أحساسك أيه وأنت راكب سيراتو 2010 "نيو-أولد شيب"

[NoRmAl]

السلام عليكم

فى الحقيقه الواحد مش عارف يعمل أيه بعد مكان راكب سيراتو "نيو شيب" وتحولت فى أشهر قليله الى "أولد شيب" :)
العربيه حدثت بها تغيرات منها الجزريه الفعاله ومنها المظهريه الاخاذه
يعنى الناس كانت بتشتكى من الفتيس ذو النسب الاربعه الى مفيش عربيه حديثه ممكن تنزل بيه فى الوقت الحالى "على حد تعبيرهم" فجائت السيراتو الجديده بفتيس 6 سرعات حسّن بالتأكيد من أستهلاك المحرك للوقود وأيضا زاد من تسارعها ولو حتى قليلا
والشىء بالشىء يذكر ...أستهلاك البنزين الى كان بالنسبالى على رأس عيوب العربيه بالتأكيد قل مع السيراتو الجديده.
أضف الى ذلك تأكيد البعض "مش عدد قليل" وجود تحسن ملحوظ فى عفشه العربيه .. نشوفيه العفشه الشهيره وأحد أسباب نفور البعض عن العربيه قلت كثيراً ولاون مفيش شىء رسمى عن تغير فى نظام التعليق
لكن مين الى يهمه الى حصل :)
المهم العفشه نعمت "ولو حبتين"
كل دى تغيرات مهمه للغايه وأعتقد كلها رد على كل مشاكل الملاك الحاليين وكأن كان هناك من يرصد أرائهم
على صعيد الشكل بقى والكماليات فحدث ولا حرج
تغيرات فى الفوجات والشبكه الاماميه والمرايات الجانبيه
أشياء كمان كان طلبها الملاك بعينها زى المرايا الضم والبلوتوث
وجنط 16 بدل 17 لا يناسب طرقهم
وأخرى لم يصل لها خيالهم مثل الشفت بدال
يعنى من الاخر العربيه من المفترض ان يبقى أسمها the all new OF the all new kia cerato :)

أضف بقى الى كل ذلك القنبله الكبرى المتوقعه والمنتظره وهى المحرك الgdi الجديد بقدره 140 حصان والى من المنتظر أنه يشرف حوض موتور السياره مع نزول الالنترا الجديده
الشىء الى بالتأكيد سيحافظ للسيراتو ولو قليلا على رواجها كونها فى هذه اللحظه هتحظى بأفضليه التجربه
على عكس النيو النترا الى هتبقى لسه تحت التجربه ومحل شك من الجميع

بعد كل دا بقى أحساسنا أيه كملاك للعربيه موديل 2010
وأحنا الصراحه من عانينا مع العربيه ودافعنا عنها فى جميع المحافل وصمدنا من أجلها فى وجه الجميع :)
عن نفسى حاسس بحسره أن عربيتى الى كانت من أشهر تعد على الاصابع جديده كليا "حتى أسماً" أصبحت الان قديمه
حتى تسويقيا خلينا نفكر بالعقل
مع كل التغيرات دى هل سعر ال2010 هيفضل زى ال2011
مش بس علشان فرق سنه الموديل لأ
طبعا علشان الميت تغير وتغير ... يعنى موت وخراب ديار
راكب عربيه تعتبر قديمه ولو فكرت تبعا هتخسر لا محاله مع وجود الموديل الجديد

لكن أعتقد أنى مش هقدر أصبر مع نزول المحرك الجديد
بالكاد صمدت امام جميع التعديلات السابقه ومش ممكن أصبر من جديد مع أى تغير جديد :)

أنت بقى أحساسك أيه؟؟؟؟

[Atrees]

انا شايف ان الموضوع عادي -

كدة كدة كان حينزل موديل جديد - هي مش حتخلد يعني :) وبعدين التغير مطلوب :)

انا بركب العربية عشان 3 حاجات

1- تقضي مشاويري بشياكة وبراحة نفسية ومتعة
2- عربية زيرو
3 - عربية في القريب - يعني حتي لما اجي اجيب الموديل الاحدث متعورش جامد ( التعوير حيحصل حيحصل مع اي عربية - بس الفرق في خربوش ولا بطحة ) ههههههههههههههههههه


سيبك انت - العملية في القريب لسة الشكل متغيرش - ولما يتغير نبقي نفكر :)

[M.Osman]

احساس الناس بالتقادم في موديل عربيتهم اللي لسة شارينها ده احد اهداف التسويق

لازم يحسسوا الواحد انه لازم كل 5 دقائق يغير العربية !!!
كل التغييرات اللي في العربية مش مهمة بالنسبة لي اوي قد انتشار العربية اللي للأسف اصبح زيادة عن اللزوم :(

