استلمت الكارينز وعندي مشكله

[just_poss]

السلام عليكم كل سنه وحضراتكم طيبين وبلدنا الحبيب وكل الامه العربيه والاسلاميه بخير
بحمد الله وفضله استلمت النهارده عربيتي الكارينز خليجي هايلاين وحصلت حاجه كده تاعباني ومش قادر استنى لحد بكره
طلعت من المعرض بالعربيه وبعد مشوار قصير حوالي 5 كيلو بس في زحمة مصطفى النحاس مؤشر الحراره كان قبل النص بشرطه.. قلت يمكن مية الرادياتير ناقصه.. وقفت وفتحت الكبوت ببص على فتحة الرادياتير لقيته بيرجرج زي ما يكون الميه جوه بتغلي وشميت ريحة شياط خفيفه.. وقربة الميه كانت تقريبا فاضيه.. طبعا انا قلبي وقع دي العربيه زيرو ولسه مترخصتش.. طلعت على اول بنزينه ومليت القربه ميه خضره لحد العلامه وكلمت الاستاذ الي شاري منه في المعرض لقيته روح وقالي تعالالى بكره
هل ده طبيعي ان مؤشر الحراره يقرب على النص؟؟
هل رجرجة فتحة الرادياتير ديه طبيعيه؟؟ انا مفتحتش الرادياتير طبعا فمش متأكد ان الميه كانت بتغلي
هل ريحة الشياط البسيطه ديه عاديه في الزيرو؟؟
اتصلت بواحد صاحبي قالي غلط جدا انك تزود ميه غير مايتها قبل الالف كيلو.. هل الكلام ده صحيح؟؟

طمنوني الله يكرمكم انا مش هعرف انام لحد ما اروحلهم بكره انا لسه ماشترتش الضمان ومتضايق جدا ربنا ما يحط حد في الموقف ده

[M.Akef]

عن المؤشر فهو الطبيعي انه يكون قبل النص بشرطه كدا العربيه حرارتها مظروطه
عن الرجرجه دا شئ غريب طبعا لكن ممكن المروحتين كانو شغلين فكانو بيهزوها خفيف او الغطاء مش مقفول كويس
عن الشياط لو من الموتور في اول 1000 كيلو فدا طبيعي لو كنت حضرتك قرصت عليها او جريت شويه بيها
عن تزويد الميه قبل صيانه ال1000 الله اعلم لكن عموما اظن مفيش اي مشكله و ابقا اعرف هي كان فيها ايه لو كان فيها خضره يبقا خلاص مش محتاج تعمل حاجه لو كانت الي فيها عاديه ابقا فضي الي فيها و اقبلها كلها خضره او عاديه برحتك

[ehab_osman]

خير ان شاء الله ..... والف مبروك

اولا الف مبروك وربنا يديلك خيرها ويكفيك شرها .
ثانيا موشر الحرارة ... قبل النصف بشوية ؟؟؟؟؟؟؟؟؟ ده عادي وهو ده الطبيعي والموشر ثابت لا يقل ولا يعلي .
ثالثا اضافة مياة خضراء ...... مفيش مشكلة وهذه المياة حتتغير عند صيانة الاربعون الف ( انا كانت عربيتى ناقصة مياه .... يعني كانت منتصف العلامة الادني والاعلي ... طبعا رحت مزودها مياه خضراء مفيش مشكلة ) .
رابعا صوت الرجه ديه ؟؟؟؟؟؟ يا ريت تبص عليها مرة ثانية وبهدوء ... ؟
خامسا لازم تعمل ليها ضمان ضد عيوب الصناعة .
سادسا ريحة الشياط ... وجود بعض الاتربة علي الموتور ومع سخونة العربية والجو حدثت هذه الريحة ... اذا تكررت روح ا\غسل الموتور في اي بنزينة محترمة .

