تجربتى مع كيا سول

[hossam_larsson]

الحمد لله انا اشتريت كيا سول وعملت معايا الف كيلو والعربيه الحمد لله حلوه جدا وصوتها واطى اوى بس مشكلتها ان شنطتها صغيره شويه بس فيها وسع من جوه وانا كلمت التوكيل قالولى انى اغير زيت على 5000 كيلو وقالولى ان صيانة الالف ماليهاش لازمه فايه رايك فى الكلام ده واى حد عايز يشترى العربيه ويسال عن حاجده فيها انا تحت امره

[gemy215]

الف مبروك علي العربيه ياباشا وربنا يديك خيرها ويكفيك شرها
انا كمان لسه شاريها ولسه عامل الصيانه امبارح
نصيحه روح صيانه الالف والي قالك انها ملهاش لزمه دي دا بيضحك عليك وهتحس بفرق قبل وبعد الصيانه
وبعدين انا كنت عامل 1600 كيلو لما رحت امبارح وسألت المهندس هناك قالي لحد 2500 كيلو مفيش مشاكل بعد كدا غلط
فامعني كدا انو فيه حاجه مش مظبوطه ياريت تكلم التوكيل تاني
وبعدين لما سألت علي صيانه ال 5000 قالي دي مش صيانه اساسيه بس لو عايز تعمل تشك علي حاجه بتيجي
فا نصيحه من اخ روح اعمل صيانه ال 1000 افضل وابقي قلي ايه الي حسيت انو اتغير معاك

[NoRmAl]

مبروك على العربيه يا باشا
والنبى يا جدعان علشان خاطر ربنا عايزين تقرير واحد يوحد ربنا من مالك :)))
بجد الكلام عن العربيه دى محفوظ وقليل وهما كلمتين بنكررهم وخلاص :)
عايزين تقرير شامل كدا ومش مهم صور
فى كذا تقرير فى القسم عن كذا عربيه خدوا أى تقرير وشيلوا الكلام الى على العربيه دى وأتكلموا أنتوا عن السول
فمن أجل القسم عايزين تقرير :))

لصاحب الموضوع مين قلك مفيش صيانه ألف!!!!!
لأ فيه ولازم تتعمل كلم التوكيل وأحجز وروح يا باشا

[hosamenter]

الف مبروك على العربية وزى ما قال نورمال عيزين تقرير وافى الواحد ما بيصدق حد يتكلم عن السول يبقى لما نقو نقول صح بقى والف مبروك مرة تانية

[tefafathy1]

ربنا يبارك لك فيها و يرزقك خيرها و يكفيك شرها .. نورمال البرنس جاب من الأخر بصراحة :)

بالمناسبة .. هيا عربيتك فيها فوج وللا لأ ؟؟ أنا عاوز أعرف لو عاوز أركب فوج فى التوكيل .. هيكون غالى ؟ ولو بره هل يخرجها من التوكيل؟

انا تقريبا مقتنع بيها 99% بجد حاسسها ما شاء الله حلوة اوى .. و إستهلاك البنزين ايه نظامه ؟؟ كمان سمعت ان الباور بتاعها حلو اوى ..

أحكيلى انا متشوق اوى اعرف عنها كل حاجة ... العيوب و المميزات .. كل حاجة :) و ألف مبروك مرة تانية

[د.محمود صلاح]

الف مبروك .. هي بالفعل شكلها شبابي شوية وتصميمها جديد

[mohamed1979]

بالمناسبة .. هيا عربيتك فيها فوج وللا لأ ؟؟ أنا عاوز أعرف لو عاوز أركب فوج فى التوكيل .. هيكون غالى ؟ ولو بره هل يخرجها من التوكيل؟

بالصدفه كنت فى توكيب كيا بشترى ترس الكرنك للبيكانتو و واحد سأل على سعر فوانيس الشبوره للسول و كانت ب 800 جنيه

[tefafathy1]

شكرا يا محمد باشا :)

بس محدش رد عليا بردو ... ايه نظام العربية ؟؟؟ الملاك عاملين ايه معاها ؟؟ مبسوطين منها وللا ؟؟

حد شايف عيب معين فيها ؟؟

[gemy215]

شكرا يا محمد باشا :)

بس محدش رد عليا بردو ... ايه نظام العربية ؟؟؟ الملاك عاملين ايه معاها ؟؟ مبسوطين منها وللا ؟؟

حد شايف عيب معين فيها ؟؟

انا بالنسبالي العربيه عجباني جدا ومرتاح معاها وبقول الحمد لله اني اخترت السول بدل السيراتو