انخفاض 18 الف في سعر سيراتو الشكل القديم ؟؟

[yassermotors]

الاخوة الكرام ..
الخبر ده بجد ولا ايه ؟
وممكن تنصحوني لو كده الواحد يتراجع عن حجز بيجو 301 ويسعى في السيراتو ؟
ده لينك الخبر "البورصة" تنشر التغييرات الجديدة في أسعار "كيا" من الوكيل "EIT".. و18 ألف جنيه انخفاضا لـ "سيراتو" الشكل القديم - جريدة البورصة

[mhf_77]

دا اللى قولنا عليه ان مع نزول البيجو والستروين كل وكيل هيراجع نفسه فى الهبل اللى استهبله الفتره اللى فاتت بس ياريت الكلام يطلع واقع مش استهبال جديد والوكيل يكون رفع السعر رفعه عاليه وبعد كده ينزلو لسعرها تانى ويحسب ده تخفيض والناس الطيبه تصدق

[mohamed_selim]

هو لسه فى سيراتو شكل قديم بتنزل؟
مش ممكن تكون عربيات متخزنه اصلا؟

[mhf_77]

زى ماتوقعت الوكيل رفع السعر 18 الف ورجع نزلهم تانى
رفع المانيوال - المانيوال - المانيوال ل 138 الف تخيلو السعر ورجع رجعو ل 120 اللى هما اصلا استهبال ورفع اول فئه اوتو ل 148 اول فئه اوتو اللى بتنزل بطاسات ب 148 ولا تعليق ورجع قال تخفيض ل 132 انا مش هعلق عشان الكلام خساره

[AhmedNaeem]

لو كان كده كان نزل في سعر كله مش الشكل القديم بس
هو كده عايز يخلص العربيات القديمة اللي عنده
ده لو كان اصلا الخبر صحيح

[yasserelsayad]

اصل دى يا باشا الشكل القديم ودى اخر دفعة جت قبل الشكل الجديد
وبعدين كدا هو ظبط الكلام يعنى الشكل القديم سعرها اقل من اول فئة مانيوال الشكل الجديد عشان مفيش واحدة تاكل من التانية وفى نفس الوقت يخلص من الشكل القديم اللى عنده

[yassermotors]

دا اللى قولنا عليه ان مع نزول البيجو والستروين كل وكيل هيراجع نفسه فى الهبل اللى استهبله الفتره اللى فاتت بس ياريت الكلام يطلع واقع مش استهبال جديد والوكيل يكون رفع السعر رفعه عاليه وبعد كده ينزلو لسعرها تانى ويحسب ده تخفيض والناس الطيبه تصدق

كلامكو صح 100\100 ... وشكراً على ردود الجميع
انا فعلا كنت ناوي على سيراتو بس لما لقيت السعر علا حجزت البيجو..
السؤال بقى .. هل انخفاض سعر السيراتو يخليني ارجع عن حجز البيجو.
الحقيقة البيجو فيها كل حاجة تمام .. بس ضيقة شوية من جوا .. كمان مراكز الصيانة معدودة.
انصحوني ؟

[yassermotors]

جماعة انا كلمت eit وبيقول العربية مش موجودة ..
شكلها خلصت بقا ولا ايه..

[تامر.محمد]

انا باقول سيراتو

[M I D O]

هوة لا خفض ولا نيل بس عاوز يتخلص من المخزون الي عندة عشان يعرف يرفع في سعر الشكل الجديد براحتة والناس متقلش لا دي غالية نجيب الشكل القديم ارخص وتبور الشكل الجديد عندة

[M I D O]

خليك في البيجو افضل

[mohjarr]

كلامكو صح 100\100 ... وشكراً على ردود الجميع
انا فعلا كنت ناوي على سيراتو بس لما لقيت السعر علا حجزت البيجو..
السؤال بقى .. هل انخفاض سعر السيراتو يخليني ارجع عن حجز البيجو.
الحقيقة البيجو فيها كل حاجة تمام .. بس ضيقة شوية من جوا .. كمان مراكز الصيانة معدودة.
انصحوني ؟

مبروك عليك يا باشا بس أنا مش معاك فى نقطة ضيقة شوية دى.. ده مافيش حد ركب معايا إلا لم إستغرب المساحة الداخلية للسيارة . هوه حضرتك جربت تقعد بداخلها فى الكراسى الأمامية و الكنبة الخلفية؟
على فكرة أنا بايع سيراتو هاى لاين أعلى فئة و ماكنتش عامل بيها أكثر من 20ألف بسبب العفشة وجيبت البيجو ال 301 ومبسوط جداً من القرار ده.

[aboamina]

كلما اتسعت دايرة المنافسة كلما قلت الاسعار يعني لو البيجو 301 والاليزيه (اللي ماكانوش موجودين قبل كده) اثبتوا نفسهم في السوق المصري وما زودوش اسعارهم هيفضل الطلب عليهم عالي....ووقتها اكيد باقي الشركات هتراجع نفسها في الاسعار الهلامية اللي بتبيع بيها عشان تعرف تنافس

[YahiaAshraf]

السيراتو الشكل القديم موقوف تصنيعها خلاص
ولكن اللى موجود تصفيات فطبعا الوكيل م عاوز يخسر فيهم فقرر انه ينزل سعرها علشان يبيع المخزون اللى عنده

[abou-yahia]