نصيحة لوجه الله لكل من يبحث عن سيراتو 2008

[creative_art]

السلام عليكم ورحمة الله ..

الموضوع وباختصار انى من فتره كنت ببحث عن سيراتو 2008 نضيفه اركبها .. ونتو عارفين عندنا فى اسكندريه مفيش عربيات كتير كويسه .. معظمها واقف فى معارض - أو اكلته البرومه

كعادة اى مشتري من عالانترنت - دخلت كونتاكت ..

العربيه اعلانها كده بالظبط

""

4 اللون اسود فبريكا خوارج ودواخل رخصه سنه

""

دي موديل 2008 اوتوماتيك ماشيه 70 مطلوب فيها 70 الف جنيه !!


إتصلت بصاحب العربيه .. والله الموضوع كذا كذا وانا من اسكندريه و بدور على حاجه نضيفه وهنزلك مخصوص !! ... ودا مش مشوار لاخر الشارع دا سفر خصوصا انى معيش عربيه يعنى بهدله !


وطبعا ع حسب كلامه كل ال فيها " بربريز مشروخ + محتاجه كومبريسور " ... فقط لا غير الباقي كله سليم ..



طيب ياعم نتوكل على الله ... قريت الفاتحه وخدت معايا 10 عربون عشان معطلش الراجل برضه ...


ركبت من اسكندريه ووصلت القاهره .. وطبعا انا معرفش حاجه خالص فى القاهره .. هو خلانى اروح لحد عنده .. قلت وماله ..

بعد انتظار حوالى ساعه ونص فى الشمس .. ابص الاقي عربيه جربانه " اسف فى اللفظ " واقفه وهو جمبها ..

باختصار بقه

العربيه فيها الأتى ..

مسمكرة صدر كامل ( مخالف للاتفاق انها فابريكه م الاكصدام للاكصدام )

راشه كامل وفيه جمب باين انه متسمكر اى كلام ومرشوش رشه زفت ( الاتفاق رشه اجزاء بسيطه )

محتاجه عفشه كامله


دواخل سيئه جدا جدا بنسبة 60%


تابلوه مفكك اى وكأن فيها ايرباج وضرب .. انا عارف الموديل دا مفيهوش ايرباجات

وفكة التابلوه دي خلتني اشك ان العداد اتغير او اتلعب فيه

المصيبه الكبيره وانا بجرب العربيه .. فيه صوت زي جرار طالع من عند الماتور قدام والصوت عالى جدا جدا


قولتله الماتور سليم ياعم الحاج قالى اه وبرقبتي ومش عارف ايه ...

هو صوت زي تروس بتخبط فى بعضها جامد اوى .. انا شاكك انه جيربوكس لأنها اولا مكانتش بتسحب خالص وسحبها معدوم .. ثانيا النقلات مش سلسه ومتحسش انه فتيس ماشي 70 الف خالص


المهم رحت راكن على جمب لأن الاستاذ المحترم الى مش هقول غير ربنا يسامحه كان مستعجل وعنده مشاوير ومش عارف ايه ومش مقدر حتى انى جايله من سفر .. قلتله بص حضرتك انا مش هقولك غير شكرا والعربيه دي تسوي 50 الف بالعافيه او ممكن اقل




الخلاصه ... محدش بيتعلم ببلاش والحمدلله على كل شىء انا مشيت وانا قرفان منه ومحروق دمى جداااا لانى ضارب مشوار مش صغير وكمان جاي على نفسي لانى بتخنق من المواصلات بس قولت معلش لحد ما اجيب عربيه لازم اتعب شوية ....

ياريت ياجماعه لو حد بيدور على سيراتو ex او بيدور على مستعمل فى كونتاكت بالذاااااااااااااات يحذر من العربيه دي لأنى والله كنت هتلسع لسعه مش تمام بالإضافه الى المشوار والتعب ..

[bob12345]

اعتقد انها التاكسي الاصفر

[S O P H O S]

ان شاء الله ربنا يكون كاتبلك
عربية افضل ..

