السيراتو أتسرقت و لا حول و لا قوة إلا بالله

[smartchoice]

السلام عليكم و رحمة الله و بركاته

انا بتوسل فيكم خير يا اخوانى
انا عربيتى صحيت الصبح لقيت مكانها فاضى و زجاج مكسور ع الارض ((
رحت بلغت و عملت محضر فى القسم و المديرية و مكافحة سرقة السيارات يوميها
الحادثة حصلت من يومين لكن مفيش نتيجة حتى الان و انا من ساعتها و انا بدور فى الشوارع زى المجنون ((( ارجوكو اللى يلاقيها يبلغنى و انا مستعد اكافئه
هى كيا سيراتو 2011 سودة و رقمها (ن ل \ 7146) و انا رقمى 0199734157
انا اسف ع الاطالة ربنا يديكو الصحة و العافية و يجازيكم كل خير يا رب

أنا مش صاحب العربية و معرفوش و لكن أنا لقيت الموضوع ده فى منتدى أخر و غرضى من الموضوع أننا ننشره يمكن حد فى منتدانا يلاقيها و نكسب ثواب فى الراجل دى حاجة
يقول الرسول الكريم صلى الله عليه وسلم فيما رواه أبو هريرة حيث
قال "من نفّس عن مؤمن كربة من كرب الدنيا نفّس الله عنه كربة من كرب يوم القيامة ؛ ومن يسّر على معسر يسّر الله عليه فى الدنيا والآخرة ؛ ومن ستر مسلما ستره الله فى الدنيا والآخرة ، والله فى عون العبد ما كان العبد فى عون أخيه" الحديث رواه مسلم

و كمان علشان عاوز اعرف ازاى السيراتو تتسرق هيا مش فيها أيموبليزر؟؟؟؟؟؟؟؟؟
و أية الحرامية الفجرة دول دول بقوا متطورين أوى فى السرقة

[waleedelpiloot]

لا حول ولا قوة الا بالله و ربنا يسترها علينا كلنا والراجل يلاقى العربية ان شاء الله

[AmrStYliSh]

لا اله الا الله ربنا يصبر صاحبها و ان شاء الله يلاقيها
بس هيا لو اول فئة بيبقى مش فيها ايموبلايزر لكن لو فيها بقى يبقى انا كده هابدأ اترعب على العربية

[smartchoice]

هو بيقول أنها مفيهاش أنذار حتى فتقريبا شكلها أول فئة ربنا يسترها معاه و يرجعها له و يصبره دى مسروقة من يوم 5-12-2010 و لحد دلوقتى مش لاقيها

[EZABY]

واللهي كتر ألف خيرك على نشر الموضوع ده وياريت كل واحد يقرا الموضوع ده يسجل النمره على موبايله والدنيا صغيره وممكن اي حد يلاقيها قصاده وكفايه عليه حتى دعوات صاحب العربيه ليه لما يكون سبب في رجوعها

[AmrStYliSh]

هو بيقول أنها مفيهاش أنذار حتى فتقريبا شكلها أول فئة ربنا يسترها معاه و يرجعها له و يصبره دى مسروقة من يوم 5-12-2010 و لحد دلوقتى مش لاقيها

ماهو يا باشا حتى الفئات الاعلى مش بتنزل بانذار بردو

[smartchoice]

ماهو يا باشا حتى الفئات الاعلى مش بتنزل بانذار بردو

أية الحلاوة دى عربية ب 125,000 منغير أنذار
التوكيلات مزودنها أوى هو يعنى الأنذار هيكلف أية!!!
ربنا يسترها معانا كلنا

[د.محمود صلاح]

ربنا يردهاله على خير

[ابو ليلى]

شكرا ليك على نشر الموضوع لان من الممكن ان يكون فينا راجل صالح

يكون دعائه اقرب الى الله ويستجاب

اللهم اعانه على مصيبته واخلفه خير منها

مستحيل يكون فى العربية ايموبلايزر وتتسرق لان الموضوع ببساطة ان كل عربية بيكون فيها نسختين مفتاح والاتنين ليهم كود والكنترول مش بياخد اكتر من نسختين ومستحيل العربية تدور من غير مفتاحها .

دى قصه انا عشتها كتير فعارف يعنى ايه الكود بتاع المفتاح يقع ونرجع نكود ازاى

والاكود دى بتكون على الكنترول يونت ومحتاج تسحبها وعلشان تسحبها لاازم يكون المفتاح فى العربية وفاتح الكنتكت موضوع مش سهل حد يعمله .

الايموبلايزر مهم جدا ويغنى عن الانذار فى سرقه العربية بكاملها .

