تدخل على كيا بيشتمو فيها...تدخل على هيونداي بيشتمو فيها...تخل على جيتا بيشتموا فيها ت

[Tito_ss]

أنا عايز أعرف ليه تدخل على منتدى كيا تلاقي الناس بتشتكي منها...تقول هيونداي كويسه...تلاقيهم برده بيشتموا فيها...طيب يبقى اشوف الياباني...أبص على تويوتا نفس الكلام....طيب يبقى هوا الألماني ....اروح ابص على جيتا الاقي الناس مخنوقه من المشاكل اللي في الفتيس DSI وقطع الغيار اللي اسعارها نااااااااااااااااااااااار....يبقى خلاص بقى مفيش غبر مرسيدس ...أشوف مرسيدس ألاقي الناس مبسوطة وزي الفل بس بيقولك غير الفانوس ب 27000 الف جنيه ...طب اييييييييييييييييييييه؟؟؟؟؟؟؟؟؟؟

هوا العيب فينا؟ يعني احنا شعب مش بيعجبنا حاجة مثلا ؟؟؟ ولا احنا ركبنا عربيات الدنيا كلها وعمالين ننتقد في العربيات اللي عندنا ومش عاجبانا؟؟؟ ولا احنا بنفتي لدرجة انك بقيت تسأل اي حد عن أي حاجة تلاقي الرد وكأن كلمة معرفش دي اتلغت من قاموسنا اللغوي؟؟؟ الله أعلم

[yasserelsayad]

كل واحد بينام على الجنب اللى يريحوا
شوف انت هتحتاج ايه من العربية وامكنياتك ايه واكتر عربية تحس
انها بتحققلك المعادلة دى ركز عليها وجربها
وان شاء الله اللى فيه الخير يقدمه ربنا

[Eng_Doaa]

فعلا . حاجة تزهق . مفيش حماية للمستهلك .

[HAITHAM1985]

هندننا فى الموال الأسود ده والمقارنات الغير منصفة بين الكورى واليابانى والأوروبى ........ ونسيين حاجة مهمة جداااااااااااااااااااا وهى ..........

إن إحنا كلنا مضحوووووووووووك علينا لأن إحنا بندفع ألاف مؤلفة فى عربيات زايدة عن قيمتها السعرية وكذلك الهندسية على الٌأقل الضعف

وبعدين تعالى هنا إنت وهوا ........ إحنا عايزين عربيات خرسانة مبتعطلش عربيات صب يعنى ولا إيه !!!!!!!!

أى ماكينة لابد لها من أعطال وهذه الأعطال لابد وأن توصف توصيفا صحيحا لكى تتبعها خطوة إختيار العلاج إما بالتصليح أو التغيير ....... ده العقل اللى بيقول كده ........ بس إحنا فى المحروسة فهلونجية ميكانيكية سمكرية عفشجية بوهيجيه أى حد بينتهى إسمه بــ ..... يه كلهم بطيخ وكنافة بالجنزبيل إلا من رحم الله وهم قله ........ عك ولفق ودور العربية ......... دارت الحمد لله وتكع يا معلم ........ وبعدين تكتشف إنه لا صلح ولا نيل دا هبب الدنيا وبوظ حاجات تانية غير اللى كانت موجوده

الخلاصة كلنا إتنصب علينا بس بما لا يخالف شرع الله فكل واحد مننا يحط " ......... " القديمة ويرضى بقضاء الله وقدره ويحمد ربنا إنها بتيجى على قد كده

إنتوا فاكريييييين إن دى عربيات ....... ههههههههه ........ إلنترا 2012 - سيراتو 2012 - سيفيك - فانتازيا - كورولا وغيرها ........... لاااااااااااااااااااا ........ لما دى عربيات يبقى الأستون مارتن - البنتلى - الأودى - الفولفوهات الجديدة s-60-80 ودى عربيات بيسموها reasonably price cars أو road cars مجبتش سيرة الفيرارى أو البورش أو العتولاه التانييين البوجاتى أو غيرها ...... تبقى دى إيه مركبات فضاء أكيييييييييييد