بخصوص ان الجديدة انعم .. دا بجد ولا مجرد احساس يا نورمال باشا؟

[mohamedaghali]

بصراحه انا برده عادى وبعدين انا شفت الجديده مش حاسس بتغير فى الشبكه ولا الفوجات اوى بمكن ماخدتش بالى ومعنى كده انهم مش واضحين وكمان الجنط ال17 بصراحه شكله اشيك كتير ,يا راجل ده الجنط ال16 القديم شكله احلى من الجديد تحس كده انه جنط لاكن الجديد تحس انه طاسه مديه على جنط او العكس , روق وماتشلش فى بالك وصدقنى سعر اعاده البيع مش فارق خالص غير فرق السنه مش كل الى بيشترى بيفكر زيك وبيركز فى كل الفروقات ديه ده انت فى مصر ياباشا مش بعيد يطلعوا يقولو ال2010 احسن من 2011 دي فيها وفيها وانت فاهم التجار والعربيه ماشاء الله بياعه حتى فى المستعمل و باسعار كويسه انا لسه واحد صاحبى بايع الاوتو الفاضيه خالص خليجى ماشيه 15000 2010 ب 92000 وكان جيبها ب 99000 وجاب كارينز هاى لاين

[M7amD_7amDy]

عادى يانورمال وزى ماقال محمد مش كل الناس بتفكر كده

كبر الجماجم وتعايش وهيأ لنفسك وانت راكب ان الشبكة الجديدة موجودة والمرايات الليدات كمان راكبة :))

وابقى حط إستيكر مكان زرار الضم ودوس عليه هتلاقى المرايات زى ماهيا ههههههههههه

كله كوووم والموتور الجديد كوووووووووووووم تانى وهو ده بقه اللى يزعل بجد :)

[simon659]

طب السؤال هنا لو فرضا ان الماتور نزل وقالو لازم يتحط 95 هتعمل ايه في المشكله دي طب وبعد لما تجيب العربيه الي ليها ماتوور جديد ونزل بعدها كيا بماتور احدس وكمان ليها جناحات وتطير هتعمل ايه .انا معاك ياريت اسعار العربيات عندنا معقوله مش هؤلك زي بره ده يمكن في ناس جايبه العربيه وحاطه فيها تحويشه عمرها .
انا رأي في الموضوع ده ان العربيه زي مراتي بلظبط ولا ينفع حد يسوقها غيري ولا من الاصول لو شوفت واحد اجمل منها افرط فيها واجيب غيرها وبعدين يا باشا انت معاك عربيه ناس يتمنوها الف الف واحمد ربنا اننا مش من الناس الي بتسني الاتوبيس الا في القليل علي فكره يا استاز نورمل احنا اعدت معانا بيجو 504 من سنه 1980 لغايه 2010 وكانت ممكن تقعد معانا اكتر الا اني قرفت من الكارونه يعني كان في سبب .
بجد فرق الاسعار في تبديل العربيات انت اوله بيه ويمكن بعد فرق بيع وشرا 3 عربيات يمكن يكون تمن عربيه محطرمه .وبجد انا نفسي بجد حد يكون معاه كيا الفتيس القديم ويجرب الفتيس الجديد عمر ما هيبقي في فرق الي في دماغك واسف علي التطويل

[Deshahcoka]

تسويق و استعباط و خسارة للفلوس حاجة تحرق الدم و تفور الاعصاااااااااااااااب :(

[ashouhdy]

هههههههههههههههههه

والله ضحكتونى عارفين لية

واحد صاحبى اشترى سيراتو اخر 2008 وبعديها بكام شهر جتلوا صدمة حضارية ونفسية لما شاف الشكل الجديد ههههههههههههههههههه

وانت ذعلان على فوج لايت وشبكة !!!!!!!!!!

[morasystem]

عن نفسى معجب بالشبكة القديمة أكتر

بالنسبة للبلوتوث محلولة بإذن الله مش لازم يعنى أجيب عربية فيها بلوتوث بلت إن

أما بالنسبة للمرايات الضم دى اللى تنرفز بجد ... لازم نشوفلها حل فى الأجازة بإذن الله

الفتيس القديم أكيد هيوفر فى البنزين بس هيديلك كام كيلو زيادة يعنى 40-50 كيلو فى التفويلة !!!! مش رقم برضه إنما التجميع بتاع ال4 نقلا طبعا أحسن من ال 6 نقلات و صدقنى مش بحس بصوت العربية خالص لأن فى الحالتين الأر بى إم مش هيعلى للدرجة اللى تخلينى أسمعه

بالنسبة للفلاشر بتاع المرايات الجديد ده ... فلو ركبنا ليدات صفرا من ام 10 جنيه مكان اللمبة العادية ... النتيجة هتكون ليست أقل من المرايات الجديدة صدقنى

