سؤال يا جماعه عن الكيا البيكانتو 2013

[mickey_michel]

اسف لو سؤالي مش في مكانه الصح بس انا مش عارف اسأل السؤال في انهي قسم..كان عندي استفسار يا جماعة..هو انا لو جبت كيا بيكانتو 2013 (انا ولد على فكرة و عندي الاحساس انها عربية بناتي بس ما علينا) و هي 1200 cc هل كدة انا برمي فلوسي في الارض عشان ممكن اجيب بنفس المبلغ حاجة تكون 1400 cc لو 1500 cc ولا مش بتتقاس كدة؟ ولا مدام هجيب كيا يبقى كفاية انها كيا اكمنها من اعلى الresell values و ال after sale بتاعها كويس وكدة؟ باختصار..لو جبت العربية الصغيرة دي هندم؟

[mickey_michel]

حاجة تاني يا جماعة..هو الcc دة المفروض انقيه ازاي؟ يعني ال 1600 احسن من 1200 ولا ال 1200 بيستهلك بنزين اقل فيبقى كدة احسن؟ و هل ال1200 يخليها عربية ضعيفة يعني ماتسافرش و كدة ولا مشكلته ايه ال1200؟

[aymanshebl]

هو طبعا ال 1600 cc احسن من 1400 و 1200 من ناحية قوة الموتور و التكيف و السحب و كمان كل ما السى سى يقل استهلاك البنزين يقل لكن راى الشخصى هات حاجة 1400 او الاحسن 1600 علشان قوة الموتور و التكيف و السحب و بالنسبة لاعادة البيع قاعدة عامة كل ما العربية تنتشر و قطع غيارها متوفرة كل ما كان سعر اعادة البيع احسن هنا فى مصر طبعا

[mickey_michel]

ربنا يخليك ميرسي على ردك و اهتمامك بجد

[akmm]

اركب اقل حاجه هنا في مصر وعلشان تعرف تمشى وتشد وتجرى معقول 1600 cc اقل من كده فعلا مش هتكون مبسوط .

[sonybony]

انا معايا العربيه ده وهي ممتازه وشيك وعفشه ممتازه والفكره كلها في القيمه السعريه بالمبلغ ده ممكن تجيب ايه تاني ايه البدائل بس غير الفيرنا لاني مش بحبها

[svneleven]

هي بتتقاس أنت محتاج ايه من العربية. مش مهم 1200 و الا 1600 و الا 1400. و كمان العربية مش بناتي و لا حاجة. هات انت بس لون رجالي و اتوكل علي الله. و علي فكرة العربية 1250 و في الرخصة أظن بتتكتب 1300. و كمان مش بالضروري أن الموتور الأصغر ما يجريش. وزن العربية كمان مهم. العربية ديه مناسبة جدا. وزنها مش كتير و موتورها مناسب ليها و ممكن تروح بيها شرم الشيخ من غير مشاكل و أنت مشغل التكييف طول الطريق.

[2CODE]

شوف العربية دي سوقتها كتير لانها مع وحده قريبتي (العربية فعلاً مخصصة للبنات من كيا)

لكن رغم كده انا "واحد صاحبي" معاه كيا بيكانتو 2012 سودا وعادي جداً لعلمك ايوه بنقول له احيانا ياعم روح بعربيه خطبيتك دي بس طبعاً بنقضيها هزار علشان هي بناتي اكتر من ولاد

لكن ميمنعش ان الولاد ميشتروهاش لأ بالعكس صدقني انا لما بتكون الدنيا زحمة ومظاهرات وكده بسيب الريو وباخد البيكانتو لو كان المفاتيح قدامي

بصراحة عربية ممتازه حجمها حلو بتركن بسهولة بتعدي من اي مكان بتدخل بيها في اي مطب مش هتحك لانها صغيره مش بتوطى اوي لما تركب ناس كتير ورا موتورها (كبير) على حجمها بصراحة

تكيفها زي اي تكيف كيا جبار ومعروف التكيفات الكوري كلها تلاجه - بتتأثر ايوه مع التكيف زي اي عربية في العالم

بس بصراحة هي كجودة وتقفيل وشكل خارجي ....... الخ تمسح الفيرنا واللانوس واللوجان بأستيكه

موضوع الموتور 1200 سي سي العربية حجمها صغير ووزنها صغير فالموتور بيجريها بسرعة - فراملها جيده جداً حتى بدون abs (الفئة اللي مع قريبتي من غير abs ) وانا معايا abs و ebd في الريو 2013 عندي واداء البيكانتو في الفرامل حلو اوي لكن طبعاً لا يقارن بالريو في الفرامل

عموماً صفقه جيده بحسب احتياجاتك - انا كنت بفكر في الفيرنا زمااااااااان من حوالي 3 سنين او سنتين لكن وقفت بسبب التاكسيات الفيرنا ده رأيي الشخصي بصراحة

[sonybony]

انا معايا اللون الابيض اللؤلؤي شيك جدااا و بيسموه كريمي وربنا يوفقك

[mickey_michel]

ميرسي جدااااا يا جماعة على الردود و الاهتمام

[S O P H O S]

انا شايف ان العربية تنفع للشباب
خصوصا مع لون ينفع للشباب وتعديلات بسيطة
وهي كويسة كاستهلاك بنزين وعربية مدينة سهلة فكل شئ
لو عاوز حل وسط هات الريو هتشباك
شكل افضل ماتور اقوي وحل وسط فكل شئ
مجرد رأي ..