اشترى كيا سول خليجى ولا وكيل ؟؟؟؟؟؟؟؟؟

[AMRTOTI]

يا جماعة انا ان شاء الله ناويت اشترى كيا سول بس مش عارف اشترى الخليجى ولا المصرى
الناس مخوفانى من موضوع الضمان ده بس بصراحة الاوبشنز الى فيها جامدة جدا ياريت حد يفيدنى ولو حد معاه الخليجى يقولى بيصينها فين وممكن ندخلها الضمان ولا لا ؟

[ابو ليلى]

هو ايه الفرق ؟

[AMRTOTI]

الفرق كبير جدا الهاى لاين خليجى فيها بصمة وجنوط 18 والسماعات الوان وتكييف تاتش وارخص فى السعر
الوكيل مفيهوش كل ده بس فيه ضمان

[Land_Cruiser]

موضوع محير فعلا لان الكماليات بتاعه العربيه دى بالذات فرق السماء و الارض بينها و بين بتاعه الوكيل و فيها حتى اختلافات بين الاردنى عن الخليجى و ان كانوا بيقولوا على الاردنى خليجى برضه بس انا وجهه نظرى الوكيل اضمن برضه علشان لو لا قدر الله حصل فيها مشكله كبيره فى الموتور و لا الفتيس هتعرف تشتكى فى التوكيل و لو حتى رفعت قضيه و جبت بتوع حمايه حقوق المستهلك و يمكن دى اهم ميزه لكن فى الخليجى هتبقى مع نفسك كأنك بعت الضمان و اشتريت به فرق الكماليات و انا عارف انهم بيقولوا فى شركات بتبيع ضمان على الخليجى لكن عمره ما هيكون زى بتاع الوكيل (اذا كان الوكيل بتاع اى عربيه ساعات هو نفسه بيستهبل فما بالك من شركه بتبيع لك ضمان؟) الموضوع يقلق و محتاج تفكير

[Ahmed R08]

انا معايا الخليجى والحمد لله مفيهاش مشاكل وبعمل الصيانه فى اى مركز معتمد وفى شركات بتبيع ضمان لو عايز بس انا مشترتش ضمان ..
وفضلت الخليجى فعلا عشان الاوبشنز وفرق السعر والبعد عن زل التوكيل ورهبه وخوف الخروج من الضمان لاى شغل تعمله فى العربيه

[ابو ليلى]

ليا صديق لسه شارى سول وكيل الفئة التانية
جنط 16 - ايرباج - فاتحة سقف - سينسور - ايموبلايزر - كرسى كهربا - ملتى
السعر الرسمى كان وقتها 130 خلصناها ب 127500 بدون abs
كان ليا تجربة سيئة فى سيراتو خليجى ( نادرة ) بس حصلت معايا
من وقتها بنصح بالوكيل .
الفروق اللى حضرتك قلت عليها مش مؤثر ماعدا ال abs
احسن جنط للكيا عموما 16 ال 18 حتحس انها ناشفة جدا
بالنسبة للخليجى زى ما الزميل الفاضل قال فى شركات بتبيع ضمان ضد عيوب الصناعة
السنة تقريبا ما بين 850 الى 1100 ج على حسب الشركة
وفى منهم متعاقدين مع مراكز صيانة معتمدة من الوكيل نفسه ولكن المشكلة فى قطعة الغيار
نفسها اللى هتتبدل متعرفش اذا كانت مستعملة ولا اصلية ...كل اللى ليك ان العربية تتصلح .
معاك الاختيارين واى سؤال تحت امرك .

[zangry]

اشتري نفسك وهات الوكيل وريح دماغك

[2CODE]

وكيل ومتكررش غلطات الناس في الريو الخليجي خليك في المضمون واشترى التوكيل

[AMRTOTI]

لسه ايه الى حصل فى الريو الخليجى يا ريت تقولى لانى لسة بختار بين الريو الخليجى والسول
خاصة الاردنى ياريت التوضيح

[اسلام درويش]

توكل على الله وسمى كدة واختار الخليجى كمالياته اكثر واصلية ومواصفاته اعلى من التوكيل وارخص فى السعر نظيرلا ضمان وعلى فكرة الضمان مش حينفعك غير لو لا قدر الله العربية فيها عيوب صناعه ودة بيبقى احتمال واحد فى العشرة الاف

[abogharib]

انا من رايى تجيب الوكيل علشان الخليجى الكماليات اللى فيه مش هتبقى فرقه اوى معاك سماعات و جنوط دى حاجات ممكن انت تركبها بس التوكيل اغلى علشان ضمان و اهم حاجه الضمان لو العربيه كان فيها حاجه لكن الواحد ميجريش ورا اوبشن و يسيب ضمان

[medo_sirion]

انا اعترض معاك الفكرة مش فكرة جنوط وسماعات الفكرة فكرة تقفيل السيارة مختلف من الاسفل انظمة الامان مش موجودة تماما فى الوكيل

من ملاك السيارة خليجى