اشتريت بيكانتو 2012 الشكل الجديدة يارجالة

[bayoumisoft]

انا اسف على التاخير بس لاني كنت مسافر السعودية وملحقتش اجربها اوي
بس دلوقتي اقدر اقيم العربية

سحب العربية فوق الممتاز رغم تشغيل التكييف وتحميل 3 اشخاص الفتيس الاتوماتيك بيستجيب معايا بسرعة ولما بدوس على اخر الدواسة العربية بتطير

الصالون واسع رغم صغر السيارة وكمان مريح

استهلاك البنزين فله تقريبا بتشم بنزين

العفشة كويسة بس ناشفة سنة

صاج العربية فيه مشكلة اي خبطة فيه مينفعش تتعمل على البارد خصوصا الابواب لان فيه زوايا كتيير وده حصل معايا خطبة صغيرة فى الباب بوظت زوايا الصاج عملتها على البارد بس شكلة وحش

ثبات السيارة حتى 120 ك ممتاز متقدرتش الاقي طريق فاضى اجيب عليه اكتر من كدة خصوصا بعد ما عملوا الرادار ابو روحين فى الدائري

حصل معايا فصل بايخ جدا احب اني اقوله علشان الكل ياخد باله:
كنت ناوي اطلع على العين السخنة فرحت حطط بنزين 92 فى البنزينة اللي بعد طريق السويس مباشرة وانت رايح على طريق العين السخنة بعدها بحوالي 5 داقائق لقيت العربية مهنجة خالص ومش عايزة تشد وبتمشي بالكتييير على 10ك فى الساعة وكمان طالع منها دخان اسود اتخطيت طبعا لان العربية خليجي ومالهاش ضمان روحت لفيت وروحت وسئلت بعض اصدقائي قالولي ان ده من البنزين وشكل البنزين مخشوش مكدبتش خبر رحت طلع على بنزينة قريبة مني فضيت البنزين وحطيت بنزين جديد جربت لقيت العربية رديت فيها الروح تاني وقلت الحمد لله


ولو حد عنده اي استفسار انا موجود فى الخدمة

الواضح ان الموديلات الجديدة فيها زوايا ( الانترا الجديدة , الاكسنت rb , ..........)
ودى مشكلة ها تقابل المستهلك المصرى , لان العربية 90 % لازم تتخبط فى مصر


يا ترى اية اخبار المطبات معاك . يا ترى بتحك فى المطبات , لانى ملاحظ ان العربية مش عالية عن الارض

[icahmed]

يا ترى اية اخبار المطبات معاك . يا ترى بتحك فى المطبات , لانى ملاحظ ان العربية مش عالية عن الارض

مش بتحك خالص واعتقد ان سبب ده ان طول قاعدة العجل صغير بالتالي مش هيبقى في فرصة انها تلمس المطب

[Ghosts]

ألف مبروك .....

[mostmoh]

ألف مبروك على السيارة . هو التوكيل مش بيقبل يستلم الخليجى؟

[BassamHafez]

خصوصا بعد ما عملوا الرادار ابو روحين فى الدائري

هو ايه الرادار ابو روحين ده

انا بمشي على الدائري كتير وما شوفتش حاجه جديده

انا بس بقالي اسبوع ما مشيتش على الدائري هو في حد شاف حاجه جديده ولا ايه

[fineart607]

خطأ مطبعي كان قصدي باور مش عارف جت منين بعد ساعة ديه

اكيد كنت بتكلم حد وبتقوله بعد ساعة بتحصل هههههههههههه
مبروك وربنا يبارك لك فيها يارب

[Donzi]

الف مبروك و ربنا يكفيك شرها يا رب

[icahmed]

هو ايه الرادار ابو روحين ده

انا بمشي على الدائري كتير وما شوفتش حاجه جديده

انا بس بقالي اسبوع ما مشيتش على الدائري هو في حد شاف حاجه جديده ولا ايه

قصدي الرادار اللي بيتحط فى وسط الطريق بيكشف الطريق اللي ايح واللي جاي ولو بتيجي من ناحية مدينة السلام الى مدينة نصر هتلاقي اكتر من واحد فى متصف الطريق

[BassamHafez]

قصدي الرادار اللي بيتحط فى وسط الطريق بيكشف الطريق اللي ايح واللي جاي ولو بتيجي من ناحية مدينة السلام الى مدينة نصر هتلاقي اكتر من واحد فى متصف الطريق

ايوة قصدك اللي زي اللي على المحور

انا اصلي مشاويري على الدائري ما بين التجمع والمعادي وما لاقيتش الرادار ده

اللي موجود ابو روح واحده بس ههههه اللي بيركب على اليمين بس معظمهم متكسرين دلوقتي

[MAKHARETA]

فعلا تأكيد معلومةلخبطة العربية فى البنزين المغشوش لأنى لفيت بالعربية على أمة لا أله الا الله بسبب أنها مش بتسحب معايا وكان السبب البنزين المغشوش فعلا ده بيلخبط العربية فلازم الحرص فى التموين من بنزينات سمعتها كويسة حتى لو كانت فى أخر الدنيا

[Mohamed Elwan]

ربنا يبارك لك فيها انا ناوى اجيبها ان شاء الله

[icahmed]

ربنا يبارك لك فيها انا ناوى اجيبها ان شاء الله

توكل على الله العربية زي الفل

[dodo77]

مبروك العربية ربنا يباركلك فيها و يسلم طريقك انا تقريبا استقريت عليها و عايزة اجيبها بس كنت متردده فيها بسبب سعرها ياريت اعرف رائيك فيها

[icahmed]

مبروك العربية ربنا يباركلك فيها و يسلم طريقك انا تقريبا استقريت عليها و عايزة اجيبها بس كنت متردده فيها بسبب سعرها ياريت اعرف رائيك فيها

بخصوص السعر، كل العربيات الحديثة سعرها بقى اغلى بكتير يعني عندك الالنتر كانت فى حدود 95 الف بقت فى حدود 120 الف وده حال معظم العربيات اللي فيها تقنية او مواتير جديدة

العربية اجمالا ممتازة
اكتر حاجة مميزة فيها السحب والعزل
الثبات مش وحش بردة. انا جبت بيها 170 على طريق السخنة

واسواء حاجة الدركسيون بالمس يعني لمسة بسيطة على الطريق وانت ماشي 90 بتخلي العربية تحدف وده بيخلينى حطط يد دايما على الدركسيون بس هو الدركسيون خفيف فحت وانت واقف لدرجة اني بحركه بصبع واحد بدون اي تعب
كمان لو حبيت تحط حامل الدراجة مش هينفع علشان الاكصدام الخلفى عرضه لبره مش كبير

ولو احتجت اي معلومة انا في الخدمة

[dodo77]

شكرا لرد حضرتك و فعلا كل العربيات اسعارها زادت اوى وده صعب عليا موضوع الاختيار بس ان شاء الله استقريت على البيكانتو