صوت كركرة مع زيادة البنزين

[aaet1]

السلام عليكم، فيه صوت يمكن أول مرة أحس بيه بيظهر بعد ما أكون دايس الفرامل بحيث العربية هديت جدا وبعدين أزود بنزين علشان أزود السرعة تانى (مافيش تكييف شغال) والصوت عبارة عن كركرة أو شخللة كام مرة كده ويروح (بتفكرنى بصوت العربيات المانيوال) ، لاحظت برضه ان الصوت ما بيظهرش لو كانت دوسة البنزين حنينة قوى وهو عموما ما بحسش بيه إلا لو فاتح الشبابيك وأكون ماشى فى شارع ضيق بحيث ان العربيات اللى واقفة على الجنبين تظهر الصوت أو ماشى جنب رصيف عالى
هل الصوت ده طبيعى .... تحياتى

[MAKHARETA]

متابع ومنتظر رد بردو

[medo_elgezy]

البنزين وحش و مخلوط او فيه ميه

[eng_maged]

بص لو الصوت اللي فب بالي
فده الميكانيكيه بيسموه العربيه بتسقف
وده حاجه من التلاته
اولا: بنزين وحش - جرب بنزينه تانيه وشوف النظام
ثانيا: كهرباء العربيه مش مظبوطه - او بمعنى اخر وقت الاشتعال مش مظبوط
ثالثا: لو كنت عملت اي تغيير في سير الكاتيه فممكن يكون مش راكب صح وده يعمل كده برضه

[ahmedsrs]

كلام الاخوة تمام واضيف عليه وضع العربية على سكانر لو الموضوع متحلش للكشف على حساس التسقيف ولو التسقيف بيقعد جزء من الثانية يبقى طبيعى لغاية لما الحساس يشتغل

[aaet1]

أولا يا جماعة أنا متشكر على الإهتمام، ثانيا الصوت أنا حابب أعدل فى تسميته بأنه صوت شخلله مش كركرة، ومن مخلال ملاحظاتى خلال الايام اللى فاتت لاحظت ان اكتر وقت بيظهر فيه لما اكون على مطلع زى كوبرىاو مطب صناعى وبزود بنزين - مش دايما بسمعه- او اكون ماشى على سرعة وبعدين اهدى لسبب ما وارجع بسرعة ازود بنزين وهو فعلا بيستمر لـثوان معدودة وبيختفى

[eng_maged]

أولا يا جماعة أنا متشكر على الإهتمام، ثانيا الصوت أنا حابب أعدل فى تسميته بأنه صوت شخلله مش كركرة، ومن مخلال ملاحظاتى خلال الايام اللى فاتت لاحظت ان اكتر وقت بيظهر فيه لما اكون على مطلع زى كوبرىاو مطب صناعى وبزود بنزين - مش دايما بسمعه- او اكون ماشى على سرعة وبعدين اهدى لسبب ما وارجع بسرعة ازود بنزين وهو فعلا بيستمر لـثوان معدودة وبيختفى

ده بالظبط التعريف الرسمي لتسقيف العربيه
جرب بس تفول تاني من بنزينه تانيه بعد مالبنزين اللي معاك يخلص
ولو لسه الصوت زي ماهو روح لاي ميكانيكي وقوله العربيه بتسقف