واخيرا خير ان شاء الله ..... والف مبروك مرة ثانية

[salodas]

الرجرحة مش طبيعى ..
تزيد المياه طبيعى ...
مؤشر الحرارة طبيعى

[Na7nology]

باشا .. أولا ألف مبروك وربنا يباركلك فيها ويكفيك شرها....
معلش انا أستفسارى بعيد عن الموضوع اللى انت بتستشير فيه الناس شوية بس أنا بدور على كارينز سعودى هايلاين ممكن تدلينى لو عربيتك سعودى ولا لأ وجايبها منين والسعر كام...
ومرة تانية الف مبروك على العربية وان شاء الله حاجة بسيطة

[ashouhdy]

حتى الأن كل اللى انت قولتة طبيعى فى عربية زيرو ... وتزويد المياة عادى جدا

[just_poss]

شكرا لكل الناس الي ردت الحمدلله اطمنت على العربيه مفيش مشاكل والرجرجه ديه مشفتهاش تاني غالبا من رعب الموقف بس ومكنتش مركز كويس والعربيه جميله الحمدلله
استاذ Na7nology عربيتي هايلاين كويتي الفرق بينها وبين السعودي تكييفها بكر مش تتش جايبها من فور برازرز الي في عزت سلامه الي على ناصيته جاد عباس العقاد وبيقولوا الاسبوع الجاي هيجيبوا السعودي كل الالوان ممكن تروحلهم وتسأل ولو عايز السيلز مان الي بايعلي راجل محترم جدا جدا وتعب معايه لحد ما جبنا العربيه

[Na7nology]

شكرا لكل الناس الي ردت الحمدلله اطمنت على العربيه مفيش مشاكل والرجرجه ديه مشفتهاش تاني غالبا من رعب الموقف بس ومكنتش مركز كويس والعربيه جميله الحمدلله
استاذ na7nology عربيتي هايلاين كويتي الفرق بينها وبين السعودي تكييفها بكر مش تتش جايبها من فور برازرز الي في عزت سلامه الي على ناصيته جاد عباس العقاد وبيقولوا الاسبوع الجاي هيجيبوا السعودي كل الالوان ممكن تروحلهم وتسأل ولو عايز السيلز مان الي بايعلي راجل محترم جدا جدا وتعب معايه لحد ما جبنا العربيه

باشا كتر خيرك والف شكر لردك .... كنت عاوز أسألك حما بيتعاملوا مع تريبل أيه عشان الضمان وكده ولا أيه النظام؟!
ومرة تانية ألف شكر ليك وربنا يباركلك فى عربيتك يا رب

[ashouhdy]

فى قرق فى السعر ولا لأ ؟؟؟ السعودى بكام والكويتى بكام ياجماعة ؟؟؟؟ الوكيل ب 133الف الخليجى بكام ؟؟

[just_poss]

باشا كتر خيرك والف شكر لردك .... كنت عاوز أسألك حما بيتعاملوا مع تريبل أيه عشان الضمان وكده ولا أيه النظام؟!
ومرة تانية ألف شكر ليك وربنا يباركلك فى عربيتك يا رب

يا فندم العفو انا معملتش حاجه واسف على التأخير في الرد انا مش بادخل كتير
هما بيتعاملوا مع تريبل ايه والضمان 1100 في السنه الاولى و1700 في التانيه
الشباب هنا في نايل موتورز جابوه باسعار احسن من كده.. ارجع في الموضوع ده لكريم منير مباشرة

بالنسبه لسعر الخليجي ال2012 سعودي ب134 لحد الاسبوع الي فات
ال2011 سعودي ب128
الفرق بين السعودي والكويتي التكييف التاتش بس وفارق في السعر 2500 جنيه

[ashouhdy]

طب فى فرق فى مستوى برودة التكييف بين التوكيل و الخليجيى ولا كلة واحد ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[just_poss]

يقال ان الخليجي تبريده اقوى.. بس معلومه مش أكيده
عموما عربيتي حتى الان تكييفها معقول ولو انها لسه مكملتش 200 كيلو وفي جميع الاحوال تكييف الكارينز مش نقطة قوه في صالحها

[ramy87]

