Tweet
الحمد لله أستلمت كيا سول هاى لاين وكيل و رخصتها (تقرير سريع)
السلام عليكم ورحمة الله وبركاته
أزيكم يا رجالة المنتدى الحمد لله أستلمت كيا سول نحاسى أول أمبارح و روحت رخصتها فى الدهقلية موطنى الأصلى و عملت بيها فوق ال 350 كيلو
العربية حلوة جدا و نعمة أوى و تحس كأنك رابك suv صغنططة كده زى التريوس كده
الموتور زى الفل هو و الفتيس و العربية أستجابتها سريعة و ده طبعا فى حدود المسموح بيه فى التليين
أنا طبعا ماشى من القاهرة للدهقلية من 70 إلى 90 كم فى الساعة معظم الوقت و نادر أوى لما اجيب ال 100 لظروف طارئة
العربية ثابتة فى الملفات لحد سرعة 100 بشكل كبير و أستجابتها للمناورات كويسة جدا و التسارع بتاعها زى الفل يعنى لما كنت بعدى مطب مثلا و أقوم ساحب طبعا الأر بى أم 3 بالكتير أوى بلاقى نفسى عقبال موصل لل 80 كم\ساعة سبقت كل العربيات اللى ورايا بشكل ملحوظ و بعد كده كلهم بيسبقونى بقى علشان انا ماشى 80
أستهلاك العربية فى البنزين حلو جدا و كان بيوصل معايا أحيانا ل 4,8 لتر فى ال100 كم بس المتوسط حوالى 7 لتر فى ال 100 كم و متهيألى ده كويس أوى خصوصا أنى فى التليين أنا عامل حوالى 380 كيلو ب 23 لتر بنزين يعنى المفروض فى 100 كم الأستهلاك كان 6,05 لتر بس العربية بتقول 7 لتر المهم يعنى طول ما انت ماشى من غير حرق و فرك الأستهلاك كويس جدا العربية تانكها 48 لتر يكفوك حوالى 600 كم
العيوب بقى
أماكن التخزين قليلة خصوصا بعد ما الفتحة اللى فوق الكاسيت بقت مفتوحة و كمان مسند اليد مش درج زى كل العربيات اللى خلقها ربنا ده مجرد دراع لازق فى الكورسى فمفيش أماكن تخزين مقفولة غير الدرج اللى فى التابلوة
العفشة ناشفة جدااااا بس بما انى متعود على الكورولا بتاعتى فهى نعمة كبير
الأستفسارات بقى
أولا الفلاشة مش راضية تشغل قرأن ش عارف لية و خليت المعرض يجرب فلاشة من عنده فيها اغانى قامت أشتغلت
و الفلاشة بتاعتى أفضل أشيلها و أحطها تقوم تشغلى أول سورة فقط و تقوم وقفة و معرفتش أستمتع بالقرأن طول الطريق و كنت متغاظ أيه الحل من خبراء الكيا عموما
أنا ركبت انذار فى الوكيل قبل الأستلام و قلت للمعرض يظبطهولى انه يرن لو حد خبط العربية راح بردو ظبطوه أنه يرن لو الباب أتفتح فقط السؤال بقى هو الأنذار فى سينسور و بيتظبط أنه يرن لو أتخبطت ولا مفهوش لن لو كده يبقى بتاع المعرض بيشتغلنى ؟؟؟
المفروض أن اللوك يقفل لما أجيب سرعة 40 بس هو مش بيقفل غير لو دوست على زرار اللوك فهل ده كده عيب و لا هو لية طريقة معينة
سؤال أخير أزاى اظبط trip علشان أعرف أنا مشيت قد أية او مثلا لو هغير قطعة غيار بعد عدد كيلو متر معين و عاوز أظبطها
أخيرا بقى
العربية حلوة جدا و مميزة جدا و اللى ناوى عليها يروح يركبها و يتوكل على الله
Comment