السيراتو و الركنه لمده طويله !

[hazem89]

السلام عليكم يا رجاله كيا

كنت عاوز استفسر عن حاجه دلوقتى انا حسافر بره مصر لمده لا تقل عن سنه لظروف العمل و اجازتى شهر بعد اول سنه يعنى على الاقل سنه مش حنزل مصر طبعا العربيه محدش بيسوقها غيرى ف حتتركن سنه كامله ايه الحل هل فى خطر على العربيه لو ركنتها كل الوقت ده ولا ابيعها احسن استفيد بفلوسها عشان اجازتى شهر فى السنه و اسافر تانى بس هى بصراحه غاليه عليا

العربيه لسه جديده موديل 2011 بقالها سنه و 9 شهور عامله 15000 كم و مش راشه حاجه مجرد خرابيش فى الاكصدام بيطلع ب البوليش نتيجه السواقين المحترفين الى بيركنو من غير ما يبوص

العربيه سيراتو sx جنط 16 و شيفتات فى الطاره و ليدات فى المرايات وكيل

المفروض اعمل ايه اركنها و اسيبها سنه ولا ابيعها ولو بيعتها حتجيب كام شكرااا

[falak]

بيعها أحسن
السيراتو بالذات كثرت سرقتها
وركنتها بتقلل تمنها
ده غير تكاليف الجراج الي هاتسيبها فيه
أستخير ربنا وبيعها ، حتى لو خسرت شوية ماعلشي ،، ربنا يعوض عليك
ولما تنزل وتستقر هايكون فيه موديلات أحسن نزلت

[sanhory]

والله يا باشا ان شايف ان دي فلوس مرمية في الشارع و السيراتو العين عليها في السرقة و كمان الركنة حتبوظ فرد الكاوتش و ممكن كمان الجنوط تكون عرضة للسرقة غير بقى البطارية اللي ممكن تبوظ و الخرابيش اللي حتاخدها ة هي واقفة

انت تبيع بس بشرط متمدش ايدك عالفلوس دي و تحطها في البنك زي ما هي و لما ترجع من السفر باذن الله يكونوا زاد عليهم قرشين ارباح و تجيب حته k3 الجديدة تكون نزلت ان شاء الله , و لو حتسافر تاني متجبش حاجة الا لما ترجع نهائي

و كمان البيع دلوقتي احسن عشان ممكن تسافر و تلاقي الموضوع حيطول عن سنة او حاجة فهي دلوقتي تجيب فلوس حلوه

[TAMERMEGAHED]

السلام عليكم اخى الكريم حط فى اعتبارك انك لم ان شاء الله تنزل اجازه لو بعتها هتعمل ايه هتبقى عايز تأجر عربيه ولو لقيت حد معرفه تأجر منه من غير مايمضيك على ورق القلق الى هتبقى فيه من السياره انها تتسرق او لقدر الله اتخبتت غير انك هتدفع مبلغ برضه فى الايجارواكيد انت بتبقى نازل اجازه عشان تخرج وتلف كتير
فكر فهل الافضل تبيع وتوفر فلوس ولا توفر تعب وقلق فى اجازه
صلى استخاره وانا بقلك ده عن تجربه
انما لو كان ليك اخ تقدر تستخدم عربيته فى الشهر الى هتنزله يبقى اكيد بيع على طول انما لو مافيش يبقى شوف جراج محترم وارفعها عنده

[akmm]

البيع افضل .... وبعد العوده إن شاء الله والإستقرار النهائى هات واحده جديده وموديل احدث وبردوا حتبقى غاليه عندك ... وموفق فى قرارك .

