فى حد جرب بنزين 90 للسيراتو ؟؟؟

[mhf_77]

طبعا فى وسط ازمة البنزين والوقوف فى الطابور على ما جه دورى ملقتش غير 90 و مفيش 92 ففولت مضطر ومشيت وكان الطريق زحمه جدا لغاية البيت حتى مجربتش سحبها عامل ايه ومش طالبه اطلع على طريق فاضى اجرب واستهلك البنزين للتجربه فقط فركنت تحت البيت ومش عايز انزل ادورها تانى ونفسى مسدوده فياريت حد يقولى ويكون جرب قبل كده يحط ال 90 فيها ايه ظروفه وخصوصا ان انا اللمبه كانت منوره عندى وفولت يعنى التنك من خرطومه لغطاه 90 حتى مش مخلط افيدونى افادكم الله

[Ahmed_Adham]

أنا حطيت بنزين 80 في الكارينز مره عشان مكنش فيه ولا 90 ولا 92 ولا 95 وكنت على طريق سريع. العربيه كانت مخنوقه بس بعد ما فولت 92 تاني رجعت لحالتها ومكنش فيه تأثير يذكر بعد كده وفي أول صيانه في التوكيل سألت المهندس قالي مادام مره أو مرات قليله في حالات الطواريء مش هيحصل تأثير طويل المدى وكل اللي هتلاحظه ضعف السحب مش اكتر.

[Dr.M_baz]

متقلقش في ناس كتير بتحط 90 وعادي محصلش مشاكل. بس للأمانه انا معملتهاش

[احمد المصرى]

ولا اى فرق اطلاقا متقلقش انا لما بلاقى 90 بفول 90 بس طبعا مش لاقيه خالص ..... مفيش اى مشاكل اطلاقا ان شاء الله

[M I D O]

الافضل متكررهاش تاني ولو حصل وملاقتش غير 90 متفولهاش حط بالكتير 20 لتر عشان لو لاقيت 92 في مكان تاني تخلطة و التاثير السلبي يقل شوية

[ابو ليلى]

طبعا التاثير مش هيكون واضح من مرة الا اذا ...
من الاساس موتور السيراتو حساس جدا من اى شى وخصوصا البنزين لان فى نسب معينة
بيحسبها الكمبيوتر على اساسها الموتور بيعمل بكفائته اما عن الاضرار ... اسمع يا سيدى (منقول)
1 - لا تحصل علي العزم وعدد الأحصنة المبين في الكتالوج بل أقل منه
2- صوت المحرك يرتفع ومن الممكن أن لا تحس بالفرق بنفسك لكن صوت المحرك سيرتفع بالتأكيد ولو بنسبة ضئيلة
3- قد يحدث في المحرك ظاهرة التصفيق (Detonation) والميكانيكي يقولك الموتور بيسقف وهذا صوت مثل الصوت الذي تسمعه لو أنت ماشي علي الرابع علي سرعة 20 كلم/ساعة وفجأة دست بنزين جامد تسمع صوت تكتكه هو ده التصفيق اللي يزيد عندك
وهذا التصفيق ليس صوت تصادمات كما يبدو ولكنه صوت اهتزاز وتذبذب شديد للمحرك وخاصة عمود الكرنك والمكابس وقد يصل في بعض الأحيان إلي كسر عمود الكرنك (حالة نادرة)
4- التصفيق الكثير يقصر عمر المحرك علي المدي الطويل
5- زيادة في استهلاك البنزين لأن التصفيق والموجات الناتجة تزيد من فاقد القدرة داخل المحرك

ممكن تمشى شوية وترجع تحط تانى 92 ويارب بقى السيراتو تقبلها .... دى بنت ناس يا عالم

[aftr]

ان شاء الله خير انا كمان لسه مفول30 لتر 80 مش عاوز اقولك العربيه السحب مات وتسقيف بس اعمل ايه مفيش بنزين وكان عندى حالة ولادة حسبى الله ونعمة الوكيل فيك يامرسى انته وحكومتك الفاشلة

[M I D O]

بنزين 80 دة مشكلة لاي عربية انجكشن

[Silent~Dream]

مش بياثر و عن تجربه فى هيونداى النترا حطينا حوالى 120 لتر بنزين 90 على 3 مرات سفر حوالى 1300 ك ولا الهوا ولا تاثير على السحب ولا صوت ماتور عالى ولا اى حاجه و طول الطريق شد و غرز و بتاع

[Land_Cruiser]

لو قلقان ممكن تحط مُحسِّن أوكتان مع التفويله دي و هتلاقيه بيتباع في البنزينات الكبيره او عند بتوع الاكسسوارات و يفضل طبعا عدم تكرار وضع بنزين 90 ده بعد كده

[profimh]

متقلقش نفسك زى ما الاخوة الافاضل اشاروا
انا مجرب الموضوع مع النترا hd نفس الموتور اللى معاك و مفيش مشكلة لان نسبة الانضغاط فى الموتور تسمح بأن الواحد يحط ال 90 بس هتلاقى معدل الاستهلاك هيقل و بنسبة بسيطه جدا يعنى تفرق فى اللتر اقل من نص كيلو تقريبا