صوت طقطقة في السيراتو :(((((

[ahmedamir78]

السلام عليكم جميعاً وكل عام وانتم بخير بمناسبة عيد الأضحى المبارك

أنا اشتريت سيراتو ex زيرو موديل 2011 منذ أسبوعين، وعامل بيها لحد دلوقتي حوالي 500 كيلو، المهم بأه امبارح كان أول مرة تقريباً يركب فيها معايا أوزان كبيرة ، أربع أشخاص منهم ثلاثة وزن كبير، وبدأت ألاحظ صوت طقطقة كده غريبة أو حاجة بتعمل جررررررر، وأعتقد لما أهدي السرعة، وبعدين جيت اناهرده بعد ما ركنت السيارة وكنت لوحدي مافيش حد معايا ، وانا نازل منها سمعت صوت طقطقة في العجلة الخلفية شمال، رحت نزلت واعدت أضغط على الشنطة من فوق لتحت عشان أشوف المساعدين أو حاجة ولكن الصوت لم يظهر،
ولما جربت إني أزق من الجانب الخلفي عند العجلة الخلفية شمال إلى الناحية اليمنى( يعني بزق بالجنب) سمعت صوت طقطقة من جوة الجنط !!!! ( العربية جنوط مش طاسات)
المهم انا الصوت ده محيرني جدا ومش قادر أحدد بظبط هل هو نفس الصوت اللي باسمعه لما كنت ماشي ومركب أوزان ولا لأ؟؟

أنا صبرت نفسي وقلت يمكن المساعدين لسة بيطبعوا وعشان أول مرة اوزان وكده يعني، وقلت كده كده في صيانة الألف هقولهم عليها، ولكن أرجوكم انا عاوز أطمئن، لو حد عنده إجابة أكيده يا ريت يفيدني

آسف على الإطالة بس انا باحب أشرح بالتفصيل، وشكراً جزيلاً

[ابو ليلى]

وعليكم السلام ورحمة الله وبركاته

الف مليون مبروك ويارب يبارك فيها ويحفظها من كل سوء
صعب ممكن نحدد المشكلة من الوصف ده ...والاحسن طبعا تروح التوكيل مباشرا من غير انتظار
لموعد الصيانة وتقريبا عقبال الاجازة ما تخلص هتكون جبت الالف وتروح تعمل الصيانة
مبدائيا بدل العجلة اللى بيجى من ناحيتها الصوت بالعجلة المقابلة ليها ...وشوف النتيجة

[ahmedamir78]

الله يبارك فيك وشكراً جزيلاً على الدعوات الحلوة دي، وهو تقريبا زي ما بتقول كده على بال ما أجازة العيد تخلص أكون كملت الألف كيلو إن شاء الله :))

[SAMEH_FOUAD]

روح التوكيل فى صيانة الالف وخليهم يربطوا العفشة كويس وهات الناس اللى ركبت معاك دول تانى عشان تجرب عليهم ههههههههه , عشان تتأكد ان المشكلة ان شاء الله راحت

وخير ان شاء الله

[weekend]

الف مبروك ربنا يبارك لك فيها .. ان شاء الله تطلع بس تربيط عفشة و طبعا كلنا هنا اتفقنا ان احنا نعالج اى اصوات بتطلع فى العربية بإنك تعلى الكاسيت :)) السيراتو بتطلع اصوات من كل ناحية اصلا :))

[aaet1]

ياباشا لو شاكك ان صوت الطقطقة ده من العجلة ما تستناش ولا ثانية وتطلع على الوكيل .... انا مش عاوز اقلقك بس المرتين اللى سمعت فيها عن موضوع زى ده والاتنين كسلوا برضه فى الكشف ما حصلش خير ... ربنا يسترها معاك اطلع اكشف احسن يكون فيه مشكلة فى المقصات

[ahmedamir78]

والله يا جماعة من يومها والصوت لم يتكرر تاني، فأعتقد كده والله أعلم إن الصوت ده كان نتيجة أن أول مرة العربية تاخد أوزان فالمساعدين وباقي الأجزاء بدأت تاخد مكانها .
ولكن أكيد برضه في صيانة الألف هقولهم عليها، وأشكركم جداً على تفاعلكم وإجاباتكم

[احمد المصرى]

جرب انك تنزل فرامل اليد وزق العربيه ذى ما بتقول لو مسمعتش الصوت يبق غالبا ممكن يكون من التيل الخلفى بس جرب مش هتخسر حاجه

[ahmedsrs]

مبروك على العربية ومتحكمش على العربية قبل الخمسة الاف عشان لسة العربية بطبع