البيكانتو - الوكيل vs الخليجى؟

[Egy_fan]

السلام عليكم. الحمد لله و بعد طول تفكير استقريت على البيكانتو و امبارح اكتشفت ان فى بيكانتو خليجى

انا كنت بفكر اجيب بيكانتو كامله (64000). ممكن الخبراء يفيدونى فى موضوع الخليجى:

احسن ولا اوحش
ايه الكماليات الموجوده فيها
السعر و مكان البيع
الضمان

ياريت تفيدونى اجيب مين فيهم ان شاء الله

شكرا للردود

[Egy_fan]

يا شباب مفيش حد رد عليا. طيب بلاش تردوا على كل النقط

سؤال واحد . مين احسن علشان اجيبها

توكيل ولا خليجى ؟

ساعدونى علشان انضم لمنتدى وحوش كيا

شكرا للردود

[amir]

يا قلبك يا قلبك

علشان الناس سابتك ساعتين بتقول كدا؟!!

امال لو موضوع ورا موضوع و محدش بيرد اصلا

المهم استني شويه يمكن في الشغل و الكليات و راجعين

(يا رب وحوش الكيا ميكسفونيش )

[nonetta]

ابعد عن الخليجي
خارج الضمان
قطع غياره الله اعلم
لو في عيب صناعة.. يبقى مع نفسك
خليك في الوكيل اضمن
لوفيها حاجة داخل الضمان وهما متكفلين بيها
بصراحة ما قابلتش حد جايبها خالص
بالنسبة لي انا خلاص على وش بيكانتو خلال ايام بس وكيل طبعا

[sara2001]

الخليجي كماليات اكتر بس من غير ضمان
الخليجي كامله موديل 2011 ب 80000
زجاج كهرباء + باور + تكييف + فوج
كساحات + مساحه خلفيه + سنتر
مش عارفه ايه الكساحات على فكره
ده اللي فاكراه دلوقتي

[amir]

مش عارفه ايه الكساحات على فكره

الكساحات دي بتكون عباره عن ان الاكصدام الامامي ياخد شكل اطول و اكثر حده

المفروض في العربيات السبق ده بيساعد علي كسر مقاومه الهوا لمقدمه العربيه

و بيديها شكل اكثر رياضيه
بس هنا في مصر لو الكساحات اتعملت عموله (لان في فرق ما بين استوك المصنع و التعديلات) بتلم كل المطبات و تتكسر و تتبهدل

انما لو المصنع اللي عاملها فمش بتكون وحشه بتديكي شكل حلو بس

[A.Saad]

لو هتتكلم على بيكانتو خليجى ب 80000 يبقى فيه حاجات احسن بالسعر ده
لكن اتاكد من السعر لانه جايز نزل
انا بفضل التوكيل علشان الضمان على الرغم من قلة كمالياته
الخليجى ممكن تجيب ضمان من امان الشرق وليهم موضوع فى المنتدى بس مش عارف التعامل معاهم كويس ولا لا
بحوالى 900 جنيه فى السنة
الصيانة
ممكن تروح تكنو وان اللى الزملاء فى السيراتو الخليجى بيروحوه
شوف سمير ريان وافحص العربية قبل الاستلام كويس
وشوف جابر عبد الشهيد بس حرض منه اكتر
ولو جبت اهرام الجمعة هتلاقى كذا معرض عارضها

[sara2001]

الكساحات دي بتكون عباره عن ان الاكصدام الامامي ياخد شكل اطول و اكثر حده

المفروض في العربيات السبق ده بيساعد علي كسر مقاومه الهوا لمقدمه العربيه

و بيديها شكل اكثر رياضيه
بس هنا في مصر لو الكساحات اتعملت عموله (لان في فرق ما بين استوك المصنع و التعديلات) بتلم كل المطبات و تتكسر و تتبهدل

انما لو المصنع اللي عاملها فمش بتكون وحشه بتديكي شكل حلو بس

الشكل كمان متغير في الأجناب
وشكلها فعلاً رياضي اكتر

شكرا على التوضيح

[sara2001]

لو هتتكلم على بيكانتو خليجى ب 80000 يبقى فيه حاجات احسن بالسعر ده
لكن اتاكد من السعر لانه جايز نزل

السعر ده كان في سمير ريان من اسبوعين

[Egy_fan]

يبقى وكيل و شكراااااااااااااااااااااااااااااااااااااااااا

[bentrewsha]

الخليجي خرافه بس يا مليون خساره
بدون ضمان يعتي ترمي 80000
ثم انت وحظك

[mahamedaraby]

والله انا شايف الخليجى افضل من الوكيل واقدر اجبلها بخصم كويس من المعرض لو عايزها الفل اوبشن الاتوماتيك وايرباج وكاسيت بليت ان او عايزها العاديه
وتدخلها ضمان امان الشرق ناس كويسين ومحترمين وكل حاجه
ابعتلى رساله على الخاص وقولى الموصفات وهجيلك احسن سعر فى السوق ليها ان شاء الله

[MOSTAFABASAL]

الخليجي زي البطيخه يا حمرا يا قرعا و تبقى الوقعه مطينه بطينه سودا لو طلع فيها عيب انا معايا خليجي و بقول استر يا ساترمش مستحمل عالعربيه الهففففف