بتهتم بعربيتك ؟

[Deshahcoka]

رجالة يارب كلكم كويسين و زي الفل :)

بصوا بقا انا شايف انوا ناس كتير عربياتها مخبطة و الي عنده كام خبطه باسيطة و الي البابيت عاملين سمكرة و ماشي باللحام و المعجون ! الفكرة انوا في عربيات سيراتوا كتير بالمظر ده مع تنوع الخبطات :) من اول خرابيش لربنا يحفظنا :)

دلوقتي سؤالي ! هل لو عندك خبطة صغيرة و العربية ماشية زي الفل مثلاً زي حكة و لوا تطبيقة و الكلام ده تجري تصلحها و ترجع العربية زي ما كانت ولا حتكبر دماغك زي الناس ديه ؟

اساس لو لقدر الله في خبطة عفية بتصلحها غصبن عنك علشان العربية تمشي ! بس انا بتكلم لو خبطة مش مأثرة على اي حاجة و مش كبيرة و شكلها عادي !

مستني ردودكم :) الف شكر

[kamalsalem]

صدقني الموضوع احياناً بيبقى قلة الوقت المتاح للواحد غير انه وقفة السمكري سخيفة جداً لو على حاجة بسيطة... انا كان ليا واحد صاحبي مكانش بيسيب الهوا في العربية بس النتيجة انه كان كل يوم جمعة في الحرفيين مع انه من الدقي.. مع العلم انه مش عن حب لمشوار الحرفيين

انا ناوي والنية لله انه ماسبش الكروز تعمل زي البولونيز وربنا يستر من الناس وعيون الناس وسواقة الناس

[lolly136]

لو خبطة بسيطة ومش مؤثرة بسيبها مش بعملها

[aaet1]

أنا من الناس اللى بتتضايق من خبطات العربيات والخرابيش اللى فيها ... بس برضه صعب كل ما يحصل حاجة وخصوصا لو خفيفة أجرى أعملها وعلشان كده بنحاول الحاجات اللى ممكن نتصرف معاها نتصرف مثلا بكومباوند أو بقلم اللون من أخونا شوقى
أما لو حاجات صعبة فأنا بحب أسبها وكل سنة أظبط الحاجات توتال على بعضها ومابحطش فى بالى الكلام اللى بعض الناس بتقوله ... "لأ ده هينقص من تمن العربية" .... يعنى أمشى متنكد علشان منقصش من تمنها .... يوم ما أفكر أبيعها اللى مش عاجبة فيه ألف غيره وخلوها على الله

[kamalsalem]

أما لو حاجات صعبة فأنا بحب أسبها وكل سنة أظبط الحاجات توتال على بعضها ومابحطش فى بالى الكلام اللى بعض الناس بتقوله ... "لأ ده هينقص من تمن العربية" .... يعنى أمشى متنكد علشان منقصش من تمنها .... يوم ما أفكر أبيعها اللى مش عاجبة فيه ألف غيره وخلوها على الله

بظبط كده وربنا يستر عالجميع

[night_phoenix]

اصل انا لو مشيت ورا كل خربوش و حكه يا اما هتجنن او هاخد شقه ايجار جديد في الحرفين يا عزيزي العربيه وهيا علي الرصيف بيطلعلها نصيبها يحكها و ينزل و الاطفال المتمتعين بالمواهب الفنيه ابو مسمار هتعمل ليهم ايه طالما حاجه خفيفه معتاده لا بسيبها انا فعلا عندي حكه شويه كده كان اتوبيس بيهزر معايا هزار غبي و انا واقف كده وربك ستر
عارف خالي عايش في امريكا من 25 سنه بيقولي بيغسل العربيه عسيل جامد مرة كل 6 اشهر .ولما جه مرة زيارة قالي في حاجه غريبه او كل العربيات حتي الزيرو فيها حكه خبطه خربوش ليه كده توهت و عملت نفسي مش سامع..

