الكارينز بتحدف يمين

[saiefdigital]

السلام عليكم و رحمة الله وبركاته
الحمد لله اشتريت كيا كارينز وكيل هاي لاين. لكن عندي مشكاه هي ان العربيه فيها حدفه يمين قلت عادي لما اروح اعمل صيانه الالف ابقي اقول ليهم في التوكيل وهما هيتصرفو. المهم رحت التوكيل بتاع فرع روكسي عشان اعمل الصيانه و قولتلهم علي الملاحظه دي قالولي احنا اسفين يا فندم الجهاز عطلان ممكن تروح فرع القطامية او ابو رواش . طبعا ده محتاج حجز تاني و عطله ووقت . مش عارف اعمل ايه هل اروح مركز خدمه معتمد وخلاص ؟ ولا ايه ؟ كمان ايه ممكن يكون سبب الحدفة دي ؟ معلش اصل اخوكم معلوماته في العربيات مش قد كده . كمان انا لاحظت حاجه غريبه جدا في الكاوتش لاحظت انه الفردتين اليمين كومهو والفردتين الشمال هانكوك وطبعا نقش الكاوتش بتاع الفردتين اليمين غير الشمال هل ممكن يكون هو ده السبب ؟ ولا ممكن يكون حاجه تانيه ؟ شكرا و اسف علي الاطاله

[Hosam_Optrawy]

اولا الف مبروك ربنا يباركلك فيها ويكفيك شرها

ثانيا بخصوص الحدفه ماتقلقش اكيد حاجه بسيطه ممكن ضغط الكاوتش مش مظبوط ودا احتمال كبير لان العربيات بتبقى جايه منفوخه زياده , ولو الضغط مظبوط يبقى محتاج ضبط زوايا وانصحك تروح مركز من مراكز بريدجستون احسن من التوكيل لان معظم التوكيلات تعبانه فى ظبط الزوايا , والتكلفه مش كتير حوالى 20 او 40 جنيه

بخصوص نوع الكاوتش والنقشه كان المفروض ترفض استلام العربيه لان المفروض العربيه كلها بتنزل بنفس النوع والموديل والنقشه

معلش حصل خير وان شاء الله بسيطه

[Samir Elshahawy]

الف مبروك علي العربية و ربنا يؤتيك خيرها و يكفيك شرها

- بالنسبة للحدفة يرجي عمل التالي :
1- مراجعة ضغط الاطارات و ظبطها كما هو مكتوب بالكتالوج أو علي القائم الشمال
2- ضرورة تغيير وضع الاطارات بحيث تصبح الاطارات المتشابهة في الخلف و الامام و ليست كل جانب علي حدة
يعني تخلي الكومهو مثلا ورا و الهانكوك قدام أو العكس
3- لو الحدفة أستمرت يبقي لازم تكشف علي الزوايا
و معلش أعمل الموضوع ده داخل التوكيل علشان لو طلع في عيب في العربية غير ظبط الزوايا هما يتحملوه في الضمان لكن لو ماعرفوش يبقي أعملها برة

[moha4tec]

الله ينور الرجال قالولك الخلاصه .
و على فكره لو انت اشتريت من التوكيل تروحلهم و تعمل مشكله و تخليهم يغيرولك الكوتش و يكشفوا على العربيه كلها مجانا دا حقك متتنازلش عنه
انما لو من معرض برا اظن مش هتعرف تعمل حاجه
اخر سؤال هل عدا 14 يوم من تاريخ شراء العربيه؟؟؟؟؟؟
لو معداش ممكن تطلع على حماية المستهلك لو هما استعبطوا و متضيعش الوقت .

[محمد بدر]

موضوع الكاوتش فردتين وفردتين ده فعلا حاجة غريبة جدا
طيب حضرتك اكتشفت الموضوع ده امتى قبل الصيانة ولا بعد الصيانة ؟
انا اعتقادى ان حضرتك اكتشفت الموضوع ده بعد الصيانة ولو كان كده صح يبقى لازم ترجع تانى مركز الصيانة لأنى اشك ان للأسف تم تبديل الإطارات عن طريق الخطاء مع سيارة تانية وانا شايف ان مفيش حاجة تانية ممكن تكون منطقية غير كده
وبعدين ياسيدى ألف مبروك على العربية اختيار موفق جدا ربنا يبارك لحضرتك
ولو عايز ترجع فى كلامك انا جاهز وبالحدفة وبالفردتين المختلفين بس بعد ما تعملنا واجب كويس هههههههه

[saiefdigital]