السلام عليكم كل سنه وحضراتكم طيبين وبلدنا الحبيب وكل الامه العربيه والاسلاميه بخير
بحمد الله وفضله استلمت النهارده عربيتي الكارينز خليجي هايلاين وحصلت حاجه كده تاعباني ومش قادر استنى لحد بكره
طلعت من المعرض بالعربيه وبعد مشوار قصير حوالي 5 كيلو بس في زحمة مصطفى النحاس مؤشر الحراره كان قبل النص بشرطه.. قلت يمكن مية الرادياتير ناقصه.. وقفت وفتحت الكبوت ببص على فتحة الرادياتير لقيته بيرجرج زي ما يكون الميه جوه بتغلي وشميت ريحة شياط خفيفه.. وقربة الميه كانت تقريبا فاضيه.. طبعا انا قلبي وقع دي العربيه زيرو ولسه مترخصتش.. طلعت على اول بنزينه ومليت القربه ميه خضره لحد العلامه وكلمت الاستاذ الي شاري منه في المعرض لقيته روح وقالي تعالالى بكره
هل ده طبيعي ان مؤشر الحراره يقرب على النص؟؟
هل رجرجة فتحة الرادياتير ديه طبيعيه؟؟ انا مفتحتش الرادياتير طبعا فمش متأكد ان الميه كانت بتغلي
هل ريحة الشياط البسيطه ديه عاديه في الزيرو؟؟
اتصلت بواحد صاحبي قالي غلط جدا انك تزود ميه غير مايتها قبل الالف كيلو.. هل الكلام ده صحيح؟؟

طمنوني الله يكرمكم انا مش هعرف انام لحد ما اروحلهم بكره انا لسه ماشترتش الضمان ومتضايق جدا ربنا ما يحط حد في الموقف ده

حبيت بس اطمنك اكتر
انا والدي عندو كيا كارنز موديل 2011 خليجي
و بالنسبة للوضع الطبيعي لمؤشر الحرارة هو قبل النص بشرطتين و لو عايز اصورهالك قوللي
بالتوفيق

[just_poss]

حبيت بس اطمنك اكتر
انا والدي عندو كيا كارنز موديل 2011 خليجي
و بالنسبة للوضع الطبيعي لمؤشر الحرارة هو قبل النص بشرطتين و لو عايز اصورهالك قوللي
بالتوفيق

شكرا جزيلا يا فندم ربنا يخليك ويبارك لوالدك في عربيته انا اطمنت من ناحية الحراره
هروح بكره ان شاء الله اركب انذار.. تنصحني اركب ايه ومنين؟؟

[ramy87]

شكرا جزيلا يا فندم ربنا يخليك ويبارك لوالدك في عربيته انا اطمنت من ناحية الحراره
هروح بكره ان شاء الله اركب انذار.. تنصحني اركب ايه ومنين؟؟

لا بصراحة الوالد لسه مركبش إنذار فيها و هيه أساسا فيها إنذار و في إستيكر على إزاز السائق مكتوب عليه كده
بس لحد دلوقتي ما شتغلش
و عملت ذي الأوبترا عندي دخلت جوه العربية و قفلت بالريموت ف الإنذار بيشتغل و بعدين بفتح الباب بالعافيه من غير ريموت برفع المسوجر بإيدي عادي ف الإنذار بيشتغل
جربت كده مع الكارينز ما حصلش حاجه
مش عارف هيشتغل امتى ؟

بس إن شاء الله حد يفيدك و إلحق ركبه و ياريت تشتري كلابش الدريكسيون و ما تركنهاش في مكان ضلمه و بعيد عن بيتك و تزود وسائل الحماية ضد السرقة لإن مفيش أمان اليومين دول لحد ما الوضع يستقر بس

بالنسبة لجهاز الإنذار على حسب معلوماتي في نوع إسمه
( سمفوني ) أسمع إن هوه كويس و سعره مناسب
و نوع تاني إسمه ( فوكس ) بس ما عرفش حاجة عنه

الأوبترا عندي هيه موديل 2006 بس كان نازل فيها جهاز إنذار

بالتوفيق

ربنا يحفظهالك