بفكر فى الريو

[salah_86]

بفضل الله انا معايا لانسر 2009 بومة
وناوى على التغيير بامر الله
ومن ضمن الاسعار بتاعة اليومين دول بقت حاجة استهبال على الاخر
يعنى المازدا غالية ومفيهاش اوبشنز والشارك شكلها مش حلو والسيفك والكورولا بقو تقفيل تركى وكمان غاللييين نار
وانا من يومين سوقت عربية صديق ليا كيا ريو لمسافة 10 متر الصراحة انبهرت بالاوبشنز بس لاحظت ان الدركسيون خفيف جدا والعفشة ناشفة حبتين
انا بفكر اغير للريو لان هيا الوحيد اللى سعرها معقول بالنسبة ليا خصوصا انى هبيع عربيتى واكمل الباقى قسط مش كاش
فياريت تدلونى تقفيلها ايه حلوة ولا وحشة هندم لو جبتها وهيا كام سى سى والسعر والمواصفات
انا لو هجيب هتبقى السيدان لانى متزوج وانتظر مولود بامر الله
بالله عليكم انصحونى اهم حاجة ليا متكونش عفشتها ناشفة سحبها يكون كويس ثباتها يكون كويس
لان الصراحة اللانسر حلوة فى العفشة والثبات بس سحبها مش قد كدا لانها 1300

[الجنرال]

بص .. انا معايا الريو وعن تجربة ومع ناس تانية

العربية عفشتها ناشفة جدا وبشعة .. بس لو اتعودت عليها خلاص مش هتركز معاها

ثباتها حلو قوي يعنى ممكن لحد سرعة 160 وانا مش حاسس بالعربية خالص .. سحبها جامد جدا

لكن فيها عيب تانى وهو استهلاك البنزين عالي جدا (بيوصل معايا 8.5 لكل 100 كيلو) وده كتير على 1400 سي سي

لكن طبعا مع الاسعار الغريبة اليومين دول فهي احسن حل لحد الان .. لكن نصيحة شوف برضه عربيات تانية زي النسيان تيدا الجديدة .. شوف سيتروين اليزيه وبيجو 301 .. ممكن تلاقي حاجة منهم تعجبك واسعارهم كويسة برضه (نفس رينج اسعار الريو تقريبا)

[M I D O]

متفكرش تنزل من ياباني لكوري الافضل تشوف البيجو 301 عربية خطيرة و اوروبي يعني هتحس بركوبة احسن بكتير

[Ahmed Amin]

متفكرش تنزل من ياباني لكوري الافضل تشوف البيجو 301 عربية خطيرة و اوروبي يعني هتحس بركوبة احسن بكتير

دا نفس رأيي,,
لو عايز فعلاً حاجة عفشتها ناعمة ومش ناشفة شوف البيجو 301

كمان الريو في أول تلات موديلات مش بينزل فيها ABS,,
وبينزل في الموديل الرابع الهاي لاين بس.

وأول مودلين في الريو من المانيوال والاوتو مفهمش أير باج, الأير باج بتنزل واحدة من أول الأوتوماتيك Full Option
وبعدين بتديك 2 أير باج في ال High Line بس.

البيجو فيها 2 أير باج و ABS في التلات موديلات بتوعها,
وأسعار قطع غيارها مش غالية في نفس رينج سعر الكوري ووالياباني,

http://www.nilemotors.net/Nile/358950-peugeot-301-a.html

طبعاً أنت بتقول سوقت الريو 10 متر !! انا مش شايف أن دي تجربة,
قارن ما بين العربيتين كويس, وأستخير ربنا وبالتوفيق في الأختيار.

[salah_86]

هيا الفكرة ان اللانسر معايا بقالها 4 سنين صحيح العربية مش مزعلانى بس بقيت كل ما بركب عربية كورى الاقى الاوبشنز رهيبة بالمقارنة حتى بالجديد اليابانى يعنى المازدا 3 الجديدة شكلها عرة قوى
والسيفك والكورولا غاليين
والبيجو الناس اشتكت من التوكيل

[aliabdo]

شوف الفيات جراند بونتو ايطالى و ارخص منها و اى بى اس ايى بي دى 2 اير باج طاره مالتي فاكنشن و حاجات تانيه كير
روح اتفرج عليها و حتدعي لى

[MITSUKERO]

سيبك يا صلاح من الكلام ده عليك و علي الشارك صدقني هتحس بفرق رهيييييييب

[salah_86]

قطع الغيار ياكريم
الشارك دى هتبيعنى هدومى