ارجو المساعدة : لشراء عربية ضرورى

[martinmystery]

السلام عليكم ورحمة الله وبركاته

لو سمحت انا كنت ناوى اشترى عربية وكا اخرى فى السعر 155 الف دلوئتى انا ادمى كيا ريو هاى لاين وكيا سول تانى فئة

اللى قالقنى من كيا سول انى لما شوفت 2014 على النت لقيتهم مغيرين شكلها تمام من جوه ومن بره مفيش تغيير جامد فدا اكيد سعرها هيغلى فهضطر اجيب 2013

واللى قالقنى من الريو انها 1400 cc وسمعت ناس بتقول ان لما اشغل التكييف بياثر على السحب جامد

وانا موضوع السحب دا مهم عندى جدا

ارجو الافادة واسف على الاطالة

ولو ادامكو عربية احسن من الاتنين اوك مع السبب بس انا مشدود للسول الصراحة موتورها قوى عن الريو

[ahmedteam]

خليك ف كسر الزيرو هتركب حاجه اعلى

فورد فوكس (شوف دى لو تنفعك)

http://www.nilemotors.net/Nile/370247-a.html

اوكتافيا

استرا

كرولا

سيفيك

قدامك اختيارات كتيير فى الرنج ده

[amr011111]

لو الاوبل استرا سعرها قريب من كده يبقى اختيار كويس ان شاء الله

[cosmo]

انت قدامك اختيارت كتير ممكن تختار بينهم
اوبل كورسا
فولكس بولو
عندك 301 والايزيه
ولوتقدر تزود شويه
فورد فيستا
c4

[martinmystery]

شكرا ليكو يا رجالة :d

بس انا كان اخرى 155 ولازم زيرو عشان قسط

[MoH.SaLaDiN]

بص لو ناوى على ريو يبقى فكر فى الخليجى لانى انا معايا الهاى لاين سيدان وكيل و من عيوب العربية ان سحبها فعلا مش حلو وخصوصا مع التكييف وكمان لو مركب ناس كتير فى العربية حتبقى بطة بلدى بجد بالنسبة للخليجى فى ناس بتقول ان سحبها كويس وتكييفها تلاجة بس انا مجربتش اركبها فا مقدرش افيدك اما بالنسبة للسول انا شايفها مش منتشرة خالص واعتقد ده دليل عن عدم نجاحها انا من وجهة نظرى ان احسن عربية حاليا وتعتبر اقلهم سعرا هى الاوبل استرا عربية ممتازة بكل المقاييس هى نازل عليها خصومات الايام دى اعتقد اول فئة اللى اسمها انجوى ب 172 الف صدقنى تستاهل ان انت حتى تستلف الفلوس الزيادة عشان تجيبها انت مش كل يوم حتشترى عربية جديدة وربنا يوفقك

[prooo]

بعد عن السول خالص مش حلوة ...... انا كنت في نفس حيرتك دي وانا بجيب الريو بتاعتي انا معايا هاي لاين خليجي سيدان وفعلا مشكلة السحب مع التكييف دي موجوده بس مش على طول الصراحة .... وفي السيدان بس عشان العربية اكبر ..... انا فعلا لو كنت مش مستعجل على العربية كنت جبت استرا ...بس الحمدلله الريو عاجباني جدا كعفشة وتكييف وعربية نضيفة ..... حاول تشوف الاسترا .... ولو عاوز حاجة بتجري .....عليك وعلى الفورد الفيستا ..... 1600 سي سي ....... و عندك الكورسا برده حلوة ....... ووفي بقه النيسان جوك .....بص عليها برده

[martinmystery]

جزاكم الله خيرا يا رجالة بس ممكن اعرف السول مش حلوة ليه انا ركبتها وفتحت بيها على 100 وكانت كويسة وسحبها كويس جدا يمكن مش منتشرة عشان كانت السيراتو واكلة منها الجو او محدش يعرفها بس اللى معاه قالى كويسة ومش مشتكى منها فحاجة فانا عايز اتاكد لو مع حد يقولى عيوبها ايه

الاسترا انا كنت اوى عليها بس قالوا قطع الغيار غالية جدا والفلوس قلت ل 155 واخرى كده

جزاكم الله خيرا مرة تانية :d

[ابو ليلى]

السول طبعا ... فى فرق كتير من حيث الموتور والوسع والسحب
بس رائى تستنى لو مش مستعجل علشان سعرها هينزل مع قرب نزول الشكل الجديد

[د.عماد صلاح]

الفلوانس شكل جديد اول فئه
كروز الجديده
العربيتين دول جامدين ثبات ووسع و سرعه و ماشين في الرينج بتاعك

[martinmystery]

اظن ان سعر السول الجديد هيغلى ال 2014 لانهم منزلين شكل جديد من بره سنة ومن حوه مختلف تماما على تظام السيراتو كده ولا ايه ؟؟

الكروز والفلوينس فى حدود 155 كده هجيب الفئة الفاضية خالص مفيهاش عير تحكم فى الصوت مثلا !!!

[martinmystery]

طب لو زودت ووصلت ل 170 وجبت الاوبل عايز اعرف قطع غيارها عاملة ايه واعادة البيع كويس ولا سوقها تعبان ؟؟

لانى انا طالب جامعى وقالولى مصاريفها كلها عليك :d :d :d

[martinmystery]

وعايز اعرف ليه السول وحشة ؟؟

وجزاكم الله خيرا :d