ارجو النصيحة بسرعة فى كيا سيراتو خليجى

[engmahmoud1982]

السلام عليكم ورحمة الله وبركاتة
انا اسمى محمود عضو جديد معاكم ان شاء الله انا نازل الاسبوع اللى جاى ان شاء الله اشترى كيا سيراتو 2011 خليجى
محتاج ممكن النصيحة اية افضل المعارض اللى اشترى منها انا ساكن فى الجيزة واية المفروض اللى اخد بالى منة وانا بشترى والمفروض اشترى ضمان ولا لا والمفروض لما بشترى كاش بروح اوثق مع المعرض فى الشهر العقارى ولا لا؟؟؟؟ وهتفرق خليجى سعودى او اى خليى وارد . اتمنى من جميع الاعضاء ذو الخبرة الرد عليا فى اسرع وقت ممكن علشان انا نازل كمان يومين انشالله مستنى ردود حضراتكم
وجزاكم الله خير

[ismaeal]

أقترح عليك ان تعرف السعر والمواصفات فى أكثر من مكان محترم (خصوصاً للخليجى لان التوكيل أسعاره ثابتة) وطبعاً ميعاد التسليم ولو قدرت تعرف رقم ال vin للعربية اللى حتشتريها بالتحديد لو ممكن وتكتبه فى الموقع كثير من الزملاء حيدلك على مواصفات السيارة الاصلية بالتفصيل وبكدة لايخدعك مكان الشراء بمواصفات وهمية وتقدر تاخد رأى الاعضاء فى الاسعار والمواصفات المعروضة عليك وأنا شخصياً مريت بنفس الموقف وباتندم أنى ماعملتش كدة وربنا يوفقك لاحسن سعر ومواصفات

[NoRmAl]

أهلا بيك فى المنتدى
طبعا مهم فى الخليجى بالذات أنك تشترى ضمان
لأن محدش ضامن حاجه وبردو تبقى مطمأن من جواك
تقدر تشتريه من تكنو وان وفى عرض من المنتدى تقدر تستفيد بيه
خليك فى الخليجى السعودى أكتر وتأكد من كونه سعودى بالvin فقط لا غير
راجع على العربيه كويس جدا كأنك بتشترى مستعمل
وبخصوص المعارض الكويسه للخليجى فأنا معنديش درايه بيها
أعضاء غيرى هتفيدك فيها إن شاء الله

[moha4tec]

مبروك مقدما و اسمع كلام نورمال

[engmahmoud1982]

جزاكم اللة خير يا شباب

بس انا كان لى سوال المفروض بعد لما استلم العربية اروح اسجل عقد الملكية فى الشهر العقارى فى نفس اليوم لانى انشاللة هدفع كاش

[party_0000]

الزيو مفهوش شهر عقاري فيه جواب مرور ترخص بيه

[yasso0101]

أهلا بيك فى المنتدى
طبعا مهم فى الخليجى بالذات أنك تشترى ضمان
لأن محدش ضامن حاجه وبردو تبقى مطمأن من جواك
تقدر تشتريه من تكنو وان وفى عرض من المنتدى تقدر تستفيد بيه
خليك فى الخليجى السعودى أكتر وتأكد من كونه سعودى بالvin فقط لا غير
راجع على العربيه كويس جدا كأنك بتشترى مستعمل
وبخصوص المعارض الكويسه للخليجى فأنا معنديش درايه بيها
أعضاء غيرى هتفيدك فيها إن شاء الله

+11111

كلام نورمال صح - و العربيه الزيرو مفيهاش شهر عقاري انته بتروح المرور بخطاب المرور و العربيه بتتسجل باسمك

و بالنسبه للمعارض محدش يقدر يقول ايه المعرض الكويس و ايه المعرض الوحش

في ناس كتر اشتكت من سمير ريان و المصريه - حاول تشتري من مكان تقدر تفتح العربيه و تعاينها ويكون انته مهم بالنسبه للمعرض لكن المعرض اللي انته متفرقش معاه مش حلو - لو انته مشيت غير هيجي

و الضمان مهم جدا جدا جدا

[hancok]

انا كمان يا بشمهندس محمود حاجز سيراتو وهستلمها بكره انشاء الله
بس انا اللى حاجزها خليجى كويتى جنط 16 والتكييف ديجيتال وعدادات رياضيه وفرامل abs
وعلى فكره خليج فى الكويتى لان السعودى تكييفه مش ديجيتال تكيف بكر وكمان مفهوش ولاعه
اما السعر فأنا اللى هجيبها ب 117
وموضوع الضمان ده مش مهم اوى لان اعرف ناس كتيره جيبنها خليججى ومفهاش حاجه وبعدين صاحب المعرض بيجربيلك كل حاجه فيها
وعموما الف مبروك مقدما

[م. حاتم السباعي]