ليه بس فتحت علي المواجع

[wisambasha]

في حاجات صغيرة ممكن تتلم كلها قبل الفحص مثلا وبتكون مش مؤثرة في شكل العربية قوي زي الحكات الصغيرة اللي ممكن تترد علي البارد والخرابيش

وفي حاجات من الصعب اسيبها لازم اعملها فورا زي لا قدر الله الخبطات المؤثرة في شكل العربية كالحوادث مثلا

اما الاكصدامات فحدث ولا حرج ممكن تعملها النهاردة وبمجرد ما تروح وتركن تلاقي ابن الحلال بايسهالك بوسة حلوة فدي بخليها كل سنة واعملهم مع الحاجات الصغيرة التانية

[Deshahcoka]

كلام زي الفل يا رجالة : ) الله ينور عليكم كلكم و ربنا يحفظنا كلنا من اي حاجة وحشة ان شاء الله

[max_ziro]

في حاجات صغيرة ممكن تتلم كلها قبل الفحص مثلا وبتكون مش مؤثرة في شكل العربية قوي زي الحكات الصغيرة اللي ممكن تترد علي البارد والخرابيش

وفي حاجات من الصعب اسيبها لازم اعملها فورا زي لا قدر الله الخبطات المؤثرة في شكل العربية كالحوادث مثلا

اما الاكصدامات فحدث ولا حرج ممكن تعملها النهاردة وبمجرد ما تروح وتركن تلاقي ابن الحلال بايسهالك بوسة حلوة فدي بخليها كل سنة واعملهم مع الحاجات الصغيرة التانية

100/100
نفس الى بعملة ..
ب الاضافة الى انى لما ببقى فاضى بعمل الحجات المؤثرة و بتعمد اسيبها حبة اهو منها تاخد العين لوة فى عين و منها كسل هههههههه

[NoRmAl]

أنا أول مجبتها كنت مهتم جدا
دلوقتى تعالى شوفها :)

[mhmdalsaadany]

انا بقى ليا سؤال صغير
انا وانا بركن العربيه في مره حاولت احضن زيادة عن اللزوم عشان الشارع ولكن حكيت في الرصيف
طبعا الحكه كلها جت في العتب من تحت هو مجرح وفي حته داخله لجوه طبعا هي مش باينه ولكن عشان انا عارفها كل ما اجي اركب العربيه عيني ترةح عليها
رائيكم اعملها مع انها طبعا هتترش وتتسمكر ولا لأ
ارجو النصيحه عشان انا محتار والكلام دا من حوالي 6شهور وانا عمال افكر اعملها ولا لأ
وشكرا مقدما

[NoRmAl]

انا بقى ليا سؤال صغير
انا وانا بركن العربيه في مره حاولت احضن زيادة عن اللزوم عشان الشارع ولكن حكيت في الرصيف
طبعا الحكه كلها جت في العتب من تحت هو مجرح وفي حته داخله لجوه طبعا هي مش باينه ولكن عشان انا عارفها كل ما اجي اركب العربيه عيني ترةح عليها
رائيكم اعملها مع انها طبعا هتترش وتتسمكر ولا لأ
ارجو النصيحه عشان انا محتار والكلام دا من حوالي 6شهور وانا عمال افكر اعملها ولا لأ
وشكرا مقدما

لو داخله بس مش مشكله سبها
لكن لو اللون طالع منها وحسيت أنها ممكن تصدى أعملها على طول

[M7amD_7amDy]

أنا أول مجبتها كنت مهتم جدا
دلوقتى تعالى شوفها :)

حالى من حالك

[mastr_n]

بجد نادر جدا تلاقى عربية فى مصر بقالها اكتر من 6شهور سليمة

لازم تلاقيها واخدة حكة واخدة خربوش الدنيا بقت زحمة جدا

بس هانعمل اية لازم نتوقع اى شىء والواحد كان نفسة لاما يجى يبيع يفتح سدرة ويقول (ماضربش فيها قلم بوية)