تقرير بالصور عن شاشة دي في دي الاصلي لكيا ريو 2013

[الجنرال]

السلام عليكم ورحمة الله

دي اول مرة اعمل فيها تقرير عن العربية

الحمد لله ربنا وفقني النهاردة وركبت شاشة دي في دي 8 بوصة تاتش سكرين مكان الكاسيت

الشاشة جاية راكبه فى الشاسيه بتاعها واللى بيركب بالضبط مكان الكاسيت

المزايا:
1- بلوتوث
2- كاميرا للرؤية الخلفية
3- بيشغل فيديو وموسيقى وراديو وخلافه
4- فيه تلفزيون (بس انالوج طبعا .. يعنى ملهوش لازمة)
5- استخدامه سهل جدا ومش محتاج اكتر من نص ساعة علشان تعرف تستخدمه باريحيه تامة

العيوب بقه:
1- للاسف مش بيشغل كل انواع الفيديو زي ما هما كاتبين .. لقيت في انواع فيديو مش بترضى تشتغل
2- للاسف طلع مفيهوش جي بي اس .. ينفع ادخله خرائط .. لكن مفيهوش جي بي اس للاسف (مع انهم كاتبين انه فيه .. بس يلا الحمد لله)


اسيبكم بقه مع الصور:

دي اثناء العملية الجراحية





دي قبل ما نقفل على طول




بعد التقفيل





وانا سايق ومروح ومشغله









وشكرا

[mabxx]

ايه الحلاوة دي ...
بجد هتاكل من عربيتك حته ههههه

[mostafaenany]

ماشاء الله

[speed_magnum]

ما شاء الله شكله رووووعه

[big big]

جبته منين وبكام والف مبروك

[Ahmed Amin]

الله ينور شكلها حلو علي الطابلوة,,
بس ياريت لو تحط صورة لشكل الطابلوة قبل الشغل عشان مش فاكر شكل الطابلوة القديم.
لو هما كاتبين إن فيه gps المفروض بيبقي فيه gps receiver بيركب علي الطابلوة, ممكن ترجع للي أشتريت منه تكون القطع دي ناقصة وتاخدها طالما مكتوب انو فيه gps وبيبقبل خرايط.
والفيديوهات أبقي حولها كلها mp4 قبل ما تنقلها للجهاز وريح دماغك لو بيقبل النوع دا.

[yasserelsayad]

الف مبروك يا باشا وخلى بالك عشان ميشتتكش وانت سايق

[J A G U A R]

جميله ما شاء الله

[adelghanem]

ﺍﻟﻒ ﻣﺒﺮﻭﻙ
ﺷﻜﻠﻪ ﺟﻨﺎﻥ
ﻳﺎﺭﻳﺖ ﺍﻟﻤﺎﺭﻛﻪ ﻭﺍﻟﺴﻌﺮ
ﺗﺒﻘﻰ ﻣﺸﻜﻮﺭ

[الجنرال]

شكرا ليكوا يا جماعة

الجهاز ده انا اشتريته من واحد كان مركبه فى عربيته شهرين .. ولما باع العربية فك الجهاز وانا اشتريته منه لوحده

فانا الحمد لله واخده بسعر كويس .. وحالته بصراحة ممتازة كانه جديد

بالنسبة للماركة فهو ملهوش ماركة .. هو غالبا جهاز صيني .. لكنه شغال كويس

[akmm]

الف مبروك ................. وما شاء الله .

[midoooocomm]

اولا يا باشا الف مبروك وربنا يباركلك فيه

ثانيا ياريت تقولنا السعر والمكان اللي ركبت فيه ومتخافش احنا مش بنقر احنا بنحسد بس هاهاهاها

لأ بجد علشان لو هنشتري محدش يضحك علينا وكمان تفاصيل التركيب والصانيعي عمل ايه ؟؟والمكان

فين ؟؟؟

شكرا على الافادة

[الجنرال]

الجهاز انا سألت عليه فى كذا مكان .. كلهم قالولي انه في حدود 2900 الى 3200 جنيه .. (ده طبعا فيه جي بي اس)

وانا دخلت دورت علي الجهاز بره في الصين وهونج كونج ولقيته هيبقى بحوالي 2200 جنيه تقريبا

انا اشتريته من الراجل اللى كان بيبيعه ده ب 1500 جنيه

التركيب اخد حوالي 80 جنيه (كتير شوية بس يلا الحمد لله)

بصراحة كنت خايف من اللى بيركبه ده لحسن يكون مش فاهم ويبوظ حاجة فى العربية .. لكن بصراحة الراجل كان كويس .. ركبته في محل اكسسوارات العربيات فى اكتوبر

تركيب الجهاز الدي في دي ماخدتش في ايده ربع ساعة .. تركيب الكاميرا ودفن الكابل بتاعها هو اللى اخد منه وقت حوالي نص ساعة تقريبا

المشكلة او العيب فى الموضوع بس للاسف شر لابد منه .. هو انه لازم يفتح الضفيرة علشان يطلع الكابل بتاع الـ Reverse علشان الكامير تشتغل اول ما تجيب الـ R . طبعا دي مشكلة فى الضمان لكن ان شاء الله خير ربنا يستر

اي تفاصيل تانية انا تحت امركو

[S O P H O S]

ما شاء الله
الف مبروك

[lenasam]

ماشاء الله
الف مبروك