[katoba]

خير ياباشا والنصب وقلة الضمير بقت حاجة عادية .. متزعلش نفسك وزى ماقلت محدش بيتعلم ببلاش ومشكور عالنصيحة

[M.ABDEEN]

معليش يا باشا وخيرها في غيرها وربنا يوفقك في واحدة كويسة بس العربية دي مش منتشرة في اسكندرية فغالبا لو هتلاقي منها هيكون بره اسكندرية

[moha4tec]

ربنا يرزقك بافضل مما كنت محتاج باذن الله

[temo85]

انا حصلى موقف مشابه فى عربيه لانسر ايام ما كنت بدور عشان اشترى و من على كونتاك برضه و روحت شوفتها طلعت 180 درجه على عكس الكلام لا هى فابريكة و لا تساوى 40 الف و ماسك فى 75 الف و يقولى اصل دى لانسر !!! فى عالم فكرة الاسم دى بتجننهم و تخليهم يركبوا عربيات متهانه عشان يقول انا راكب اسم كبير
نفس الموقف واحد جايب توكتافيا 2006 ماشية 217 الف كيلو ب 95 الف بقولوا متجيب حاجه قريبة فى الموديل و كيلو متر قليل عشان تحس انك راكب عربية جديدة و تتمتع بشبابها يقولى انت هتقارن سيراتو ولو عالزيرو بعربيتى !!! قلتله لا طبعا عربيتك احسن و اشتريت دماغى من مهاتارات عقيمة , الله يرحم سكودا ايام الفيليشيا و الفيفورت مكنش فى قطة بتبصلهم فى الشارع :)

[creative_art]

انا حصلى موقف مشابه فى عربيه لانسر ايام ما كنت بدور عشان اشترى و من على كونتاك برضه و روحت شوفتها طلعت 180 درجه على عكس الكلام لا هى فابريكة و لا تساوى 40 الف و ماسك فى 75 الف و يقولى اصل دى لانسر !!! فى عالم فكرة الاسم دى بتجننهم و تخليهم يركبوا عربيات متهانه عشان يقول انا راكب اسم كبير
نفس الموقف واحد جايب توكتافيا 2006 ماشية 217 الف كيلو ب 95 الف بقولوا متجيب حاجه قريبة فى الموديل و كيلو متر قليل عشان تحس انك راكب عربية جديدة و تتمتع بشبابها يقولى انت هتقارن سيراتو ولو عالزيرو بعربيتى !!! قلتله لا طبعا عربيتك احسن و اشتريت دماغى من مهاتارات عقيمة , الله يرحم سكودا ايام الفيليشيا و الفيفورت مكنش فى قطة بتبصلهم فى الشارع :)

ياباشا المثل بيقولك اسد عجوز ... ولا قرد بصحته

بس لما تركب اسد عجوز .. تبقي اساسياته سليمه ..... شاسيه موتور الات جر عفشه - الى اخره .. ممكن تكون محتاجه شوية مصاريف بسيطه فى الصالون مثلا .. تغير كاوتش .. عفشه بالكتير .. انما دى عربيه محتاجه عربيه !!! قسما بالله مافيها جزء سليم وصاحبها وحيات ربنا كداب كدب الأبل ربنا يسامحه حسبي الله ونعم الوكيل ... السعر مغري جدا ان اى حد يروح يشوف العربيه >>> وياسلام لو سعيد الحظ الى هيقع من محافظه اخري ويروح يشوفها .. انا صرفت عالمشوار دا بتاع 200 جنيه من تذكرة قطر لأكل وشرب فى الطريق لتاكسيات جوه البلد ( بتخنق جدا من السفر مواصلات وبقعد اصرف ) والله انا كنت حطيت ال 200 دول فى جامع ولا اديتهم لحد غلبان احسن ماصرفهم على التخلف ده


وعلى فكره انا الى رمانى على الموضوع للأسف انى كنت عايز اركب BMW 5 series بس ملقيتش حاله نضيفه .. قلت اجيب سيراتو شهرين تلاته عا ما الاقي بى ام نضيف .. واهى السيراتو جميله ولما تحب تبيع بتاخد فلوسك ونتا واقف .. يلا بقة النصيب

[bmya]