انا كمان يا بشمهندس محمود حاجز سيراتو وهستلمها بكره ان شاء الله
بس انا اللى حاجزها خليجى كويتى جنط 16 والتكييف ديجيتال وعدادات رياضيه وفرامل abs
وعلى فكره خليج فى الكويتى لان السعودى تكييفه مش ديجيتال تكيف بكر وكمان مفهوش ولاعه
اما السعر فأنا اللى هجيبها ب 117
وموضوع الضمان ده مش مهم اوى لان اعرف ناس كتيره جيبنها خليججى ومفهاش حاجه وبعدين صاحب المعرض بيجربيلك كل حاجه فيها
وعموما الف مبروك مقدما

اختلف مع الاخ الكريم شوية في حتة ان الضمان مش مهم اوي
طبعا الضامن ربنا بس العربية زيها زي اي عملية تصنيعية يعني
لو واحد شاري مكواه او تليفزيون و بعد يومين لقي الشاشة بها شرايط هيعمل ايه هيرجعوا طبعا او علي الاقل يستبدله
العربيات بقي مفيهاش الموضوع ده بمجرد خروجك من باب المعرض خلاص علاقتك بيهم انتهت حتي لو العربية لاقدر الله جابت ماتور
وعندنا هنا موضوع شهير لعمدة كيا ( الشهير بأبو ليلي )
نتعلم منه كلنا فوائد الضمان واخيرا اسف للاطالة بس وجب التحذير

م.حاتم السباعي

[hancok]

اول سنه ضمان تكنو ب 750 باين
وهل بيبقا ضمان بجد ولا اى كلام

[ALSHARIEF]

السلام عليكم و رحمة الله و بركاته ................

باشا مبارك عليك مقدما و أهلا بيك فى بيتك التانى وسط إخواتك و حبايبك و بجد إن شاء الله هتنبسط معانا و هتزودنا شرف و هتنورنا .

أولا : أنا المفروض ماتكلمش نص كلمة بعد إللى إتقال لإنه كان كلام بفضل الله جامع شامل لكن هحاول أوضح لحضرتك بعض النقط :

1 - فعلا ياسو باشا عنده حق ( االله ينور يا كبير ) مافيش معارض معينة دلوقتى تقدر تقول عليها كويسة أو لأ مع إنتشار الجشع و الغش و النفاق . لذلك أهم حاجة إن عربيتك عندهم سليمة مش مخبوطة مش محكوكة مافيهاش الهوا و مش مهم هما إيه ( أنصحك إبعد تماما عن المصرية ( أحمد ريان ) أوتو سمير ( أخوه سمير ريان ) يا قلبى لا تحزن لإنهم بيتعالوا على الناس و بيتنكوا أوى .

2 - طبعا الكاش ( ربنا يارب يباركلك و يحفظهالك من كل سوء ) زى ما تفضل الأفاضل قالوا لسعادتك مافيهوش شهر عقارى بس جواب المرور علشان الترخيص و هتتكتب بإسمك و كل عام و أنتم بخير .
3 - بالنسبة للضمان : طبعا كله على الله و التوكل على الله دا شىء جميل و مطلوب بس ناخد بالأسباب و إلا هيبقى تواكل و ليس توكل و هذا غير مطلوب - أى حاجة ممكن يظهر فيها عيوب صناعة - دا حضرتك لما بتشترى موبايل بتتأكد إن معاه ضمان يضمنلك حقك لو لا قدر الله حصل فيه حاجة - و الحمد لله أ / كريم منير مظبطلنا الدنيا مع تكنو وان و الناس و الحمد لله محترمين و كويسين جدا ............ حضرتك حتى ممكن تشترى الضمان و لو لسنة إللى هيه ممكن تكون الفترة إللى بتظهر فيها عيوب الصناعة ( لا قدر الله ) و بعدين مش لازم تشترى الضمان .

4 - الأهم لما حضرتك ترسى على معرض كويس و تلاقى العربية بالمواصفات إللى إنت عايزها أول حاجة تعملها قبل ما تحجز و الكلام ده هات vin العربية للتأكد منها و من مواصفاتها علشان نبقى فى الأمان و فى السليم .

أسف للإطالة و ربنا يباركلك و أهلا بيك معانا مرة تانية ............ تقبل مرورى

[engmahmoud1982]

الف شكر للجميع الاخوة اللى افادونى

جزاكم اللة الف خير على كل الملومات الجميلة دة عايز رايكم فى العربية دة والمواصفات :
- استيراد الكويت مواصفات عراقية
abs
air bag
parking sensor
طارة مليتى
كرسى هيدروليك مرايات تعتيم
سنتر لوك
زجاج كهراباء
مرايات كهرباء
فوانيس شبورة
ستيب ترونيك
تكييف تاتش

عاملة 113500 اية رايى اخوانى الاستاذة الافاضل؟؟