أنا والريو 2013 و السفر لمسافة 1300 كم متواصل و تقييم العربية بعد المعركة

[Mohab555]

السلام عليكم ورحمة الله وبركاته
-------------------------------
نمور كيا وحشنى يا رجاله
النهادره هنقل تجربه اول سفريه بعربيتى الريو هاتشباك 2013 خليجى لمسافة 1500 كم متواصل و تقرير حيادي عنها ...

فى البدايه قررت انا و اصدقائى اننا نطلع نستجم شويه فى مطروح وبدأت الاستعداد للسفريه بالاتى :

1- الكشف علي مستوي الزيت و لزوجته
2- الكشف علي مستوي زيت الفرامل
3- الكشف علي مستوي مياه التبريد
4- الكشف علي مستوي مياه غسيل الزجاج و التأكد من عمل المضخة و المساحات
5- الكشف علي الانوار و أشارات التحذير
6- الكشف علي التكييف و التأكد من عمله بكفائة و تنظيف فلتر التكييف و تنضيف السربنتينه
7- تنظيف فلتر الهوا
8- التأكد من ضغط الاطارات و ضغط الاطار الاحتياطي

- اشتريت جركن مياه خضراء الاصلى كيا من توكيل روكسى ب 140 جنية علشان ابقى ماشى معايا مياه احتياطى و ده شكل الجركن



و توكلت على الله و فولت العربيه و حطيت على التفويله زجاجه منظف رشاشات لكوى مولى جبته ب 40 جنيه من مركز توب جير ... و غسلتها غسله حلوه و توكلت على الله

عديت على الاصدقاء و كنا 4 فى العربيه وبدات الرحله بطريق الاسكندريه الصحراوى ( المغرى ) ثم طريق العالمين و الى قابلت عليه كام عربيه محترمه سواء اوروبى او يابانى او كورى .. وانا على طريق العالمين و مثبت الكروز كنترول على 140 و اذا ب 3 سيارات فلوانس و صنى الجديده و اوكتافيا طاروا من جنبى .. قلت مبدهاش جبت الاستبترونك و طرت وراهم ... و فضلنا ماشيين لحد سرعه وصلت ل 190 ك بس الملاحظة ان الوحيده ان الى كانت معايا لحد ال 190 هى الاوكتافيا و الصنى و الفوانس وصلوا ل 180 و تعبوا او هنجوا مش عارف بس ما شاء الله الريو فرحتنى جدا بالاداء بتاعها خصوصا مع الحمل و الشنط و التكييف الى شغال ... وفضلنا انا و الاوكتافيا ورا بعد لحد 200 كم حسيت ساعتها انى بفترى على العربيه فهديت قبل اخر طريق العالمين و سبت الاوكتافيا مكمل ,,,



معلش الصوره طلعت مهزوزه

و كملت الطريق لحد مطروح على خير بمتوسط سرعه 120-140 كم فى الساعة
وحل فصل بايخ عند الضبعه كده فى حفره فى الطريق اعوز بالله ... و انا ماشى و محدش بالى منها خالص ,,, وهوب كل الى فى العربيه طار حسيت انى خدت الحفره فى ضهرى ,,, ركنت و توقعت انى هلاقى الجنط اتعوج وعلى الاقل عمل بلونه ولاكن الحمد لله ... ولا الهواء ... العربيه زى الفل و الكاوتش الكونتننتال طلع اصيل و العربيه صمدت اما تحديات الطريق و الزوايا تمام و كأنى مخدتش اى حفره .

بعدها ب 4 ايام خدت طريق العوده للقاهرة بنفس متوسط السرعه و الحمد لله الرحله كانت تمام حتى وصلنا لنهاية طريق العالمين و كانت المفاجأه الطريق مقطوع من الاهالى بالسلاح ,,, و العربيات وقفه لحد الماستر .... وبعد ما وقفت فى الطريق ساعتين .. قررت انا والاصدقاء اننا نطلع على الاسكندرية بدل الوقفه فى الصحراء ... و فعلا اتجهت للاسكندرية ووصلنا و بتنا فى حتى اليوم التالى و تحركنا للقاهره ... و الحمد لله الطريق كان كويس جدا

تقييم العربيه بعد السفر لمسافة 1300 كم ( مطروح رايح جاى و اسكندرية رايح جاى )
----------------------------------------------------
أجمالي المسافة المقطوعة : 1300 كم
متوسط الاستهلاك : 8.5 لتر / 100 كم
- ادااء الموتور : الموتور ماشاء الله شرفنى مع اغلب العربيات الى كانت على الطريق و مش 1400 خالص و انا راضى عنه جدا و بيوصل ل 180 بسرعه وسهوله مش بيعانى زى بعد العربيات ال 1600 ,,, بس فى عربيه C180 Coupe هى الى عكننت عليا شويه ( لو كانت العربيه زى بتاعه بره بالموتور ال 1600 ال GDI بتاع الاسبورتاج كانت هتبقى عربيه خارقه ) علشان تكون على استعداد انك تطلع مع عربيات عاليه حتى لو مش هتكمل معاها

- اداء التكييف : ممتاز لم اشعر بالحر او أرهاق الطريق الطويل
- العفشه : ماشاء الله مفيش تأثر جامد بالحموله على ارتفاع العربيه ... و التوشم بيك كان اداءه ممتاز جدا ليا هوا و العفشه لحد سرعه 180 وهى دى السرعه الى مشيت عليا فتره من الزمن تخلينى احكم عليا سواء فى تغيير الحارات او مطبات الهواء
- الفرامل : ممتازة خصوصا على السرعات و ال ABS و ال EBD انقذونى فى موقف سخيف على طريق العالمين ...