[Abo Yasso]

السلام عليكم
اول حاجه انك تستخير
احسن انك ترفعها فى جراج او حتى قدام البيت بس تشيل البطاريه والكاوتش
ولو عندك حد من صحابك يبقى يشحنلك البطاريه او حتى بيعها
بس العربيه لو قدام البيت او حتى فى الجراج لازم تغطيها كويس عشان الغطا لازم يكون مربوط كويس
وبعدين عن تجربه لما تنزل اجازه شهر من غير عربيه هتتبهدل اخر حاجه ده لو لوحدك ما بالك لو عندك أسره
اصلك اكيد لما تسافر هتجيب عربيه او مش هيبقى فى تنطيط فى المواصلات
ولما تبيع العربيه دلوقتى هتخسر كدا كدا فيها ولما تحط الفلوس فى البنك ما الفايده بتاعه الفلوس هتحط عليها عشان تأجر وتمضى ايصال امانه محترم
المهم عشان انا طولت عليك استخير الله

[m_medo]

انا ركنت عربيتى شهر رجعت لاقيتها متبهدلة.... ما بالك بالسنة؟؟؟
حل من اتنين مالهمش تالت
1- ترفعها فى جراج مضمون لو انت عايها قوى
2- بيعها فورا مهما كانت الخسارة... ولما تنزل اجازة ابقى قضيها تاكسى... يعنى هتتكلف كام مواصلات فى الاجازة؟ 2000 جنيه؟ ولا حاجة جنب تمن الاربع فرد كاوتش اللى هيبوظوا لو انت حظك حلو ولاجنوط متسرقتش او العربية كلها اتشالت

[Deshahcoka]

بييييييييييييييييع و متفكرش .. خسارة قريبة احسن من خسارة بعيدة

[hossam_elwani]

بيع مفيهاش كلام الفلوس فى جيبك والعربيه فى الشارع

[2CODE]

بيع دلوقتي خصوصاً ان السيراتو الشكل الجديد نازل السنة اللي جايه يعني العربية سعرها هيقع لو بيعتها دلوقتي افضل مليون مره

في ناس كتير جداً في مصر متعرفش ان السيراتو هينزل منها شكل جديد السنة اللي جايه وفي ناس برضه متعرفش اصلاً ان العربيات بينزل منها اشكال جديده يعني في ناس نايمين في العسل دلوقتي الحقهم وبيع لهم قبل ما يفوقوا

[ابو ليلى]

طيب انا عندى فكرة تانية
اجر العربية لشركة محترمة يعنى هتاخد فى الشهر فى حدود 3500 ج فى السنة 42000 ج
ولما تنزل ابقى بعها بحوالى 90000 + 42000 = 132000 ج ويبقى انت كسبت
سنة ونص استهلاك عربية وتنزل تشترى عربية جديدة والف مبروك عليك .

[youssef_u]

بص حضرتك السيراتو بتتسرق كتير دي اول حاجه و تاني حاجه الشكل الجديد قرب ينزل يعني سعرها هيقل و تالت حاجه الركنه هتبووظ حجات كتيير اوي فيها زي الاسلاك و هتتجرح و تتخبط من بره ،،،، فا بقول ان حضرتك تبيع احسن و لما ترجع نهائي تبقا تجيب حاجه جديده و تكون احسن ليك ان شاء الله و بالتوفيق

[Youssef.Awad]

انا كنت فى نفس حيرتك دى لما سافرت من 9 شهور تقريبا وعربيتى نيسان صنى 2010 كانت وقتها ماشية 65000 كم ومفيش غيرى بيسوقها واخويا كمان مسافر لكن وضعى كان مختلف لأنها اقساط شهرية 4 سنوات اتدفع فيها 20 شهر وباقى سنتين 28 شهر


