بيكانتو للمدام : خليجى و لا توكيل ؟!

[mgboss]

السلام عليكم يا شباب,

دلوقتى المدام محتاجه عربية مشاوير فى التجمع و كده - المهم شفنا البيكانتو هتقضى الغرض ...

المهم بقى ان التوكيل منزل منها الاتوماتيك موديل فاضى (تكيف + 2 زجاج كهرباء) و موديل اغلى بالف جنيه تقريبا و اذيد بالسنتر لوك - المفاجئه الجميله ان المرايات مانوال و شالو الريموت و الكاسيت بتاخدو بعديها بفتره - حاجه قلة ادب فعلا ..

اما الخليجى ففيها كل حاجه و نفس الثمن و ارخص - بس المشكله ان مفيش ضمان و مع نفسك ...

السؤال بقى هل التوكيل بيعمل الصيانات الدوريه للعربيه بمقابل زى العربيات بتاعته ولا لاء - انا سمعت كلام انى بدفع مبلغ عشان العربيه تدخل التوكيل بس ملهومش دعوه بعيوب الصناعه ---

للى معاه او معاها الخليجى - يا ريت بس تفيدونى و تدلونى بتعملوا ايه ؟؟

[mody3on]

خليك في التوكيل احسن , انت هتدفع مبلغ مش قليل ولازم تكون ضامن العربية , بس انا شايف انه حرام تدفع مبلغ عالي على بيكانتو

[geddo]

أخي الكريم
سيبك من حاجة اسمها عيوب صناعة والكلام الفاضي دا
ربنا يكرمك
بس بلاش التوكيل علشان غالي أكتر بكتير عالفاضي ..... والعربية غالية أصلاً


خد الموضوع دا ... http://www.nilemotors.net/Nile/289313-2012.html .... أنا معايا الخليجي ب 86500 وكمان مش عاجباني .......... بس على فكرة .......... كون السيارة للمدام يعني ممكن تتخبط وتتكسر كتير ............ خدلك فكرة عن أسعار قطع غيار البيكانتو 2012 .............
أعتقد فيه كتيييييييييييييييير في نفس الفئة السعرية وأكثر اعتمادية وسيبك من الكماليات التي لا تؤثر على اعتمادية السيارة

[ابو ليلى]

السلام عليكم يا شباب,


السؤال بقى هل التوكيل بيعمل الصيانات الدوريه للعربيه بمقابل زى العربيات بتاعته ولا لاء - انا سمعت كلام انى بدفع مبلغ عشان العربيه تدخل التوكيل بس ملهومش دعوه بعيوب الصناعه ---

للى معاه او معاها الخليجى - يا ريت بس تفيدونى و تدلونى بتعملوا ايه ؟؟

التوكيل بيعمل الصيانات الدورية حتى والعربية خليجى ولكن بزيادة بسيطة على المصنعية
من فترة كنت المفروض بتدفع 4000 ح لو العربية خليجى علشان تدخل تعمل صيانتك
فى التوكيل ( بدون شراء ضمان ) وطبعا الفكرة كانت فاشلة وحاليا بدون مقابل

الخليجى ممكن تشترى ضمان لمدة سنة او اتنين او تلاتة على حسب رغبتك
بيكون ضمان ضد عيوب الصناعة ( السنة ما بين 900 الى 1100 ج) على
حسب الشركة واغلبهم بيكون موجود فى المعرض او تابع ليه .
وبيكون متعاقد مع مراكز خدمة وفى منهم حاليا متعاقد مع مراكز خدمة معتمدة من التوكيل نفسه
ولو حصل عيب صناعة فى العربية بيتم التغير على حسابهم .

مشكلة الخليجى حاليا انه بقى فى لعب كتير من التجار ممكن يغير كاوتش او كاسيت
او حتى بطارية بحاجات اقل فى المستوى علشان يطلع باى فلوس لان الخليجى معروف
لايوجد مواصفات ثابتة ....حاجه كده زى لعبة البازل وحضرتك بتجمع المواصفات اللى عايزها .

اتمنى اكون افادتك واى سؤال انا معاك

[2CODE]

طيب ما تشوف السبارك ؟ زيها برضه لكن اعتقد شيفرولية التوكيل هناك مش هيشيل الحاجات دي وارخص من البيكانتو

[الغزالى]

حضرتك استاذ محمد كنت كلمتنى قبل كده تمام ... ولا تشابه

[Medo.Malek]

ممكن تفكر فى البكانتو المستعمل ( كسر الزيرو 2010 و 2011 ) بتكون ارخص كتير من الزيرو و اعتقد هاتلاقى كماليات فيها اكيد اعلى من اللى موجود دلوقتى
و الله اعلم ..

[Rsarabia]

حضرتك شوف التقرير بتاع البيكانتو الجديدة فيه حاجات كتير جدا سلبية عن العربية و سعرها غالى جدا على امكانياتها و حجمها و موتورها
تقريبا كان صاحب الموضوع كاتب انه غير مقص و مساعد عشان كل مطب و ان الاتنين فوانيس ال led ب 11 الف :)

[baby_koko]

عزيزي الاستاذ،

انا بقالي أكتر من شهر بلف ورا العربية البيكانتو 2012.
الخلاصة أن الخليجي احسن واحسن واحسن.... من الوكيل، لأنك ببساطة مقابل الفلوس فيه جودة ومميزات.
موضوع الضمان، كل الناس بتشتري خليجي وكل الناس بتشتري ضمان من شركة زي تريبل ايه وهكذا.
بالنسبة لجودة العربية، فهي لحد معلوماتي الي بقالي شهر بجمعاها عنها أنه سيارة فوق الممتازة إلى انها مش عائلية، يعني مينفعش زوجة وأولاد، أخرك مراتك وشكرا.
العربية شبابية من الدرجة الأولي، والرفاهية فيها وخصوصا الخليجي فظيعة، أنا شخصيا مستني 2013 تنزل لو لقيت فيها مواصفة خليجي ب 84 ألف، علطول هاشتريها وانا مغمد، مع العلم اني متزوج وليس لدي أطفال.

[S O P H O S]

الخليجي
مجرد راي فسيارات اخري

[HISHAM80]

هو الحاجه الغريبه الخليجي ده منين يعني أنا في السعوديه مفتكرش مره ان شوفت عربيه بيكانتوفي الشارع

[2CODE]

هو الحاجه الغريبه الخليجي ده منين يعني أنا في السعوديه مفتكرش مره ان شوفت عربيه بيكانتوفي الشارع

يا هشام الخليجي ده اشكال والوان انا قبل ما اشتري الريو 2012 هاي لاين من التوكيل شوفت اكتر من مليون مواصفات مختلفة للريو خليجي يعني من الاخر كده الخليجي ده بالتفصيل يعني تتفصل على طلباك تفضل تدور في الخليجي لغاية ما تلاقي مواصفاتك لانها مواصفات بتتغير من بلد للتانية خليجي

[Dr.A.Nabil]

مراتي معاها بيكانتو خليجي 2012 اوتوماتيك
احسن من التوكيل بكثير وكماليات اكثر بكثير
جنوت سبور طاره مالتي فانكشن بلوتوث ايرباج و ريموت ومفتاح سلاح وحاجات تانيه كثير
واحنا اشترينا ضمان من شركة تريبل ايه الناس بتشكر فيها

لسه ماجربناش الصيانه

وكنا في نفس الحيره بتاعتك دي

صللي استخاره وتوكل على الله