تقييم لمركز كيا السبع

[Tmhami]

السلام عليكم
يوم السبت الى فات روحت عملت صيانه ال 1000 ل كيا ريو 2013 فى مركز السبع الى فى زهراء المعادى و ده تقييمى للمركز


كلمت 16449 و حجزت معاد يوم السبت الى فات الساعه 9 صباحا
رحت هناك فى الميعاد و قابلت مهندس الأستقبال ( م/ياسر) سمع منى أنا عايز أعمل أيه فى الصيانه و المشاكل الى عندى بس كنت حاسس أنه بيسمع من هنا و بيطنش و أكبر دليل على ده أنه مكتبش أى حاجه من الى قولتها فى ورق الأستلام ( ساعتها قولت مش مشكله ,المهم النتيجه)
روحت الأستراحه و كان فيه تخفيض 15 جنيه على أى مشروب

بعد حوالى ساعه كده لقيت العربيه خلصت و مهندس الورشه بيشيك عليها (م/فاضل)
1-المفروض أنه كان بيشيك على السوائل بس أنا شوفت أنه بيفتح الكبوت و أتأكد أن كل حاجه مقفوله صح بس لا قاس الزيت و لا بص على أى سوائل بس بصراحه هوا جرب العربيه و ساقها

2-قولت أنزل أبص على العربيه لقيت حاجات قولت لمهندس الأستقبال عليها متعملتش
وسألت المهندس فاضل قالى أنه محدش قاله و أنه حيشوفها

3-(ديه بقى أكتر حاجه ضايقتنى)
قولت للمهندس فاضل أن أحيانا لما بمشى فى طريق مكسر بسمع أصوات من قدام
فقالى أصوات دربكه كده ؟ قولتله تقريبا (هى أصوات خفيفه )
راح قالى أن ده طبيعى و موجود فى كل العربيات الكورى و الكيا كلهم كده ,علشان كل الكيا ثباتها وحش جدا و ده بيخليهم ينشفوا المساعدين علشان يحسنوا الثبات شويه
,(حسسنى أنى رميت فلوسى فى الأرض و أنى غلطان أنى جبت كيا أصلن و أن كل الكيا وحشه)

4-أستلمت العربيه علشان أمشى كانوا غاسلنها من بره و ماسحنها من جوه كويس و كمان مسحوا الطابلوه بأسبراى (مع أن الأسبراى لقيته مغرق الزجاج الأمامى و ملطشه بس مش مشكله ,المهم أن العربيه أتغسلت و نضفوها من جوه و من بره و ديه نقطه تحسب لهم)

النتيجه
أنك لو معندكش أى مشاكل فى العربيه ممكن تروح تعمل الصيانه و فخلال ساعه أو أتنين بالكتير حتكون أستلمت و مشيت

بس لو فى أى مشكله حتى لو صغيره منصحش حد يروح هناك

أخر حاجه مدير المركز م/شريف
شخصيه محترمه جدا و متعاونه لأقصى حد

[Tmhami]

برضه حابب أقول أن المهندس ياسر كنت طلبت منه جدول الصيانه و معرفه أسعار تركيب حاجات و رد عليا فيهم

[Mohyeldin1974]

يعنى كده المشكله فى الكيا كعربيه ولا المشكله فى مراتكز الخدمه ولا الاتنين سوا

[Ahmed_Adham]

طب متكتبلنا أسعار الحاجات اللي انت سألت عليها كده للافاده؟

[Tmhami]

بص أنا شايف أن كلام المهندس ده غلط , كمان هوا كان بيتكلم بتناكه شويه
كمان أنا حسيت أنه بيتكلم أى كلام علشان يسكتنى و خلاص

حاجه أخيره أنا على طول بروح eit الى خلف محمد زكى , وأنا شايف أنهم كويسين جدا

بس الى خلانى أروح السبع أنى كنت شارى العربيه من عند السبع و أدولى عقد صيانه مجانى لحد 20000 و فعلن لما روحت مدفعتش حاجه خالص و ده شامل الزيت و الفلتر

[Tmhami]

كنت سألت على الباركينج سينسور و قالولى أن التكلفه الكليه بالتركيب و المصنعيه حوالى 820 جنيه مع العام أن تمنه لوحده من غير تركيب حوالى 450 جنيه

[moha4tec]

مشكور على نقل التجربه

[temo85]

اولا مينفعش التوكيل او اى مركز معتمد يروح للعميل ان الكيا كده او الثبات وحش او العافشه ناشفه او غيره ده غلط تماما حتى لو كان الكلام حقيقى و مظبوط عشان هو كده ببساطه بينقلك طاقة سلبيه و النتيجه انك حسيت انك رميت فلوسك فى الارض
ثانيا التجربه دى أكدت حاجه فى دماغى ان السبع كويس فى الصيانات الدوريه و المشكل المباشرة لكن معندوش استعداد انه يعمل اكتر من كده و يثبت انه ليه فى المشاكل المعقدة و صوت الدربكة ده اصلا كيا نزلتله الحل من فتره و الاستاذ محمد مصطفى بيعمله بنفسه و بسييييييط للغايه و ممكن ترجعله و هو هيفيدك في اكتر منى بمراحل
كل ده معناه ان اللى عنده مشكله جوهريه فى العربية يطلع على ابو رواش او القاهرة اوتو بدون نقاش عشان مفيش مركز وصل انه يكون متخصص فى المشاكل الكبيرة اكتر منهم

[moha4tec]

اولا مينفعش التوكيل او اى مركز معتمد يروح للعميل ان الكيا كده او الثبات وحش او العافشه ناشفه او غيره ده غلط تماما حتى لو كان الكلام حقيقى و مظبوط عشان هو كده ببساطه بينقلك طاقة سلبيه و النتيجه انك حسيت انك رميت فلوسك فى الارض
ثانيا التجربه دى أكدت حاجه فى دماغى ان السبع كويس فى الصيانات الدوريه و المشكل المباشرة لكن معندوش استعداد انه يعمل اكتر من كده و يثبت انه ليه فى المشاكل المعقدة و صوت الدربكة ده اصلا كيا نزلتله الحل من فتره و الاستاذ محمد مصطفى بيعمله بنفسه و بسييييييط للغايه و ممكن ترجعله و هو هيفيدك في اكتر منى بمراحل
كل ده معناه ان اللى عنده مشكله جوهريه فى العربية يطلع على ابو رواش او القاهرة اوتو بدون نقاش عشان مفيش مركز وصل انه يكون متخصص فى المشاكل الكبيرة اكتر منهم

+11111111111111
الف مبروك يا كبير على التكريم (وسام التميز)
و انا معاك فى رايك

[K_E]

غريبة انا اتعاملت معاهم كذا مره وبأمانة مفيش معامله ولا دقه فالشغل اكتر من كده وناس محترمة جداً وخدومة لاعلى درجة

[temo85]

غريبة انا اتعاملت معاهم كذا مره وبأمانة مفيش معامله ولا دقه فالشغل اكتر من كده وناس محترمة جداً وخدومة لاعلى درجة

اتعاملت معاهم فى ايه ؟ صيانات عادية ولا مشاكل و حلوها ؟