فين كيا السبع ده

[Tmhami]

يا رجاله حد يقولى أروح أزاى السبع الى فى زهراء المعادى
أنا حكون جى من الدائرى من عند التجمع

حاجه أخيره ,كنت عايز أركب باركينج سينسور , ينفع أركب هناك فى السبع ولا لأ

[hanyghazal]

بص يا باشا و انت جى من على الديرى انزل النفق الى يطلع على كرفور و بعد ما تعدى كرفور و الصنية الصغيرة اسل اى حد هيولك بالضبط فين حوالى 1.5 كيلو بالكتيير

[Land_Cruiser]

هو مبنى كيا هو المبنى اللى جنب نيسان على طول و بالنسبه للباركنج سنسور أتكلم و اسأل قبل ما تروح اضمن علشان تتأكد أنهم بيركبوه و كمان علشان تعرف التكلفه لو كانوا بيركبوه . علشان توصل هناك حضرتك قدامك حلين

الحل الأول (أقصر لكن الطريق مكسر و رايح جاى )

هتدخل من نفق كارفور و هتقابلك صينيه صغيره قدام كارفور هتدخل من من اول فتحه و تكمل على طول هتلاقى بنزينه على يمينك تفضل مكمل على طول و هتلاقى العربيات بتدخل يمين هتدخل معاها و بعدين تكمل على طول و فى الاخر هتلاقى فتحه هتنزلك على زهراء المعادى هتطلع منها و تقوم داخل شمال علشان تبقى فى الاتجاه التانى و من هناك هتلاقى لافتات تدلك على الطريق لحد ما توصل

الحل التانى ( اطول بس الطريق كويس):

تكمل فى الدائرى لحد فتحه المعادى و تدخل منها و تطلع الكوبرى اللى هينزلك إلى الاتوستراد فى اتجاه المعادى و تفضل مكمل على طول و بعدين تنزل يمين عند فتحه زهراء المعادى و اول ما تنزل منها تدى اشاره شمال و تلف و ترجع الاتجاه التانى. اللى هو داخل إلى زهراء المعادى هتلاقى نفق صغير عدى منه و بعد كده هتلاقى خير زمان على أيدك اليمين هتفضل ماشى طوالى و بعدها هتلاقى مبنى فودافون و انت برضه ماشى على طول و بعد كده هتلاقى لافتات السبع قدامك هتوديك لحد التوكيل

من رأيي خليك فى الطريق التانى علشان ما تتوهش و كمان علشان مش مكسر و التوكيل عند حاجات كتيره معروفه هناك علشان لو لاى سبب تهت اسأل عن الجامع الكويتى او نادى وأدى دجله او حتى السبع

و دى كمان خريطه للوصول إلى المكان و بالتوفيق
السبع اوتوسيرفس, المعادى, القاهرة, مصر | سيارات - مراكز اصلاح وخدمات ومعدات وموردون | Yellow.com.eg | القطعة 250 - - المنطقة الصناعية - زهراء المعادى

[ابو ليلى]

ولما تروح هناك اسال على بشمهندس شريف مدير المركز وقله انك جى من نايل موتورز

[Tmhami]

ألف شكر ليكم ,أنشاء الله حروح يوم السبت الصبح بس يا رب أعرف أوصل الأول
لو حد عايز يسأل على حاجه هناك يقولى و أنا أسئله

[Land_Cruiser]

ألف شكر ليكم ,أنشاء الله حروح يوم السبت الصبح بس يا رب أعرف أوصل الأول
لو حد عايز يسأل على حاجه هناك يقولى و أنا أسئله

روح من الطريق التانى بتاع الاتوستراد زهراء المعادى اللى وصفتهولك و ان شاء الله مش هتوه

[coolbad]

ألف شكر ليكم ,إن شاء الله حروح يوم السبت الصبح بس يا رب أعرف أوصل الأول
لو حد عايز يسأل على حاجه هناك يقولى و أنا أسئله

انا رايح بكرة إن شاء الله
لو عايز نتقابل و نروح مع بعض

[Tmhami]

Land_Cruiser
ألف شكر لحضرتك أنا دخلت على wikimapia
و مشيت مع وصف حضرتك بتاع الاتوستراد زهراء المعادى لحد مبنى فودافون بس بعد كده بقى أعمل أيه ؟

coolbad
ألف شكر لأهتمامك و لرد حضرتك بس أنا حجزت يوم السبت الساعه 9
(هوا مش لازم حجز ولا أيه؟)

ابو ليلى
خلاص لما أروح حسأل على المهندش شريف و حقوله أنا من طرف ابو ليلى

hanyghazal
ألف شكر لرد حضرتك

[coolbad]

First come first serve
الأولوية لليجي الاول