا رايح من النجمه !!
المهم لغايه الساعه واحده ولا حس ولا خبر واسمى على الشاشه ادامه كلمه lateومحدش يسألنى معناها ايه لان محدش هناك ولا من العاملين اصلا فهم معناها غير طبعا المعنى الحرفى (متأخر)
طيب مين اللى متأخر انا ولا هما ولا ايه؟؟؟؟؟ وليه مبتتغيرش ذى الباقين . مش عارف
المهم الساعه 1:30 زهقت وقلت اطلع ابص بصه لاقت مهندش الاستقبال بيقولى عندك مشكله الانذار ممعوش سارينه والكاميرا مش عاوزه تشتغل
المهم دخلت للفنى مع المهندس وكانت المفاجئه قلى الكاميرا مش عاوزه تشتغل ارجع للى جبت من عنده الحاجه قلتله طيب منتا هتحملنى دلوقت بمصنعيات واروح انا للبياع اللى جبت من عنده الحاجه هيقولى الحاجه سليمه ومتجربه
يبقى انا دفعت كل المصنعيات دى وهتحدف من البياع للتوكيل والعيب فين الله واعلم
المهم الكهربائى وصل لحيطه سد وجاب اخره وبقى مش عارف يعمل ايه لانه على اى حال لازم هيدفعنى وهخرج بالكاميرا والمرايا مش شاغلين
وهنا حسيت انى لازم اصعد الموضوع ودخلت للفاضل المهندس خالد فاروق وقلتله ايه العمل دلوقت هروح للبياع وهقوله الحاجه بايظه او هغيرها طيب لو مشتغلتش هعمل ايه ؟ هاجى لسيادتك تانى؟ وكنت متوقع انه يقولى انا كده عملت اللى عندى وديه نتيجه ان انا جايب الحاجه من بره
بس بصراحه كان ذوق وقالى لو فى حاجه تعال تانى ونشوف العيب فين
انا بس بلوم على الفنى لان المفروض كان يبقى عنده كاميرا او مرايا يجرب بيها ويحددلى العيب فين واروح اغير اللى بايظ وانا متأكد
انما واضح ان القطعه مش ممكن تتصرف الا لوكانت على اسم عميل هتتباع يعنى وبالتالى الفنى وقف مش عارف الكوره فين بالظبط
المهم كله ده والعربيه لسه معملتش صيانه الالف لانى الكهربائى عطلنى وقت كبير جدا بدون فايده
خلص عم الكهربائى على كده وقعدت بقا مستنى الصيانه لحد الساعه 4 وكنت بقى خلاص زهقت على الاخر ولو هيسلمونى العربيه على اى حال هستلمها وامشى علشان اكمل باقى العلقه واروح لبياع الكماليات واشوف حكايته
المهم اخيرا طلعت العربيه وكانت مغسوله ومتظبته واخذتها ومشيت وروحت جرى على البياع اياه وحكيتله الموضوع
فطبعا على ما جابلى كهربائى وابتدى يشوف العيب فين كان طبعا فك كل الدنيا وحسيت انى هلم العربيه فى كام شنطه وامشى
كميه اسلاك ودواير مابين الانذار وباب السواق والمرايا الlcd والكاسيت لان اغلب الحاجات لينكد ببعض
وفين على ما وصل والكاميرا جابت صوره وظبتلى الدنيا وقلى ولا توكيل ولا كلام فاضى يا بيه احنا برضه بنفهم
بصراحه شهدتله انه شاطر جدا بالرغم من ان الموضوع طول بس ظبط الدنيا ورجع كل حاجه مكانها بالضبط وكفايه انه ميأسش ذى التوكيل وزحلقنى
المهم انى ختمت دفتر الضمان ومثبوت عندهم انى ركبت انذار وعدسه ومرايا عندهم .مش مهم مين اللى شغلهم مهو كده كده الفلوس اللى بتدفع مبالغ فيها فى التوكيل علشان الضمان مش المصنعيه
خلصت تقريبا الساعه 12 منتصف الليل وكنت على وشك انى اقع من طولى بعد يوم طويل وغريب
بصراحه الكلام ده كان الثلاثاء طبعا مقدرتش اروح الشغل ومخرجتش الاربعاء بالعربيه بس مقدرتش استنى
دخلت على النت ونزلت فيديو والعاب بأكستنشن اللى تفهمه المرايا واخدت قفل العجل والعرقات وباقى الحاجات ورحت على الجراج وقعدت اركب واجرب
عاوز اقولكم بعد الحكايه الطويله دى الموضوع جمـــــــــــــــــيل
جدا العدسه الخلفيه جميله بس لسه محتاجه شويه تعود
المرايا بتشغل فيديو وتعرض صور برزليوشن ميقلش عن صوره الكمبيوتر وممكن تبقى بتعرض الوقت والتاريخ فى شكل جميل وانا سايق وليها مدخل usb او فلاشه وجاى معاها جوى استيك وبينزل عليها العاب علشان الاطفال وممكن تعرض بخاصيه ال slid show وفى effictives كتير للعرض وممكن عرض مع تشغيل موسيقى
وناهيكم بقى عن .................................................. .....
البلوتوث اول متشغله فى التليفون والمرايا بيتعرفوا على بعض بجد حكايه طبعا ممكن ارد على طول اول لما يرن التليفون بلمسه تتش للمرايا والصوت بيوصل لسماعه العربيه والمرايا بتعرض رقم الطالب وعداد ثوانى اول ما ترد
واخيرا ركبت قفل الجنوط والعرقات وشويه الدلع اللى كانوا باقين
بصراحه قعدت فى العربيه وشغلت التكيف وعرضت شويه فيديو وصور ومكنتش عاوز اروح بس قلت كفايه كده علشان نلحق شغل بكره
اسف انى طولت عليكم بس حبيت اشارككم بأحداث يوم مثير مع السيراتو