سبحان الله صحبي بقه كان معه سيراتو 2009 اخر الشكل القديم كامله ستيب ترونيك فتحه سقف بس طاسات مش جنوط كان جايبها زيرو العربيه دي بجد لا يمكننننننننن تلاقي في نضافتها ولا المصاريف اللي كان بيصرفها عليها اولا صانت كلها توكيل ابو رواش تيل فرامل وبوجيهات وفلاتر اخرهم معه 20 الف كيلو ويتغير
عيبه الوحيد انه ماكنش بيطيق يشوف خرابيش في العربيه فكانت رشه بعض الاجزاء من الخارج وبقول بعض يعني مش كلها العربيه من جوه كصالون بجد كانت زيروووووووووووووووووو تركب كده تشم ريحت العربيه وهي جديده كان عاملها فرش جلد تفصيل روعه
دواخل طبعا زيرووووووووووووو موتور ماشاء الله كان بيقفل عدادها بكل سهوله تقفل ازازك تشغل تكيفك تقفل عدادك وماتسمعش اي حاجه بره
المهم انه اجنن في دماغه ورا بايعها باعها ب 80 الف هي كانت ماشيه نوعا ما كانت فوق ال90 بس كلها سفر صحراوي قاره سكندريه وساحل طرق نضيفه يعني
باعها بقه وكان عاوز يجيب اي حاجهالماني في نضافتها طلع عينه وملقاش في الاخر جاب لانوس 1999ههههههههههههههه مستحملش باعها بعدها باسبوع بس كسب فيها
المهم قال خلاص انا هجيب سيراتو تاني (هو بيكره الشيب الجديد كره العمى ) فقرر انه يجيب نفس الموديل اللي كان معه نزل اتفرج شاف حاجات زباله الزباله المزبله وطالبين فيها اسعر غرييييييييبه وبرده كله من كونتاكت يلاقي مكتوب فبريقه وبتاع وينزل يلاقييها خرابه بققى بيضرب نفسه 100 جزمه على انه باع عربيته

[wawamoha]

ياباشا احمد ربنا انه واضحه كده و لا مؤاخذه مالبستش ..
و عموما اللي بيدور عل مستعمل لازم يلف شويه و يستحمل ... يعني عادي
ههههههه

[john55]

سبحان الله صحبي بقه كان معه سيراتو 2009 اخر الشكل القديم كامله ستيب ترونيك فتحه سقف بس طاسات مش جنوط كان جايبها زيرو العربيه دي بجد لا يمكننننننننن تلاقي في نضافتها ولا المصاريف اللي كان بيصرفها عليها اولا صانت كلها توكيل ابو رواش تيل فرامل وبوجيهات وفلاتر اخرهم معه 20 الف كيلو ويتغير
عيبه الوحيد انه ماكنش بيطيق يشوف خرابيش في العربيه فكانت رشه بعض الاجزاء من الخارج وبقول بعض يعني مش كلها العربيه من جوه كصالون بجد كانت زيروووووووووووووووووو تركب كده تشم ريحت العربيه وهي جديده كان عاملها فرش جلد تفصيل روعه
دواخل طبعا زيرووووووووووووو موتور ماشاء الله كان بيقفل عدادها بكل سهوله تقفل ازازك تشغل تكيفك تقفل عدادك وماتسمعش اي حاجه بره
المهم انه اجنن في دماغه ورا بايعها باعها ب 80 الف هي كانت ماشيه نوعا ما كانت فوق ال90 بس كلها سفر صحراوي قاره سكندريه وساحل طرق نضيفه يعني
باعها بقه وكان عاوز يجيب اي حاجهالماني في نضافتها طلع عينه وملقاش في الاخر جاب لانوس 1999ههههههههههههههه مستحملش باعها بعدها باسبوع بس كسب فيها
المهم قال خلاص انا هجيب سيراتو تاني (هو بيكره الشيب الجديد كره العمى ) فقرر انه يجيب نفس الموديل اللي كان معه نزل اتفرج شاف حاجات زباله الزباله المزبله وطالبين فيها اسعر غرييييييييبه وبرده كله من كونتاكت يلاقي مكتوب فبريقه وبتاع وينزل يلاقييها خرابه بققى بيضرب نفسه 100 جزمه على انه باع عربيته

حظوظ

[MECH.ENG Mosta]

الحمد لله انا معايا نفس العربيه اى حد يقولى بايع اقوله انسى


CTRL + Q to Enable/Disable FBPhotoZoom

[MARTINDALE]

ربنا يعينك بس انا مش معاك في انك خسرت .... اي تجربه جديده لا تساوي صفر
انت اتعلمت وعرفت وشوفت وبكرا ربنا هيكرمك بسبب تعبك وخبرتك اللي اكتسبتها , هو الشخص بيتخم ويتنصب عليه ليه ؟؟؟ لان خبرته ومعرفته قليله وانت بالحاجات دي بتزود خبرتك ومعرفتك وبتكون سبب انك تنفع نفسك وتنفع ناس تانيه حواليك من صحابك وقرايبك .

[moha4tec]

معلش محدش بيتعلم بالساهل
لولا اختلاف الازواق لبارت السلع

[fighter]

بعد كده قبل ما تسافر خلي البائع بيعتلك صور العربية علي النت جناب و صدر و شنطه و صالون ولو رفض و قالك معييش كاميرا او مش بعرف ابعت الصور تبقي عربية مشرحة و خسارة فيه مكالمة تليفون تانية حتي