الجنط ال 16 الجديد فعلا شكله وحش ... شكله تحس إنه مش أصلى و حاجة مش لايقة على الكيا خالص (محدش يزعل)

الموتور الجديد gdi .... معتقدش إنه هينزل ... و لو نزل إيه يعنى أنا عندى موتور dohc 124 يعلم على الdohc بتاع الميتسوبيشى

بس هو الاسلوب المستفز من شركة كيا علشان يفضلوا راكبين السوق هو اللى يحرق الدم جدا و المفروض ينزلولنا قطع غيار للحاجات الجديدة دى اللى فالقينا بيها بدل ما هم عمالين يزقوا علينا توكيلات تعبانة يقلبونا فى مصنعيات و زيت و كلام فاضى

[M.ABDEEN]

الفروقات مش كبيرة قوي امال الشيب القديم بقى يعمل ايه لما النيو نزلت !!!!!!!!!!

[shod90]

ملحوقة ان شااااء الله ... المرايات عادى تتجاب و الشيفت بيدالز بردو و بقيت العربية عندى مش مختلفة عشان انا كوب .. فاضل الكاميرا و الفتيس و البلوتوث .. الكاميرا هتتسرق و الفتيس لا يعنينى بشئ و البلوتوث مش مهتم بية اصلا مش بسنخدمة .. الفرق فعلا هيبقى كبير لو كان الموتور نزل و كمان مثبت سرعة هتبقى مفيدة للناس اللى بتسافر كتير و اوبشن كمان مش فاكر اية هههههه

[aaet1]

ولا حاسس بأى فرق إلا فى ال 6 سرعات وان كان عندى اقتناع برضه أن القديم تجميعه أفضل وبالتالى بيمشى على استايل العربية فى انها رياضية أكتر لكن غير كده أنا شايف كل القديم أحلى فى الشكل بما فيها الفتيس ... حتى مرايات الضم مش عملية فى مصر مع وجود السياس الحلوين فى الجراجات، شكل الجنوط ال 17 أفضل وما أعتقدش ان فيه أصلا تحسن فى نعومة العفشة إلا من أثر تغيير الجنط لـ16
الحاجة الوحيدة اللى عاوزها هى ال Shift paddel اللى فى الدريكسيون مع انى متأكد أنى مش هستخدمها بس هى منظرة وخلاص :))

[ابو ليلى]

على الرغم فى كل ما قيل ولكن هناك حقائق مؤكده واضحه ومنها على سبيل المثال

سعر اعاده البيع

كان من اهم مميزات السيراتو سعر اعاده بيعها لانها باستمرار مطلوبه فى السوق ولاسباب سبق وتكلمنا فيها ولكن الان الوضع اختلف اعتقد ومع مرور الوقت سيقل سعر اعاده البيع فى اقصى تقدير على ربع قيمة العربية وذلك لنزول كماليات اكتر مما كان موجود الان.

الفتيس ال 6 سرعات

اتفقنا او اختلفنا ولكن الحقيقه تقول ان مجرد وجود فتيس 6 سرعات فى اى عربية تعتبر ميزة لعدم وجودها فى سيارات كثير تفوق سعر السيراتو وبالتالى اصبحت ميزة .
هناك الكثير لايعرفون الفرق مثلما نحن نعرف لاننا باستمرار متابعين ولكن الاغلبية ليس كذلك ويبدو وعلى كلام البائعين ان ال 6 سرعات افضل وما اكتر من حوارات البائعين فى تغير الحقيقه

الشفت بدال

لا اعتبره من ضمن الكماليات ولكن تغير ملموس ويعتبر نقله كبيره فى اى سيارة فى نفس الفئة السعرية .

الخلاصة ....

كيا يهمها الاول والاخير ان تكون فى الصدارة وهذا ما حدث بالفعل ويكفى فقط
قيمة المبيعات التى تدل على احتلال الشركة للصدارة الى الان .
ومن الواضح ان ما يحدث الان فهو مدورس وليس اعتباطا من شركة تحاول ان تكون فى المقدمة وفعلا تفكير عبقرى لشركة تريد ان تعوض خسارتها فيما مضى .

اما عن انطباعى الشخصى بحاول انى استمتع بعربيتى وربنا يبارك فيها ومش بحاول اركز كتير حواليا وبقول الحمد لله على رزقى وعلى نعمة ربنا .

[waleedelpiloot]

الحمدالله يا هندسة على الى معانا
مع ان طاع من عينى البلوتوث(انا جبت gps وكنت فاكر ان فية بلوتوث بس للاسف ) والشفت بدال

[NoRmAl]

أيه الرضا دا كله :)))
ربنا يزيد ويبارك :)
بس محدش يعيط بقى لما أبيع وأجيب الجديده ومحدش يقلدنى بقى :)))))))