تشميع السيارة

[astoro]

عندى عربية سيراتو و لونها رمادى و اللون دا بيلم تراب جامد جدا .
هل التشميع علشان العربية متلمش تراب و لو كلامى صح بيتعمل فين و بكام و اشمع العربية كل اد ايه ؟
و يا ريت يا جماعة حد يتعب نفسة و يرد عليا علشان انا زهت من التراااااب و العريبة جديدة و مبتلمعش حراااااااااااام

[Mshawky]

الشمع بتباع فى كارفور انواع كتير فى فورميولا 1 الامريكى وفى سوناكس الالمانى وانا ع ننفسى بستخدم سوناكس

وبيتعمل كل 15 يوم ولو لم تراب هيبقا سهل تنضفه لانه بيعمل طبقه عازله بيحميع العربيه من التراب والشمس والمياه وكده وبتفضل بتلمع 15 يوم او اكتر كمان وصحى جدا للدهان

واى استفسار انا تحت امرك

[astoro]

الف شكر يا باشا بس انا كنت اسمع ان التشميع بيتعمل فى محطات البنزين بيبقى احسن ولا ايه رأيك
و لو اشتريته من عند كارفور اعمله ازاى ؟
معلش يا باشا تقلت عليك

[hmotors]

الموضوع بسيط امشى بس على الخطوات دى:

- اغسل العربية كويس جدا من الأتربة ونشفها برضه كويس جدا
- اشترى بولش يكون من ضمن خواصه الواكس يعنى الشمع (ملمع + شمع ) دى بتكون عبوه واحده زى الى قال عليها مشكورا Mshawky ومهم جدا كيس قطن ناعم ويفضل يكون نوع كويس بقدر الإمكن وده موجود فى كارفور وسعره مش غالى
- ابدأ بالعربية من فوق لتحت قطعة قطعة يعنى ( السقف ، الشنطة ، الكبوت، الباب، الرفرف ) واستخدم الأسفنجة الى بتيجى مع بولش الشمع لو كريم او لو سائل يبقه ممكن تحط من العلبه علطول وتبدأ تستخدم القطن انك توزع الكريم على المنطقة الى بتعملها وتكون حركات دائرية كأنك بتنضف حاجة ومراعة عدم الضغط المفرط
- هتلاقى المنطقة الى عملتها دى بأه كلها كريم متمسحوش خالص بعد المرحلة الأولى
- أبدأ كمل باقى العربية بنفس الطريقة
- لما تخلص العربية كلها سيب القطن الى كن بتعمل بيه الكريم او البولش السائل
- اخر مرحلة هات كميت قطن نظيف معلوهوش اي كريم او بولش وبدأ امسح اول قطعة عملتها هتلاقى الكريم بيتشال زى البدرة والمظهر هيكون مبهر جدا جدا بس عايو ااكد عليك استخدم نوع بولش كويس وعلشان عربيتك جديدة بلاش يكون بولش شمع خشين.

نصائح:
- اغسل العربية فى بنزينة عادى جدا وبعد كده ارجع البيت لو فى جراج هيكون هايل جدا بس راعى فى عملية البولش دى ميكونش حوليك عفرة او عربيات رايحة جاية علشان الأتربة مضرة فى عملية التلميع دى
- يفضل عدم إئستخدام فوط فى مرحلة التلميع واضافة الشمع خليها كلها بالقطن بس
- لازم تسيب البولش ينشف خالص بعد الدعك علشان النتيجة تكون مبهرة
- متعملش اى حاجة تانى بعد البولش والإزالة بالقطن

[astoro]

شكراااا