تعايش مع الوضع القائم وإبحث عما يناسبك فقط حتى لو تحالفت الدنيا كلها ضدك وثق تماما أن الثواب على قدر المشقة وإحنا بيطلع عنييييين أبونا فبإذن الله بدون مقاطعة مصيرنا الجنة ....... طبعا ده فى الحلم بسبب مقدارعدم الرضا اللى عندنا كلنا

سبحانك اللهم وبحمدك أشهد أن لا إله إلا أنت أستغفرك وأتوب إليك

ومفيش سلام عليكم " بهزر طبعا " ........ تحياتى وبالتوفيق والسلام عليكم

[Tito_ss]

يا باشا انا مش بقارن بينهم...وعلى قكرة انا لسه شاري سيراتو 2012 الشهر اللي فات...والعربية حلوة جدا...أنا بستغرب ان كل الناس مش عاجبها عربياتها...وبعدين هوا في حد يشتري عربية فوق 160 الف وعمال يطلع فيها عيوب وفي كل الأنواع اللي في السوق كده؟

[2CODE]

ياعم والله انا معايا الريو الجديدة وزي الفل والحمد لله العربية فوق الممتازة لكن طبعاً زي ما انت عارف اي خط انتاج ممكن يكون فيه مشاكل فردية تحصل مش معني كده ان كل العربيات بايظة او الشركة دي سيئة

بس ارجع واقول اننا مفزلكين شويه على كل العربيات يعني واحد عايز موتور في باله مع مواصفات في باله ويدفع 90 الف بس طيب هو انت رايح تشتري بدله تفصيل ؟ هتعمل البنطلون طويل والجاكيت قصير ؟ والله العيب فينا

علشان كده وانت بتختار عربية تشوف مميزاتها وعيوابها وتعرفهم والله انت شايف ان مميزاتها اكتر خلاص على بركه الله لكن مش هتبقي عربية احلامك يعني اللي بتطلع تجري في كل احلامك وانت نايم

إنتوا فاكريييييين إن دى عربيات ....... ههههههههه ........ إلنترا 2012 - سيراتو 2012 - سيفيك - فانتازيا - كورولا وغيرها ........... لاااااااااااااااااااا ........ لما دى عربيات يبقى الأستون مارتن - البنتلى - الأودى - الفولفوهات الجديدة s-60-80 ودى عربيات بيسموها reasonably price cars أو road cars مجبتش سيرة الفيرارى أو البورش أو العتولاه التانييين البوجاتى أو غيرها ...... تبقى دى إيه مركبات فضاء أكيييييييييييد

ياهيثم العتاوله دول لو نزلوا مصر هيكسروا نصفين من اول مطب هياخدوه العربيات دي مش مخصصه للطرق الداخلية للمدينة نظراً لسرعتها ومشاكل الطريق ودي عايزه طرق سريعة طويله طول

نهاية الكلام : احنا بناخد بمشاكل فردية والمشكلة انك تدخل مثلاً في موضوع واحد عنده مشكلة في عربيته محدش عنده نفس المشكلة دي تلاقيه بيقول العربيات دي كلها وحشه واللي ينرفزك اكتر تلاقي واحد معندوش العربية دي اساساً ويدخل يقول لك اه العربية دي معفنه دي مشاكلها كتير طيب انت عندك العربية دي اساساً ولاهي يعني لقينا فرح فدخلناه ؟

[ahmedteam]

كل واحد بينام على الجنب اللى يريحوا
شوف انت هتحتاج ايه من العربية وامكنياتك ايه واكتر عربية تحس
انها بتحققلك المعادلة دى ركز عليها وجربها
وان شاء الله اللى فيه الخير يقدمه ربنا

+11111111111111111

مفيش حاجه كامله الكمال لله وحده

اهم حاجه ان العيوب بتاعه العربيه تكون مش اساسيه وتقدر تتعامل معاها

[lenovo]

* * * * * * * * * *

[Mohamed.Ramah]

انا عاوز اوضحلك انك تطرح السؤال وتقراء دائما وتبحث عن المشاركات وتقرا اكثر من مشاركة لان مش حتلاقى اجماعى من كل الناس على شىء واحد ودة سبب ان فى انتقادات شديدة واخرى موضوعية او ليها هدف وبتفيد فعلا فى كل الاقسام بالنسبة لموضوع الفتيس وال dsg دة مشكلة وايضا مشكلة اكبر فعلا ان التوكيلات بتحلها بعد دفع مبلغ مش قليل خاصة ان المشكلة مازالت قائمة والحل انك تسنى الموديلات الجديدة وتشوف من التجارب وتقراء ريفيوهات للسيارة فى الخارج لانها بتنزل قبلنا بسنة على الاقل احنا اخر ناس تقريبا بتنزلها السيارة هههههههه ودة ميزة تكون اتجربت واتعرف عيوبها