- أستهلاك البنزين : متوسط الاستهلاك كان 8.5 لتر / 100 كم و ده بالنسبالى ممتاز لانى كنت مشغل التكييف وماشى على سرعات عاليه نسبيا وطلع ل 9/100 لما كنت ماشى 180 ..

الخلاصه : الريو اثبتت ليا انها عربيه رائعه وانا مش ندمان انى جبتها فى يوم من الايام ولو رجع بيا الزمن هجبها تانى و تالت ,,, وحبى ليها زاد بعد السفريه دى و هى فعلا البديل المناسب ليا بعد الجيتز حبيبتى القديمه ......

و انتظروا تقرير صيانة مابعد السفر قريبا ان شاء الله و تجربه زيت فالفولين الجديد Engine Armor

[Hunting_Eagle]

ما شاء الله .. ربنا يبارك لك فيها

مع اني مش من هواة كيا .. بس العربية دي انا بحترمها اوي هي و اختها الكبيرة الكادينزا

[kokowasfy]

بسم اللة مشاء اللة ربنا يديك خيرها و يكفيك من شرها مقلتلناش جبت بنزيبن للسفريات دى ازاااى ؟؟

[hilal]

شكرا على التقرير الرائع ،
وكان لي تجربة مماثلة بتويوتا كورولا
أنا سافرت نفس الرحلة بالضبط بالكورولا 2003 ، وهي 1300 سي سي
وكنت مخمل 7 أفراد ، وبسرعة 170 كيلو ،
ولا بصيت على زيت ولا مية ولا الهوا ،
مليت التانك 40 لتر في مطروح ، وصلت للقاهرة ، ومنها إلى المنصورة ، وكان التانك فيه حوالي 10 لتر
بعتها للأسف لظروف خاصة ، بس ربنا عوضني بالفيكترا سي ، لغاية دلوقتي مفيش مشاكل الحمد لله
ربنا يستر

[monamize4]

ما شاء الله ,, الريو عربية جميلا فعلا
ربنا يباركلك فيها ,,, بس انا معترض على الجملة دى

اذا ب 3 سيارات فلوانس و صنى الجديده و اوكتافيا طاروا من جنبى

دول ما يتقالش عليهم بيطيروا

[esam_ayad]

شكرا علي التقرير
وفعلا الريو عربيه شكلها جميل وفي ناس بتشكر فيها

[amr elsisi]

ربنا يباركلك فيها ويكفيك شرها

[Mohab555]

ما شاء الله .. ربنا يبارك لك فيها

مع اني مش من هواة كيا .. بس العربية دي انا بحترمها اوي هي و اختها الكبيرة الكادينزا

الله يخليك يا كبير
هى فعلا احلى من الكادينزا ..... ههههههههههه

[Mohab555]

بسم الله مشاء الله ربنا يديك خيرها و يكفيك من شرها مقلتلناش جبت بنزيبن للسفريات دى ازاااى ؟؟

ربنا يخليك يا كبير
بالنسبه للبنزين انا سافرت قبل الازمه الحمد لله

[Mohab555]

شكرا على التقرير الرائع ،
وكان لي تجربة مماثلة بتويوتا كورولا
أنا سافرت نفس الرحلة بالضبط بالكورولا 2003 ، وهي 1300 سي سي
وكنت مخمل 7 أفراد ، وبسرعة 170 كيلو ،
ولا بصيت على زيت ولا مية ولا الهوا ،
مليت التانك 40 لتر في مطروح ، وصلت للقاهرة ، ومنها إلى المنصورة ، وكان التانك فيه حوالي 10 لتر
بعتها للأسف لظروف خاصة ، بس ربنا عوضني بالفيكترا سي ، لغاية دلوقتي مفيش مشاكل الحمد لله
ربنا يستر

ياراجل حد يبقى راكب فيكترا سى و يقول كورولا
ههههه ,,,, الفيكترا دى الجوهرة

[Mohab555]

ما شاء الله ,, الريو عربية جميلا فعلا
ربنا يباركلك فيها ,,, بس انا معترض على الجملة دى


دول ما يتقالش عليهم بيطيروا
:n_no[1]::n_no[1]::n_no[1]:

ربنا يخليك ياباشا
انا مش قصدى طايرين بمعنى بيطيروا انا قصدى يعنى جايين مجمعين سرعه من بعيد و عدوا من جنبى ,,,

[aouelfotouh]

حمد لله على السلامه ورحله سعيده وتقرير ممتاز سوال على المايه الخضراء ده تركزه كام

[sonybony]

تقرير ممتاز

[Tmhami]

بسم الله ماشاء الله بجد حببتنى فى العربيه أكتر
بس أنا ملاحظ حاجه غريبه ,أنت عندك مؤشر حراره فى العربيه ؟أصل أنا عندى لمبه بس من غير مؤشر

[Mohab555]

حمد لله على السلامه ورحله سعيده وتقرير ممتاز سوال على المايه الخضراء ده تركزه كام

الله يسلمك ربنا يخليك
المياه الخضراء معرفش تركزها كام .... هى الاصليه زى الى بتبقه جايه فى العربيه من كوريا وفرحت الصراحه لما لقيتها
مش نوع مجهول يعنى لا تقلق ...