[mameen]

اللهم يا جامع الناس ليوم لاريب فيه إجمع بينه وبين ضالته آمين

[ALSHARIEF]

لا حول و لا قوة إلا بالله العلى العظيم .... إنا لله و إنا إليه راجعون .... أللهم أجر أخى فى مصيبته و أخلف له خيرا منها و رد عليه ضالته و لا تجعله من الأييسين.................. أمييييييين .

المشكلة بجد يا جماعة إن الكلاب دول ( لا بارك الله لهم ) تلاقيهم متطورين جدا و حافظين العربية و عارفين إزاى يفتحوها أو يكسروا إزازها و إزاى يشغلوها أو حتى يفكوا تعشيقها و يقطروها أو يرفعوها على ونش المصيبة الأكبر إنهم بياخدوا العربيات المسروقة ده على ورش خفية مقفولة و يبتدوا جوا الورشة يقطعوا العربيات أو يفكوها و يبيعوها قطع غيار ( أللهم أرنا فيهم عجائب قدرتك )............ أو فيه إحتمال تانى و يارب يكون ده إللى حصل فعلا إنهم حبة حيوانات كانوا شاربين و لا ضاربين أى بلى أزرق و أسود على دماغهم و دماغ إللى جايبينهم سرقوا العربية يلفوا بيها شوية و لا حتى يعملوا بيها مصيبة و بعد كده سابوها فى أى حتة زى ماهية إن شاء الله .

أنا أسف ياجماعة على نرفزتى و إستخدامى لبعض الألفاظ الخارجة بس بجد لإنى حاسس بالراجل و مقدر مصيبته و يارب ينهيهاله على خير و يرجعله العربية و تنتهى المشكلة .

فى محاولة كده هعملها بس مش هاقول عليها دلوقتى و يارب يوفقنى و أكون سبب فى إسعاد الراجل ده و أسرته بس أسألكم الدعاء

[kamalsalem]

ربنا معاه بجد ويلاقي عربيته... ويا رب الأخ اللي قال ممكن يساعد يعرف يعمل حاجة

[ALSHARIEF]

السلام عليكم و رحمة الله و بركاته ..................

إستكمالا للمعلومات أنا لسه مكلم أخونا فى الله صاحب العربية ........ ( الأستاذ شريف ) بجد راجل ذوق جدا و محترم أوووووووووى بجد إدعوله يا جماعة من قلبكم بظهر الغيب ( إن مع العسر يسرا ) .

العربية إتسرقت يوم 5/12/2010 من شارع متفرع من شارع السودان خلف نادى التوفيقية و المحضر إتعمل فى نفس اليوم فى قسم العجوزة برقم 30590 فياريت إللى ممكن يساعد بأى حاجة ما يتأخرش و أنا عهدى بالناس هنا إنهم رجالة و بجد ده فرصة كويسة أوى إننا نرجع نتفاعل مع بعض مرة تانية و نرجع للمنتدى مرة تانية رونقه و بريقه و جماله و عسى الله لو رأى منا خيرا أن يكافئنا و يرد الغائب على أيدينا ............ عندى إحساس غريب إن الراجل ده هيلاقى عربيته أو على أقل تقدير هيسترد حقه من الحيوانات إللى عملو كده ............. بالله عليكم ده فرصة نلم فيها بعضنا من جديد و عفى الله عما سلف ........ و لا إيه يا عم وائل ( حبيبى يا أبو ليلى يا جميل )

أنا بفكر نطلب من إدارة المنتدى إننا ننشر الموضوع فى كل الأقسام و نعممه علشان الكل يعرف و يشارك و يتفاعل معانا............. إيه رأيكم ؟

كمان عايز أطلب من إخوانا إللى فى المحافظات إنهم يدوروا فى مخارج و مداخل البلاد لإن على حسب تخيلى إنهم خدوا العربية لفوا بيها لفتين و سابوها فى أى حتة ممكن تكون موجودة على مداخل المحافظات و لا إيه رأيكم .

و لا تنسوا ( تعاونوا على البر و التقوى ) بالله عليكم دعوة لللتعاون على البر و التقوى فياليت الكل يقبلها و يعمل بها

[Conspirator]

على فكره يا جماعه فى واحد زميلنا فى المنتدى بردوا عربيته لسه مسروقه هو كمان هيونداى النترا 2011 وفى نفس المنطقه اتسرقت من جنب نادى الترسانه كده واضح انها عصابه واحده لان السرقة بنفس الطريقة

ولو قدرنا نجمع الزميلين مع بعض ونحقق فى الموضوع لان حاسس انه فيه ان وممكن يكونوا جايبينهم من معرض واحد او حاجه زى كده لان العربيات الحديثه سرقتها مش سهله

[M7amD_7amDy]

لا حول ولا قوة الا بالله

ربنا يصبره فى مصيبته ويرجعهاله ان شاء الله

وجزاك الله خير على نقلك للموضوع