دي لو شيروكي.. ميحصلش كده !!!

[Karim_El_Wa7sh]

آه واللهِ زي مبقولكو كده.. من صدمتي مش لاقي حاجة تانية أوصفلكم بيها اللي حاصل معايا في السيراتو في معدل سحب أو استهلاك البنزين...
سريعا مش حطول عليكم.. أنا لسة شاري سيراتو وكيل 2013 الفئة التالتة , ماشية حوالي 18 ألف كيلو.. وكشفت عليها وعالموتور ولقيت الدنيا تمام.. فتوكلت على الله وجبتها..
لسة بمشي بيها بعد مافاولتها فالبنزينة, وكالعاده زي أي واحد لسة جايب عربية صفرت العداد عشان أشوف كده سحب البنزين اخباره إيه !!!!!
وهنا المصيبة... العربية تقريبا مشيت 270 كيلو.. والتانك.. خلص.. !!!!!
آه واللهِ زي مبقولكو كده.. 270 كله والمؤشر خلاص على آخر علامة.. طبعا مخبيش عليكوا إن ده معناه إني كنت مش مصدق سرعة نزول المؤشر قدام عنيا خلال ال 270 كيلو اللي مشيتهم دول ..
كلمت واحد صاحبي معاه سيراتو 2012 وسألته عن المصيبة دي ممكن تكون إيه ... قال لي المفروض إني في الصيانة الجاية.. اللي هي صيانة ال 20 ألف .. حغير بوجيهات.. وممكن تكون هي السبب..
بس أنا مش قادر اتخيل إن مشكلة بوجيه تعمل كده في السحب.. بصراحة .. بدعي ربنا تطلع حاجة بسيطة و خايف وحاطط ايدي على قلبي مش عارف ده ممكن يكون نتيجة إيه !!!!
قلت اسالكوا.. واشوف لو عندكو رد ؟؟؟

[mastr_n]

كدة فى حاجة مش مظبوطة
اسنهلاك عالى جداااا
بص شيك على ثيرموستات الكوعة ممكن تكون مش موجودة
واكشف على العربية كومبيوتر تانى وان شاء اللة تتحل مشكلتك

[J A G U A R]

ان شاء الله بسيطه

[Dr.M_baz]

ضروري برده تشوف فلتر الهوا و ضغط الكاوتش.

[ابو لؤى]

ضروري برده تشوف فلتر الهوا و ضغط الكاوتش.

معقول الفلتر وضغط الكاوتش يعمل كل ده

[amr011111]

المفروض تفول تانى وتشوف العربيه خدت كام لتر
وبعدين شوف المعدل

[شريف السيد]

سيراتو

انا معايا الشكل الجديد معدل استهلاك 9 لتر لكل 100 كيلو فى وسط البلد ودة متوسط استهلاكى لاول الف كيلو

[محمد بدر]

لأ أكيد في حاجة غلط
أعمل زي مالراجل المحترم قلك جرب فول تاني
بس لازم تقف جنب عامل البنزينة وتتأكد ان البنزين وصل للزور الموضوع ده لوحده ممكن يفرق اكثر من 12لتر

[aliabdo]

فول تاني و اظبط الكوتش و اطلع على التوكيل اعمل صيانه ال 20 عشان تبقى فى السليم

[borio1704]

فيه حاجات كتير ممكن تخلي استهلاكك عالي...

عموما.. أهم حاجة تخليك تعرف توفر في البنزين إنك تجيب معدل استهلاك البنزين في تابلوه العدادات باستمرار قدامك.


لو عربيتك سيراتو الشكل الجديد... خلي الشاشة الوسطانية تجيبلك المنظر ده:




ولو عربيتك الشكل القديم.. خلي الشاشة تجيبلك الرسمة الوسطانية اللي في الكاتلوج دي




في الحالات المعتادة.. المفروض إن معدل الاستهلاك اللحظي بيبقى في حدود 20 لتر /100 كم في وسط البلد مع دوسة متوسطة على دواسة البنزين

ولو على الصحراوي... معدلك ممكن يوصل لحد 4 لتر / 100 كم (4 لتر بس)



دلوقتي نيجي لإيه اللي ممكن يزود استهلاك البنزين:

1- رجلك تقيلة على البنزين وعايز العربية سريعة باستمرار... خف رجلك شوية.
2- فلتر الهوا مسدود ... غير الفلتر بواحد تاني جديد
3- الكاوتش ناقص هوا كتير .. اظبط الهوا على 32 زي ما الكتالوج بيقول (على البارد).. ولو على الساخن اظبطه على 36
4- البوجيهات ممكن تكون قديمة وبتخلي البنزين (ني)
5- شيك على حساسات الأيدل لو حاسس إن العربية مبرجلة
6- زوايا العجل مش مظبوطة... روح ظبط الزوايا
7- الزيت المستخدم تقيل وغير مناسب... استخدم زيت تخليقي خفيف ويفضل 5w-30 (ده المكتوب في الكتالوج)
8- فيه وزن زيادة في العربية... شيل أي أوزان مالهاش لازمة في العربية
9- العربية بتشتغل على الواقف كتير... قلل من تسخين العربية واتحرك بيها بعد 10-15 ثانية من تشغيلها علشان تسخن بسرعة.


شوف إيه اللي موجود عندك من دول وحاول تصلحه

ونصيحة... اقرا كتالوج العربية



...

[احمد المصرى]

فول العربيه وشوف عمليا بعيد عن كمبيوتر السياره هتاخد كام لتر ومعدل الاستهلاك قد ايه لان ممكن يكون عيب عوامه لا اكثر ولا اقل وحصل معايا نفس العيب بالظبط وطلع انه عيب عوامه وبيتصلح ب 10 جنيه مش اكتر فول تانى وشوف هتاخد كام لتر