المهم حسبتها كالاتى:
- لو بيعتها فى وقتها والوقت كان ضيق جدااا حوالى اسبوعين لانهاء اجراءات السفر وطبعا فك حظر البنك بياخد مش اقل من شهر او انى اعمل توكيل لأحد قريبى يخلص كل حاجة .. وطبعا انت عارف المستغلين كتير اول ما يعرفوا انك مزنوق فى بيعة هايتخسف بيها الارض وهاتكون لقطة بالنسبة لأى حد وهايستغل ظروفك وانشغالك وفوق ده كله هاخد الفلوس اسد الباقى للبنك ومش هايتبقالى اى حاجة .
- فكرت لما انزل اجازة باذن الله فى الصيف او اى وقت هاعمل ايه وكل مشاويرى سفر (حوالى 3-5 الاف كم فى الشهر) وحتى لو جوة البلد ماحدش يقنعنى انه ممكن يستغنى عن عربية خاصة والا هاتأجر وده باشوفه فى كل اللى بينزلوا اجازات من برة مصر واولهم اخويا اقل ايجار فى الشهر 3500ج !!! ده غير شيك ولا كمبيالة بثمن العربية واصلاح الحوادث لا قدر الله ده غير مخاطرة السرقة (حصلت مع ابن عمى طلع عليه مسلحين فى الساحل الشمالى وخدوا العربية منه ودفع 90 الف ج زى الباشا للمعرض وسافر تانى) وما تنساش اسعار موسم الصيف والاعياد (اغلب اجازات المسافرين خارج البلاد) وكمان الكيلومترات الزيادة .
- باقى الاقساط اللى هادفعها هاتوازى ثمن بيع العربية بعد انتهاء الاقساط ومرور 4 سنوات ع العربية يعنى كأنى باعمل جمعية بتحويل القسط شهريا على البنك ولما ابيع ان شاء الله فى الاخر هاخدهم تانى على بعضهم طبعا مع الاخذ فى الاعتبار خسارة طفيفة فى القوة الشرائية وقتها لأن كل حاجة بتغلى كل يوم
- عندى ميزة ان القسط شامل التأمين 4 سنوات ومن مصلحتى انى اكمل اقساط لأن الدفع اقساط او كاش متساوى تقريبا ولو سديت القرض التأمين هايتلغى .

فكرت فى الحل التانى وهو اخلى العربية واحافظ عليها ومنها استفيد لما انزل اجازة اركبها براحتى بدون خوف وكمان اخويا لو نزل اهى موجودة وتقضى الغرض وطبعا سألت وعملت الاتى:

1. لازم تركنها فى جراج خاص او عام مضمون والتكلفة فى الشهر من 100-150ج وشيل من دماغك فكرة التوفير وانك تسيبها فى الشارع دى خااااااااالص حتى لو فيه حارس ولا سايس معرفة .
2. تفصل كابلات البطارية لو جافة وتفصلها وتفضيها وتملاها مياه مقطرة عند اى محل بطاريات لو سائلة
3. تزود ضغط الاطارات على 40 او اكتر زى ما بيعملوا فى المعارض قبل بيعها للحفاظ عليها
4. تجيب 4 قطع خشب من عند اى محل اخشاب او نجارة مقاس عالاقل 20 عرض * 50 طول * 5 سم او 2 بوصة سمك وتحطها تحت كل عجلة من العجلات عشان رطوبة الارضية
5. حاول تعمل صيانة 5000 كم بالمراجعة على كل السوائل والزيوت فى العربية قبل الركن واعمل حسابك على زيارة اول ما تنزل اجازة بالسلامة برضه لتغيير الزيت لأنه هايكون مر عليه سنة تقريبا والكشف الدورى
6. قبل الرفع اغسلها كويس من برة وجوة ونشفها كويس جدااااااا وياريت لو تطلع بيها مشوار قصير عشان الهواء ينشف كل اجزاء العفشة والموتور يتغسل بالفوم
7. بعد الركن ياريت تغطيها بغطاء عازل او قماش ليس سميك
8. حاول تخلى كمية البنزين فى التانك قبل الرفع لا تتجاوز الربع تقريبا او اول اما اللمبة تنور يعنى 10-15 لتر فقط

انا عملت كده الحمد لله ونزلت فى الصيف استعملتها وسيبتها بنفس الخطوات وقبل منى اخويا نزل شهر هو كمان ..

وأخيرا تروح وترجع بالسلامة

[2CODE]

طيب انا عندى فكرة تانية
اجر العربية لشركة محترمة يعنى هتاخد فى الشهر فى حدود 3500 ج فى السنة 42000 ج
ولما تنزل ابقى بعها بحوالى 90000 + 42000 = 132000 ج ويبقى انت كسبت
سنة ونص استهلاك عربية وتنزل تشترى عربية جديدة والف مبروك عليك .

يا ابو ليلى لايمكن السيراتو الشكل الحالي هيتباع السنة اللي جايه في وجود الشكل القديم بـ90 الف جنية لانها هتكون الشكل القديم

ده مستحيل تتباع بالسعر ده السنة اللي جايه