نازل اشترى الاسبكترا بكرة ...اخلي بالي من ايه ؟

[medomaster]

يا كياوية ....انا نازل بكرة اشتري كيا اسبكترا 2005 فابريكة كله واتو ب 52000 ان شاء الله ..فعاوز اعرف اخلي بالي من ايه وكدة لأن دي أول عربية ليه ..وعاوز اعرف سعر الفتيس كام وقطع الغيار وهل هي عربية كويسة ولا لأ ...وربنا يخليكو ليا يارب ...نسيت أقول ان اللون شامبين

[medomaster]

ممكن تردو عليا

[SeaShark]

طبعا طالما اول عربية ليك المفروض تاخد معاك حد عنده خبرة

المفروض تبص علي كل حاجة في العربية كالاتي:

1. نظرة عامة علي العربية من برة و من جوا و تحاول تكون استنتاج عن العربية هل متهانة و ولا صاحبها كان بيستخدمها كويس و هل هو مهتم بيها و لا مهمل و الكلام ده تقدر تعرفه من نظافه الفرش و حالة الدهان الخارجي و حالة التابلوه هل في شروخ او كسور ولا سليم (الكلام ده غالبا عشان هو بيبيع العربية هيخلي باله منه يعني المفروض هيكون منضفها كويس) بس برضه لازلت تقدر تستنتج الحالة العامة للعربية عاملة ازاي و الاكصدامات بتاعتها راكبة كويس بالكلبسات الاصليه ولا متشبطو بمسامير.

2. لازم تشوف العربية كانت عاملة حوادث قبل كده ولا لا و ده تقدر تعرفه من تساوي المسافات بين قطع العربية المختلفه يعني تبص مثلا علي فروق الكبوت مع الربع الامامي هل الفروق دي متساوية ولا مرحلة في اتجاه معين و نفس الكلام بالنسبة للشنطه و تبص علي القوائم بتاعة الابواب و تشوف فيها لحامات او اي حاجه معووجه ولا لا و تبص علي صدر العربية من تحت و الكارتيرات عن طريق الموتور او انك ترفع العربية و يفضل انك ترفع العربية و تبص عليها كويس من تحت عشان تشوف هل في لحامات و هل مغير ربع امامي او خلفي قبل كده ولا لا.

3.شوف العفشة ايه اخبارها و حالتها ايه دوس علي العربية من عند الشنطة جامد و من عند الكبوت و شوف العربية طرية ولا ناشفة المفروض لو المساعدين بحالة كويسه تكون العربية ناشفة.

4. إسأله علي البطاريه و شوف مغيرها امتي اخر مرة و خليه يوريك الضمان بتاعها.

5. شوف حالة الكاوتش و الاستبن ايه ممكن يكون الكاوتش شكله من برة كويس و النقشة سليمة لكن ده مش مقياس ممكن تكون النقشة سليمة و الكاوتش ماشي 70000 كيلومتر مثلا دقق كويس في الكاوتش و شوف فيه اي شقوق رفيعة و شوف اذا كان الكاوتش شغال تيوبلس ولا في داخلي.

6. و انت بتشيك علي العربية من برة كل ده خليه يشغلك التكييف و سيبه 10 دقايق مثلا و بعد كده اركب العربية و شوف التكييف ايه اخباره و سقع العربية ولا لا.

7. لازم تشوف العربيه فيها بارومة ولا لا و ده تعرفه من الرفارف و حولين العجل و تشيل فرش الشنطة و تبص علي الصاج اللي تحتها و تشوف في بارومة ولا لا.

8.دور العربية و اسمع صوت الموتور و حس بيه و شوف صوته كده

بص الحاجات دي فيها حاجات تمشي و فيها حاجات لا
يعني مثلا لو البطارية عايزه تتغير مش مشكلة بس ممكن تفاصل معاه شويه في السعر
لكن لو مثلا اكتشفت حادثة جامده قديمة او قايم مش مظبوط او الصدر في حاجة او رشة حوض دي لا لازم تخلي بالك من الكلام ده
و هقولك برضه انك لازم تاخد معاك حد

و لو عايز تسأل علي اي حاجة اسأل الناس هنا في المنتدي مفيش حد هيتأخر عنك

[A.Saad]

http://www.nilemotors.net/Nile/22454-a.html

http://www.nilemotors.net/Nile/20244-a.html

[max_ziro]

الرجالة قالولك كل حاجة و متنساش الاستخارة و توكل على الله ..

[medomaster]

جزاكم الله خيـــرا اخوتي ....وبجد ربنا يخليكو ليا يا بيتي الثاني

[wisambasha]

الف مبروك لحضرتك مقدما
بس ازاي تكون اول عربية ليك وانت في بياناتك مسجل لانسر 2008 وكمان كورولا 2008 قريبا!!!؟؟

[cOrn]

الف مبروك لحضرتك مقدما
بس ازاي تكون اول عربية ليك وانت في بياناتك مسجل لانسر 2008 وكمان كورولا 2008 قريبا!!!؟؟

يا باشا ممكن يكون مثلا اخ و اخوه بيقعدوا على نفس الاكونت بتاع المنتدى