الحمد لله..إستلمت سيراتو 2012 امبارح...وعملتها مالك أول

[Tito_ss]

أنا الحمد لله امبارح استلمت سيراتو 2012 ...والعربية بسم الله ما شاء الله زي الفل...وده كان عن تجربة قبل كده...مش عشان العربية جديدة....المشكلة مش في العربية...المشكلة في شوارعنا انها مش محترمة...وبالرغم من كل المشاركات والتقارير اللي قرأتها من الأعضاء هنا وفي منتديات أخرى... أنا متأكد انها مشكلة الطرق مش أكثر ولا أقل...أنا شخصيا مقيم في السعودية في الخبر والشوارع هنا 90% منها مطابقة للمواصفات العالمية...وجرب امشي واجري لو عايز...العربية لقيتها على 120 و الار بي ام موصلش 3...(وده عادي جدا على فكرة) لأن الشارع نفسه انت مش حاسس بيه ...لدرجة انك ممكن تسرح وتحس انك مش سايق...وبالنسبة لموضوع العفشة انا عربيتي اللي لسه بايعها كانت هيونداي جالوبر جيب 4×4 3000 سي سي...ودي عفشتها فعلا قطمت ضهري...زيها زي أي جيب(أيا كان النوع)...وبالتالي دي تعتبر بالنسبالي مريحة جدااااااااااااا....وانا ركبت الانترا 2012 كتير والعربية جميله فعلا...وبرده عشان الطرق بتساعد...بس السيراتو اللي جبتها سعرها 56000 ريال وتاني درجة هاي لاين...ولو حبيت أجيب الانترا فيها نص المواصفات اللي معايا دلوقتي سعرها 64000 ريال... يعني الفرق 8000 ريال ومواصفات اقل... وهي هي نفس العربية (عن تجربة) ......وده بسبب الشكل الجديد مش اكتر...يعني لو انتظرت اجيب الشكل الجديد للسيراتو حتزيد من 6000 الى 8000 ريال...المهم توكلت على الله وجبت الشكل الحالي بمواصفات محترمة (وحاجتها الاصليه اللي جايه بيها من بلدها)...والتوكيل هنا مش زي مصر خالص....انت هنا بستلم العربية من اول شنطة الاسعافات الأولية والمثلث العاكس الى كابل الايبود والايفون اللي جاي من كوريا...(وعلى فكرة لاحظت ان كيس كابل الايبود عليه شعار كيا وهيونداي)... وعليها كمان طقم دواسات أصلي من كيا...ده غير كوبونات هدايا خصم الى 50% للتظليل العازل الحراري وحماية السيارة من الشمس والرمال في 3 توكيلات أمريكية مختلفة بيتعامل معاهم التوكيل.

فالمشكلة ان العالم بيتطور من حوالينا وبيخترعوا عربيات جديدة بس محدش فيهم مشي في الشوارع المصرية وجربها عشان يتأكد ان احنا لازم نفضل نركب بيجو 504 أو فيات 132 عشان تتحمل العناء الشاق للمدقات المصرية اللي هما فاكرنها شوارع....ده بقى بالاضافة الى اني اكتشفت ان العربية اللي داخلة مصر- سواء وكيل أو استيراد خليجي- بيتحلقلها زيروووووو...كل اللي فيها بيتشال...

اللي بيحصل ان التوكيل بيطلب العربية بأقل درجة من كل الفئات من الموزع الاقليمي....والموزع يبعت الطلب عالشركة الام في كوريا (مواصفات شرق أوسط...مش مواصفا خليجي عشان في فرق) توصل العبارة بالسيارات يقوم التوكيل مستلمها وتدخل تتظبط صح بقه......يغير الكاوتش الاصلي اللي جاي فيها بأي نوع تاني...يشيل الجوانات بتاعت العزل اللي في الابواب عشان الجمارك...وغيره وغيره...المهم العربية تدخل عالجمارك بأقل فئة... وبعد كده يكمل النواقص جوه البلد...كاسيت سي دي كينوود أو أي نوع تاني مش هتفرق...فرش جلد من قسم الصيانة...وهكذا...وده في كل التوكيلات حتى تويوتا (عشان المعقدين ياباني وبيقولو مفيش زيه ) كله زي بعضه....دي ظروف بلد بحالها...وبرضه المستوردين للخليجي نفس الموضوع...والناس تدفع في عربية فوق 120 الف وبرده تاخدها فاضية...

الخلاصة ان كيا او هيونداي او اي شركة كوري لا تتوقع منها ما تتوقعه من مرسيدس او بي ام دبليو او اي شركة المانية اخرى...وده في رايي انه حرام تقارن عربية ب 130 الف بعربية ب 300 الف (لو الاتنين زيرو دي اسعارهم)...أما بقه لو شايف ان الـ 130 الف يجيبو الماني فده مستعمل وايا كان حالته هيحتاج مصاريف الجديد بيغنيك عنها عالأقل 3 او 4 سنين...ده غير بقه الشوارع نفسها انك تروح مشوار وترجع بدون حكة واحدة في العربية تبقى معجزة وما بتصدق تدخلها الجراج...

وربنه يسترها علينا...

