تقيمى للسيراتو 2011

[mfnada]

بسم الله الرحمن الحيم

أنا زى مانتو عارفين الحمد لله جبت سيراتو هاى لاين سعودى 2011 و ماشى بيها كدة حوالى 500 كيلو و قلت اكتي التقيم السريع دة حتى تعم الفائدة


انا حاكتب العيوب الأول أو مش حاقول العيوب انا حاقول النقط الضعيفة فى العربية:

1- العفشة ناشفة جدا
2- الثبات مش كويس و تحس ان العربية من ورا مش تقيلة يعنى ممكن تعوم منك فعلا لو انت ماشى و حصل مفاجأة فى الطريق

3- العزل مش كويس على السرعات العالية


طيب انا عايز اتكلم اكتر عن العيوب دى و أبعادها بالظبط...أولا انا كنت عارف العيوب دى و متوقعها و مش مديقانى لأن العيوب دى عشان تتحل لازم سعر العربية يزيد و يزيد أوى كمان و برضة مش حننحل بالمعنى لأن الموضوع نسبى جدا جدا...يعنى مثلا البى أم دبليو عافشتها ناشفة و كل العربيات فيهم عيوب يعنى مفيش عربية كاملة فعلا...طيب نقول اية...انا ممكن أقول بكل حياد و موضوعية ان الكيا السيراتو أفضل اختيار تحت ال200 الفف جنيه فعلا و العربية الوحيدة اللى ممكن تتفوق عليها هى الهوندا الهاى لاين ب حوالى 180 الف بس برضه الهوندا واطية جدا و بتاكل بنزين بشهادة أصدقائى ملاكها...يعنى تانى : مفيش عربية كاملة :)


المميزات:

ناس كتير اتكلمت عن اللمميزات بس انا عايز اقول حاجات من ملاحظاتى الشخصية:

1- أولا العربية smart جدا يعنى الابشنز كلها حلوة و مناسبة و معمولة كويس اوى
و فى مكانها

2- التابلوة من جوة بجد حلو جدا جدا

3- موضوع الكاسيت اللى بيعلى و يوطى مع السرعة دة شغال 100 100 و كويس أوى

4-نظام الصوت مميز جدا

5- استهلاك بنزين ممتاز و استغربت من الناس اللى اشتكت من الموضع دة قبل كدة و الاستهلاك كلة باين فى التابلوه سواء instant او average و دة مبين كل حاجة فى موضوع الاستهلاك

6- العربية واسعة جدا من جوة و شنطتها كبيرة جدا

7- المفتاح الذكى فعلا حلو أوى و أرشح الناس تجيبة لأننه بيفرق جامد

8- الفرامل رائعة

9-الكرسى الهيدروليك ممتاز

10- الفرش الجلد محترم جدا


العربية ممتازة لمن يحبون القيادة بسرعات أقل من 140 كيلو فى الساعة بعد كدة العربية مش مضمونة خالص و دى حاجة متوقعة بالنسبة للسعر و القيمة

و بجد العربية باختصار ممتازة ممتازة و احسن من عربيات كتير اوى أكتر من سعرها بكتير

شكرا :)

[braveheart911]

اولا الف الف مبروك على العربيه وربنا يديك خيرها ويكفيك شرها باذن الله تعالى

انا بس حابب اعقب على التقييم بتاعك

موضوع انها مش تقيله من ورا وممكن تعوم ده بصراحه حاجه انا محستهاش نهائيا علما بانى باخد بيها ملفات قاسيه على سرعات عاليه
مع العلم انى معايا لانسر بومه 2008 ولما بكون سايقها وباخد نفس الملفات دى والله بهدى جدا علشان بحس انها بتعوم

وموضوع انها لحد 140 كيلو واكتر من كده مش مضمونه
والله العظيم انا بمشى بيها لحد 180 وبسم الله ماشاء الله ولا قوه الا بالله ممتازه
وباخد بيها غرز على 140 و150 وبتسعفنى جدا الحمد لله والشكر لله وبرضوا ماشاء الله بتبقى ثابته
مع العلم ان العربيه معايا فى الكويت مش مصر وطبعا الطرق عندنا بتسمح بالسرعات دى واكتر منها بكتير
وربنا يباركلك ويباركلى ويباركلنا كلنا فى عربياتنا

[kar!m]

ربنا يباركلكم انتوا و كل السيراتويه .. من أحسن العربيات فعلا (فى فئتها).

[yasserelsayad]

الف مبروك يا باشا على العربية وربنا يباركلك فيها ويحرسها من العين
بالنسبة لموضوع الثبات .. العربية فعلا اول لما استلمتها كنت حاسس زيك كدا انها مش مظبوطة لكن بعد كام كيلو كدا تقريبا على 700 او 800 كيلو العربية اتظبطت ومتنساش تشوف ضغط الكاوتش عشان انا اكتشفت بعد 400 كيلو انه كان تقريبا 55 والمفروض اصلا تكون 30 او 32 بالكتير فا دا كان بيأثر على الثبات فوق ال120 بشكل ملحوظ

[Atrees]

اولا الف مبروك وبقيت من العصابة خلاص :)


انا مع ياسر وباسم في موضوع الثبات دة - راجع علي ضغط الهواء - وقولنا بردوا انت كنت راكب ايه قبليها عشان بتفرق في موضوع تقيم الثبات دة


معاك جدا في موضوع العزل الصوتي - لكن انا لاحظت ان الصوت الخارجي بيبقي اعلي في العربيات جنط 17 - يعني كل ما يقل الجنط متحسش بصوت الطريق زي ما بتقول وغالبا ده بسبب مساحة احتكاك الكاوتش العريض وكمان وزن الجنط وحجمة


صدقني موضوع الثبات دة نسبي لكن ان السيراتو بتروح من ورا او خفيفة من شنطتها - تقريبا 80 % من الملاك حاسين انها ثابتة

اكيد احساسك دة مقبول وتقيمك ممتاز - راجع بس علي الضغط وقولنا رايك ايه

[mfnada]

شكرا ليكم جدا جدا :))

انا بصراحة لسة مشفتش موضوع ضغط الكوتش....حاشوفة كدة و لو فعلا زى مابتقولوا يبقى ممتاز جداا

[SheNo0o]

الف الف مبروك عليك الاختيار الي هيفضل ديما موفق وهتهني نفسك عليه ف كل مرة تحط رجلك ف العربيه
وربنا يديك خيرها ويكيفيك شرها ويباركلك فيها يارب

وعندي تعليق علي موضوع الهوا انا برده لما اخدتها من المعرض كان الكوتش كله علي 40 علشان خاطر ف المعارض بتبقاو اقفه علي بلاط وكده وعلشان الهوا ميريحش قوي وينام

راجع ضعط الهوا وجرب وقلنا ياباشا

[hosamenter]

مبروك يا باشا بس انت كنت راكب اية قبل السيراتو

[Ahmed Samy]

و الله اول ما قولت ان الثبات و حش و استهلاك البنزين ممتاز و العفشة نافشة قوي

قولت يبقى انت لسة مانزلتش ل 30 -32 ضغط

جرب و ارجع قول