وطبعا فى مواضيع ومشاركات بالمنتدى تفوق المليون مشاركة ودة اراء وتقارير تم عملها بناءا على معلومات من على الانترنت او تجارب شخصية مع السيارة فا فى الاول والاخر انت البتحدد تقرا المواضيع ونوعيتها مش العكس بمعنى انك تختار المشاركات ذات الموضوعية والهادفة مش اى كلام مكتوب اصدقة وامشى وراة والتجربة خير دليل وكافة السيارات فى منها الجيد والسىء ودة بيبان من اجماع الكثير على نفس المشكلة يبقى هنا دة مش زم او تصيد اخطاء وخلاص لمجرد اثبات الراى

حتى لو كان خطاء وبكل بساطة احنا لو عاوزين نركب السيارات المرسيدس والاودى فا دة مصنوعة لفئة معينة من المجتمع مش موضوع احنا بينزلنا الزبالة لا كل سيارة بتنزل لفئات وطبقات معينة وكل واحد على حسب قدرتة بيشترى للعلم السيارات دة سعرها غالى فى بلدها مش رخيص بس احنا نيسينا ان احنا بنتعامل بالجنية المصرى الاصبح ملوش مكان وسط باقى العملات يعنى الدولار او الجنية الاسترلينى او الدينار دول بتشترى بيهم اكتر من حاجة مش زى الجنية المصرى بتجيب بية كيس شيبسى يعنى لنفترض انك جبت عربية فيرارى ب 15.000 دينار تفتكر انة بيبقى وهو جايبها عارف انة دفع مبلغ هين فيها او هو حاسبها زى ما بيحسب ال15.000 كجنية مصرى !! اكيد لا

وبالتالى مفيش مقدرة لشراء السيارات الاعلى للكل ودة بسبب اننا عايشين فى بلد كل خيرها اتاخد وبقى فى ايد ناس معينة فدة سبب من الاسباب البيدفعنا لشراء العربيات الملهاش لازمة وبنعمل عليها مقارنات ووجع قلب وهى فى الاول والاخر اقل ما يقال عليها انها اى كلام مقارنة بالسيارات الاوروبية فالحل الواحد لو مش راضى بالعربية ميشتريش لو مش على اقتناع ويسعى دائما للافضل وقتها وميقتنعش غير بالهو نفسة شايفة لان سبب ان 3/4 الشعب راكب

عربيات ملهاش لازمة هو الكلام البيتناقل بدون فهم او وعى وبالتالى سعر السيارات دة ارتفع واصبح فى جشع ومغالاة من اصحاب التوكيلات بسبب السعى الرهيب لتملك سيارة ملهاش لازمة وعليها تخفيض او الاقتناع بكلام واحد كان قاعد بيحكى اى كلام محصلش وافوق على صدمة انى سايق عربية علبة السمنة انشف من صاجها ففى الاخر ربنا يكرمنا جميعا ونقدر نركب ونجيب الاغلى والافضل
دة اصلا لو فاكر انى حستمتع امشى بيها فى الطرق الزبالة الهنا

[tarek_rcc]

* * * * * * * * * *

يا اخى ممنوع وضع روابط لمنتديات أخرى .... مش كدة ولا اية؟؟؟؟

[AHMED1718]

طبيعي جدا لما واحد يعمل بحث عن مشاكل هيلاقى مشاكل
ولما يعمل بحث عن مزايا هيلاقى

ولولا اختلاف الازواق لبارت كل حاجة

يعنى مثلا واحد يعمل موضوع مش يقولك انهو احسن يبانى ولا موزمبيقى لا سؤاله انه احلى لون ف العربية الفلانية
طب يعنى ببقا هعيط وارد اقوله ماهو لو اللون الازرق كان احلى لون مكنوش انتجه غيره

هيا نفس المعادلة