لا انا اشتريتها من سمير ريان من حوالي 3 شهور كده بس للاسف لما جيت اشوف نوع الكاوتش بصيت علي فرده واحده بس و قلت اكيد كله نفس النوع

[saiefdigital]

انا اتصلت بالتوكيل انهارده فرع روكسي وقلتلهم اني شاكك يكون الكوتش اتبدل مع عربيه تانيه بطريق الغلط في التوكيل اثناء صيانة الالف وكلمت مدير الصيانه المهندس هشام سيف الدين بصراحه الراجل محترم جدا و قالي طالما العربيه لسه عامله الف كيلو يبقي ممكن نعرف اذا كان الكوتش اتغير ولا لأ وعلي اي حال احنا عندنا كاميرات بتصور العربيات اثناء الصيانه ممكن تيجي ونشوفهم سوا. انو بقا ايه رايكم ؟ انا بصراحه كل اللي يهمني الجنوط مش الكاوتش انا خايف ليكون الجنوط اللي اتبدلت دي فيها لوحه ولا مفتوله لكن لو الجنوط سليمه فخلاص يبقي مفيش مشاكل. كمان ازاي اعرف اذا كان الكاوتش قديم ولا لأ . شكرا

[محمد بدر]

يا صديقى العزيز تاريخ الانتاج مكتوب على الكاوتش وغالبا بيكون السنة نفس سنة الموديل

[Youssef.Awad]

لا انا اشتريتها من سمير ريان من حوالي 3 شهور كده بس للاسف لما جيت اشوف نوع الكاوتش بصيت علي فرده واحده بس و قلت اكيد كله نفس النوع

انا اتصلت بالتوكيل انهارده فرع روكسي وقلتلهم اني شاكك يكون الكوتش اتبدل مع عربيه تانيه بطريق الغلط في التوكيل اثناء صيانة الالف وكلمت مدير الصيانه المهندس هشام سيف الدين بصراحه الراجل محترم جدا و قالي طالما العربيه لسه عامله الف كيلو يبقي ممكن نعرف اذا كان الكوتش اتغير ولا لأ وعلي اي حال احنا عندنا كاميرات بتصور العربيات اثناء الصيانه ممكن تيجي ونشوفهم سوا. انو بقا ايه رايكم ؟ انا بصراحه كل اللي يهمني الجنوط مش الكاوتش انا خايف ليكون الجنوط اللي اتبدلت دي فيها لوحه ولا مفتوله لكن لو الجنوط سليمه فخلاص يبقي مفيش مشاكل. كمان ازاي اعرف اذا كان الكاوتش قديم ولا لأ . شكرا

السبب الاوحد لكل مشاكل الحدفة دى هو نوعية الكاوتش المختلفة اولا واخيرا
ومش قادر استوعب ازاى تستلم عربية بفردتين وفردتين ؟!!!
وده سر لازم تكتشفه الاول قبل حل مشكلة الحدفة
سواء من معرض سمير ريان بيه هو اللى بدلهم ولييييييييه
او اتبدلوا غلط فى التوكيل وضرورى تروح لمركز الصيانة اللى عملت فيه اول صيانة وتتأكد من الموضوع ده بنفسك
وفى الاخر خالص لو ما وصلتش لحل انك تعرف ايه اللى جرى فى عربيتك وترجع الفردتين بحيث يكون كلهم نفس الماركة والنوع
يبقى لازم تخلى كل فردتين زى بعض اما قدام او ورا ..

[2CODE]

يا صديقى العزيز تاريخ الانتاج مكتوب على الكاوتش وغالبا بيكون السنة نفس سنة الموديل

مش غالباً ده لازم لان لو كان غير كده يبقي

[Khaled_Nowaihy]

فى الغالب حضرتك استلمتها بفرد كاوتش مختلفة من قبل ما تروح الصيانة ... لإن حسب كلامك الحدفة ظهرت قبل ما تروح توكيل روكسى و كمان هم اعتذروا عن وجود الخدمة ... يعنى ما قربوش من العجل.
وضبط الزوايا لايحتاج الى فك العجل .... الترصيص فقط

المشكلة مش هاتقدر تحدد مين اللى غير الكاوتش ومش ها تقدر تثبتها على حد

العربية بتيجى بكاوتش كومهو ... ومفروض كمان من ضمن الأوراق اللى استلمتها ضمان الكاوتش من كومهو

يبقى حاول تكشف كويس على الفردتين الهانكوك وتشوف حالتهم إيه

جرب تخلى كل نوع مع بعضه زى ما قال المهندس سمير واتأكد من ضغط الإطارات وشوف الحدفة هاتروح وللا لأ

