أخيراً غيرت كلاكس السيراتو (مع شوية صور)

[Amr A.salam]

بسم الله الرحمن الرحيم

ازيكوا يا رجالة أحسن منتدى

موضوع الكلاكس كان عامللي كاللو في دماغي

مشكلتو معايا من أول مرة ركبت العربية وأنا بجربها في المعرض ودوست على الكلاكس

(يععععععععععع) دة كان رد فعلي أول ما سمعته

صوته وحش أوي ومش لايق على العربية خالص ....من الاخر عاااااااار

فردة واحدة مسكينة ياعيني مش عارف جايبينها منين

لو على الصوت الوحش بس....ماشي

انما بعد صيانة الألف لقيته ابتدى يعلق

وبقى يفصل فترة ويشتغل فترة

لحد أما في اخر ايامه كان بيشتغل مرة في الأسبوع

وبجد فقدت الأمل وكنت بتفاجئ لما الاقيه شغال

وطبعاً انتوا عارفين ان موضوع الكلاكس في مصر مهم جداً

علشان كل من تسول له نفسه يكسر عليك أو يرمي نفسه قدامك أو عايز ينتحر حتى

المهم اني اتعلمت الصبر في الفترة دي بجد وكان هيجيلي شلل كذا مرة :)

أكتر حاجة كانت مدايقاني بجد اني حضرت زفة واحد صاحبي وكنت ماشي كدة بالعربية زي الحزين

سألت ياسر الصياد قاللي كلاكس mixo كويس من اللي بيركب في الأوبل

وبالمناسبة ياسر مركب الفردة التانية بتاعة الكارنيفال في التوكيل
وصوتها حلو ماشاء الله

رحت من كام يوم لبنزينة موبيل اللي في شارع الطيران ..عند رابعة العدوية ودي قدام توكيل منصور

وانا عارف ان فيها منفذ لقطع الغيار

طلع عندهم نوعين mixo وFiamm

الmixo علبته لونها أزرق وب75 جندي صناعة فرنسية في الأصل

بس قاللي ان اللي عنده هندي

الFiamm ب90 جندي صناعة أمريكي والراجل كان بيشكر فيه أوي

وعلى كلامه هو اللي بيركب في الأسترا الجديدة

المهم اشتريت fiamm دة وطلعوا بيركبوه في البنزينة نفسها

ركبوه في عشر دقايق بالضبط ومن غير ما يفكوا شبكة العربية بالكامل

بس لازم يقطع في السلك اللي رايح للكلاكس القديم (من قبل الفيشة)

يعني سبت الفيشة قلتله ما يشيلهاش .....ياخد بس وصلة من قبليها

ودة طبعاً لأن الكلاكسات اللي بتتباع بيبقي فيها مكان سوكيتات مش فيشة

والكلاكس بيبقى فردتين

ومعاهم كتاوت مش بيستخدم

الصور

دي فردة من الجديد جنب الكلاكس القديم



الراجل فك الأربع مسامير اللي فوق فبرة الشبكة
وبيشدها لبرة بالراحة وبيشتغل



الجثة القديمة ههههههههههه





الموضوع كله اتكلف 110 جندي بالتركيب وعشر دقايق بالضبط

والصوت قوي وحلو وعالي ......تقولشي عبد الحليم ياخواتي ههههههههههه

والتقطيعة كانت فعلاً من الكلاكس القديم
لأن الجديد ما فصلش الحمد لله ولا مرة

ودة فيديو لصوته على mazda 3
طبعاً الصوت بيبقى أقل من كدة بكتير علشان الراجل فاتح الكبوت

[youtube]http://www.youtube.com/watch?v=vY2VKrhBhf4&feature=related[/youtube]

وأجدع سلام لأحلى ناس في أحلى منتدى.....دقي يا مزيكا

بيب .. بييب ......بيب بيب .بييييب

[Mostafa Shaker]

احسن كلاكس فى الدنيا هو كلاكس الاوبل استر تحس انك راكب سفينه بس كانت سال عليه ب 120 و كانت هشيلو من العربيه قبل ما ابيعها بس قلت حرام
الف مبروك و بيب بيب زى ما انت عايز

[yasserelsayad]

مبروك يا معلم على الكلاكس :)

وبيب بيب ... بيب بيب بييييب

[mastr_n]

بجد تسلم ياعمر انا كان نفسى اعمل الموضوع دة من زمان وان شاء اللة اول لما هافضى هاتجة على البنزيمة دية علطول

لان الكلكس الى عندى بتاع 128 مش سيراتو
والف مبروك ودايما موافينا بموضوعاتك الجامدة دية يا برنس

[alzwawy]

مبروط يا معلم عمرو و عقبالي لما اشغله ادعيلي بقي و النبي غلشان انا مزلول و مسافر بكره علي الطريق من غير كلاكس رايح جاي صبح و ليل ربنا يستر

[ابو ليلى]

ياسلام عليك ياعمرو لما تعمل موضوع بيكون كامل متكامل من كل شى

مبروك على الكلاكس الجديد بس توعى ترمى القديم علشان اخده اعمله جرس للباب عندى .

[revel_sony]

الف مبروك ياعمرو بيه ومن هنا ورايح روح افراح ذي مانت عايز وروق وزقطط

[M7amD_7amDy]

الف مبرووووووووك يا عمرو باشا

انا كمان ان شاء الله ناوى أغيره عشان اتخنقت اوى منه

وموضوع مميز كالعادة يابرنس :))

وبييييب بيييييييييييب

[magdy1963]

الف مبرووووووووووك ياأستاذ/عمرو على الكلاكس موضوع ممتاز

[bolok]

مبروك الكلاكس يامعلم ...
تعيش وتدوب كلاكسات وكوتشات

[Hosam_Optrawy]

الف مبروك ياعمرو باشا

[NoRmAl]

مبروك يا عمرو وعقبالى بقى :))
موضوع مميز كعادتك يا باشا

[xShadow]

ألف مبروك يا عمرو باشا :)

إن شاء الله أريب أوي أنا حاروح اركبو أنا كمان، لو مركبتش بتاع الكرنفال :)

[Amr A.salam]

ألف شكر يا رجالة

بالنسبة للي عايز يروح يعمل الحوار دة

منفذ قطع الغيار لازق في البنزينة بالضبط كأنه جزء منها

والناس اللي بتركب مش تبع البنزينة نفسها

دة كهربائي كدة مع نفسه مكانه هناك

وكل احتياجات الكهربائي اللي بيركب : متر سلك وأربع كليبسات بجنيه ونص