[waleedelpiloot]

اولا حمدالله على السلامة من اليوم الشاق دة بجد الله يكون فى عونك دة انا لما روحت ركبت الانذار اعدت ساعة ونص وما كونتش طايق نفسى وكل شوية انطلهم فى الاستقبال
ثانيا اية حكاية المرايا دى شكلها اية ياريت تصورهلنا ومنين وبكاااااااااااااااام؟؟؟
وازاى قفل جنوط بصراحة مش متخيلها ؟؟؟
معلش اسئلتى كتير بس انا كمان عايز اركب شوية حاجات فى عربيتى ف بشوف اية الدنيا:d

[Qmax]

نسيت تقول الاسعار وشوية صور للشغل اللي اتعمل

والف مليون مبروك يا باشا ويللا علقه وفاتت والحمدلله ههههه

[mido_soliman]

مبروك عليك الحجات الجديدة وربنا يباركلك فيها بس ياريت اذا سمحت تقولى جبت قفل الجنوط منين بالظبط وبكام ولك جزيل الشكر

[max_ziro]

مبروك عليك الحجات الجديدة وربنا يباركلك فيها

[midotefa11]

مبروك عليك بس انا كنت عايز اعرف انت كده لسه جوه الضمان بتاع العربيه صح؟؟ يعني لو جبت الحاجات وركبتها في التوكيل خلاص تبقى ضمان الوكيل بردوو؟؟؟ وربنا يباركلك فيها ان شاء الله

[shouk_1987]

ألف مبروك يا باشا
معلش كنت عايز تفاصيل قفل الجنوط
ياعنى سعروه و بيجاب منين وهو عبارة عن ايه بالظبط ؟؟

[mezo_1978]

الف مبروك ومحتاجين شوية صور للشغل الجامد ده

[NoRmAl]

ألف مبروك يا سيفو وعلى فكره أنا دورت على الفاتوره وملقتهاش :))
بس كويس جدا جدا أنهم رضيوا يركبولك كل الحاجات دى
مبروك مره تانيه

[د.محمود صلاح]

ضربت عصفورين بحجر .. ركبت انذار بمعرفة التوكيل وظبطته بره

[amr mokhtar]

الف مبروك على التركيب
و بجد الله يكون فى عونك فى يوم زى ده
من الساعة 6 ونص لحد الساعة 12 بالليل فى الشارع
بس الحمد لله إن المجهود جاب فايدة

انا كنت عايز أقولك على حاجة بخصوص التوكيلات
عادة الفنيين فى التوكيلات مش بيبقوا شطار اوى فى تركيب الإكسسوارات زى المرايات و الكاميرات او ما شابه الحاجة دى
لإن هم مش بيبقوا متعودين على تركيب الحاجات دى
على عكس الصنايعيى اللى فى المحل .... بتبقى دى شغلته و بيركب الحاجات دى كل يوم فى عربيات مختلفة

بس الكهربائى ده لو عربية راحتلوا فيها مشكلة فى كهربة الموتور مثلآ مش هيعرف يعمل فيها حاجة على عكس الفنى بتاع التوكيل اللى متدرب كويس جدآ على كهربة العربية و صيانتها

[أبو صلاح]

الله ينور ياباشا
الف مبروك

ممكن تقولي المرايا دي جيبتها منين وبكام ؟

[aminibrahim]

يعني ايه قفل للجنوط؟

[M7amD_7amDy]

الف مبروك ياباشا :)

[midosalah]

يا جماعة حد يفهمنا ايه قفل الجنوط ده وبعدين هيا ايه المرايا دى هيا مرايا وانت سايق وشاشة وانت واقف ولا ايه النظام عايزين نفهم
ويبقى مشكور صاحب الموضوع لو نزلنا شوية صور