وشكراااااااً

[mazher_m]

ما شاء الله لا قوة الابالله
اولا مبروك عليك العربيه ربنا يباركلك فيها
ثانيا الله يسامحك يا عم لازم تقلب علينا المواجع ماحنا قاعدين وساكتين

[S O P H O S]

الف مبروك يا باشا
ربنا يباركلك فيها ..

[chicobon]

الف مبروك

[ابو ليلى]

الف مبروك ويارب يبارك فيها
كلامك يحترم واغلبه فعلا مظبوط

[Tito_ss]

الله يبارك فيكو يا جماعة ومتشكر ليكو جدااااااااا...
وعايز أضيف اني على قد سعادتي بالعربية على قد ما انا حزين ان البلد وصلت للدرجة دي من المصالح اللي بتبقى على حسابنا في حاجات كتيير...
بالقانون بتدفع دم قلبك وشقى عمرك... وبنفس القانون مش بتاخد حقك
لينا ربنه سبحانه وتعالى الذي لا يغفل ولا ينام

[Android]

الف مبروك العربية وربنا يملهالك بركة ويكفيك شرها
وفعلا كلامك مظبوط وده الواقع الى الناس هنا متقبلاه وبقي ده الاصل والعادي عندنا
انما لو عربية نزلت زي ما حضرتك استلمت عربيتك كده بالحاجات الى فيها دي ممكن الواحد يتهبل من الفرحه ويدبح عجل ويصلى ركعتين شكر كمان

ربنا يهدينا ويصلح حالنا ونتقي ربنا بقى

[Tito_ss]

ربنا سبحانه وتعالى يهدينا ونتقي ربنه فعلا لأن العيب مش في التوكيلات وتجار السيارات بس...
إحقاقاً للحق العيب فينا احنا كمان لأن دلوقتي بقى في حاجة غريبة اسمها فوبيا الشكل الجديد

يعني أي عربية يتغير شكلها وينزل منها موديل جديد أو لو حتى نوع بينزل لأول مرة في السوق المصري الناس بتجري عليه بطريقة غريبة جداااااااً...بعكس المنطق اللي بيقول انه موديل جديد ولسه تحت التجربة...وكمان تلاقي ناس بتدفع سعر أعلى من سعر العربية (وبيبقى عارف انه بره سعر العربية) لمجرد انه يلحق يستلم قبل معاده...طيب ليه؟؟؟ منطقيا انت قبل ما بتشتري موبايل حتى لازم تكون شفته مع حد او حتى عالنت وعرفت تفاصيله ونقاط ضعفه وقوته عشان تقرر تشتريه أو لأ...و احنا كنا كده فعلا...في أواخر التسعينات لما نزل الكوري السوق المصري كانت هيونداي اكسيل ودايو لانوس i ...كنا بنركب ساعتها 504 و132 ومرسيدس 200 وكان سوقها قوي(بالرغم من انها موديل سبعينات وثمانينات)...أنا حتى فاكر سعر الاكسيل جديدة كانت 35000 جنية كاملة...وكانت الناس خايفة منها وبيقولو عربية ورق وسعر إعادة بيع مفيش...لدرجة ان جت فترة واحد صحبي اشترى اكسيل موديل 99 بـ 17000 جنيه وحلوة جداااا...ووالدي كان بيشتري في نفس الفترة فيات 132 موديل 80 بـ 20000 جنيه...واحدة واحدة الناس اتجهت للجديد...وبقى كل ما ينزل موديل جديد يحصل عليه سباق أقوى من الرالي...العربية متبقاش وصلت التوكيل وبتلاقيها في الشارع...وده بيبقى استيراد خليجي بأوفر برايس طبعا عشان يبقى من أوائل الناس اللي ركبو العربية في البلد...طيب لو العربية فيها حاجة؟؟؟...طيب الصيانة؟؟؟ هوا كده...
حصل موقف في السعودية من كام سنة كده توكيل تويوتا رفع سعر السيارات بشكل مبالغ فيه ورفع فوائد التقسيط برده...الناس عملو حملة مقاطعة عالنت وفي الشوارع وسموها (خلوها تصدي) ...وبعد فترة من الركود وعبارات السيارات اللي عماله توصل في الجمارك والتوكيل يدفع عليها أرضيات ومش بتتباع الا بنسب ضئيلة جدا...استجاب التوكيل وخفض السعر غصب عنه تفاديا للخسارة...ومرة تانية في أوروبا من فترة ارتفعت أسعار اللحوم...والناس عملت مقاطعة لحد ما السوق امتلأ عن آخره واصبح مهدد بانتهاء الصلاحية ...عادت أسعار اللحوم - ومنتجات أخرى - أرخص مما كانت عليه...

التاجر عليه مسئولية...واحنا كمان علينا مسئولية...احنا اللي بندي الفرصة دي للتجار انهم يعملو فينا اكتر من كده والشارع خير دليل...

ويااااااارب تصلح حال بلدنا وعقولنا بقى

[dobe66]

واللة يا باشا ربنا يباركلك وكلامك مظبوط مية فى المية
ويا رب نتغير

[Hosam_Optrawy]

الف مبروك ربنا يباركلك فيها

[maaatrixxx]

مبروك وربنا يبارك

[me5222222]

الف مبروك وفعلا ان الله لا يغير ما بقوم حتي يغيروا ما بأنفسهم
ربنا يرزقك خيرها ويكفيك شرها

[chicobon]

الف مبروك للعربيه