كارثة التكييف :(

[blackknight]

اعتذر جدا عن العنوان ولكن الموضوع كارثة فعلا ... الموقف كالتالى :-

شارع عباس العقاد و عربية شرطة بدون نور فرامل و مرة واحدة البيه يقف علشان يشترى الجرايد و الحمد لله قدرت افرمل بالعربية ولكن كابتن حمزة ابنى رشق فى التابلوه – اصل البيه غاوى فرجة على العربيات وهوه واقف على الكرسى – المهم الصورة تغنى عن اى كلام

الclimate control Knob انضغطت جوه التابلوه و لا يوجد اى تحكم فى درجة الحرارة على الرغم من ان التكييف شغال كويس الحمد لله ولكن على Auto mode بس يعنى مينفعش اغير درجة الحرارة تماما






المهم رحت التوكيل فرع روكسى والاقيهم يقولولى انت هتركب ب 100 جنيه ولكن مع الاسف لازم تغير ال A/C control ودى بتاخد وقت علشان تلاقيها و تسأل فى مخزن قطع الغيار

وفى قطع الغيار بكام يا سيدى " شوفوا بقى الكارثة" ب 3600 جنيه و ممكن اجيبهالك بكره

حاولت ادور عن الpart number للسيراتو 2010 sx علشان الرقم بيتغير من كل موديل علشان احاول اشوف الknob دى على الانترنت او حتى اجيب الcontrol unit كلها واخد منها البكرة و ابيع ال controller

اللى بقى عنده ال spare parts manual or service manual يبعتهولى

اغيثونى و قولولى الحل ايه!!!!

[timtim77]

قدر الله ومشاء فعل
ازيك يا اسلام بك
حمد الله على سلامتك وسلامة حمزة
يارب تلاقى حل لموضوع التكييف ده ميكنش مكلف كتير

[beshomilan]

سيبك من التوكيل واطلع على اى بتاع تكييف محترم وهو هيعملهالك

[drmagieed]

أنا من رأيي تحاول تصلحها برة التوكيل وإذا ما عرفتش مافيش مشكلة ما هي بايظة بايظة والتوكيل عايز يغيرها كلها ... يعني المحاولة مش هتضر بس روح لحد كويس ... وألف سلامة لك ولحمزة المهم إنها جت في حاجة مقدور عليها ... وبالتوفيق إن شاء الله

[exact]

هل هي تلفت وللا اتحشرت... انا عموما بافك الزراير دي وباعرف اصلحها لو اقدر اساعد ممكن تفكه وتجيبه المنصورة او المحلة او طنطا وانا اعملهولك

[moha4tec]

هههههههههههههههههههههههههه
التوكيل بيشتغلك طبعا
التكييف سليم مفيهوش الهوا .
و التصليح بالكتر 10 جنيه .
هتفك الكاسيت ------ دى سهله اعملهالك .
و هنفك الوش منه ----------- سهله بردو
هنلحف مكان الودن البلاستيك اللى اتكسرت عند اى حد بتاع فيبر بيلحم بلاستيك و التركيب سهل
بس خلاص
و الف سلامه عليك و على ابن حضرتك
الكلام ده لو اصلا الوحده سليمه
اعتقد بنسبة 95% هتكون سليمه و انضغطت لجوه فقط و الفيشه مهزوزه فقط
و الله اعلم

[moha4tec]

متقلقش دى بسيطه
انا لسه انهارده و بقالى 3 ايام بفك التابلوه كل يوم و انهارده فكيت الفتيس كله و طلعته برا خالص و اعدت اشتغل براحتى عملت عازل حرارى و صوت .و عملت تعديل للكابينه فى الشكل و كده
انتظروا موضوع مفاجأه
لو عاوزنى اقابلك بكرا بعد الضهر و اعملهولك انا تحت امرك .
بس انت هتوديه يتلحم بلاستيك عند حد كويس .
او تجيلى و اوديدك عند حد كويس زى ما تحب .
و ربنا معاك

[احمد المصرى]

انا مش هقول اكتر من الخبراء بتوعنا بس بجد التوكيل دا مفترى جداااااااااااااااااااااا انا برضوا شايف ان الموضوع مش هيتكلف اكتر من 10 جنيه وربنا يبارك لاخونا محمد عرض انه يعملهالك

[blackknight]

انا مش عايز أقول غير انى كنت متوقع الردود المبشرة دى بشكل كبير جدا و خاصة من moh4tec علشان ماشاء الله رجالة المنتدى من انشط ما يكون فى موضوع التعديلات و الاصلاحات الاولية اللى ممكن تفوق قدرة الوكيل - على اساس ان الوكيل بيستسهل و بيغير على طول- على العموم شاكر للغاية على اهتمام الجميع و ان شاء الله ابلغكم بالتطورات

moha4tec نمرتك يامعلم على الخاص بقى :)

[temo85]

الموضوع سهل ياباشا و مش محتاج كل التكلفه دى , انا حصل معايا موقف مشابه فى العربية الكورولا و كانت فى زرار الpower بتاع الكاسيت هو زى اللى فى السيراتو انضغط لجوه و مطلعش روحت التوكيل قالى الكاسيت كله لازم يتغيير , غيرت الزرار بره ب 50 جنيه و خلص الموضوع