[Khaled_Nowaihy]

إقتباس

تكملة الموضوع بعد إذن الأستاذ/ Saiefdigitalصاحب الموضوع :

[justify] [/justify][justify]
انا اسف جدا علي التاخر في الرد بس والله كنت مشغول جدا اليومين اللي فاتو دول
اما بالنسبه للحدفه فالحمد لله اختفت والعربيه اتظبطت الحمد لله بس عاوز احكيلكم تجربتي في الموضوع ده
بصراحه العربيه كان فيها حدفه يمين بسيطه لما اشتريتها قلت اظبطها مع صيانة الالف. لكن لما رحت الصيانه قالولي جهاز الزوايا عطلان الكلام ده حصل طبعا في التوكيل بتاع روكسي انا بصراعه مش عارف ازاي اروح فرع للتوكيل ويقولي معلش جهاز الزوايا عطلان بصراحه دي مش حاجة كويسه خالص المهم عملو الصيانه واليكم الملاحظات بتاعتي مع فرع روكسي
1- غطي الموتور اللي مكتوب عليه كيا ده كان متلحوس زيت ومش متنظف كويس
2- دواسة العربيه من جوه مليانه ماء . بجد والله زي ما بقولكم كده مليانه ميه ممكن تتحط في كوبايه مش مببلوله و بس يعني
3-العربيه من بره مبلوله بالميه برضو ومش ناشفه

بصراحه معجبنيش الشغل والاهمال ده
4- المفاجأه بقي لما روحت البيت واكتشفت موضوع الكوتش ده بصراحه انا مش قادر احدد هو اتبدل بالغلط عندهم ولا عند سمير ريان بس لما قابلت مدير الصيانه بتاع فرع روكسي وقالي ان تصوير الفيديو بتاع الصيانه بتاع عربيتي اتمسح مع انه كان بيقولي قبل كده ان موجود ومش بيتمسح لال بعد وقت طويل حسيت انه اتبدل عندهم بس انا بردو مش متأكد عشان كده كبرت دماغي من الموضوع ده
5- المهم روحتلهم تاني عشان اظبط الزوايا ويارتني ما روحتلهم. الزوايا باظت خالص الدركسيون بقا سايب خالص وفي لوحه والعربيه بقت بتحدف شمااااااااااااااااااال اوي ومش وزونه علي الطريق خالص. وطبعا العربيه متغسلتش من بره والتابلوه حطو عليه ملمع كده انا مش بحبه اصلا وكمان اللي حطه محطوش علي كل التابلوه ده حط عي مكان ومكان لا فالتابلوه بقا شكله بايظ خالص عاوز اقولكم انا كرهت الغربيه بسببه. كمان بقا الكراسي متكيستش خالص وطبعا بقا انتم عارفين ايه اللي ممكن يحص من لحوسه و توسيخ للفرش والعربيه من جوه.

المهم انا قررت مروحش اي فرع من فروع التوكيل و هروح مركز خدمه معتمد يكون كويس فالحمد لله لقيت مركز معتمد في بنها اسمه المركز الكوري وكمان قريب مني روحتله وقلتلهم ع المشكله الناس تشكر كشفو عالعربيه وهي قدامي يعني عارف ايه اللي بيحصل فيها وقالولي احتمال تكون الزوايا او حاجه في المساعد اليمين وكلمولي فرع ابو رواش عشان اروح و يشوفولي ايه المشكله دي والله يا جماعه مفيش اقل من ربع ساعه لقيت مدير الصيانه بتاع ابورواش بيتصل بيا وبيقولي تعالي بكري مش غير حجز وهنظبطلك الدنيا كلها بس قالي انه كلم فرع روكسي وهناك قالولو انهم اتصلو بيا بعد ظبط الزوايا وسألوني لو لسه العربيه بتحدف وانا قلت ان المشكله خلاص اتحلت وطبعا والله ده محصلش يعني كمان مهملين و كذابين كمان. المهم روحت ابورواش بصراحه الناس هناك تمام خدو العربيه وكيسوها وبع 3 ساعات اتصلو بيا عشان اجي اجرب العربيه مع مهندس من عندهم بصراحه لقيت الحدفه اختفت والعربيه رجعت زي ما كنت انا عاوز الحمد لله. بس برضو حطو الملمع اللي مش بحبه علي التابلووووووووووووووووووووووووه . عاوز اعرف ازاي اشيله ممكن حد يقولي؟

معلش طولت عليكم بس بجد انا مش هروووح فرع روكسي ده تاني[/justify]

[justify]
[/justify]