حدفة في كيا سيراتو 2014

[amir_said7]

صباح الخير...
الحمد لالله جبت سيراتو 2014 EX/FO من توكيل السبع و رخصت يوم السبت,,, بس لاحظت حاجة ممكن حضراتكو تفيدوني فيها ...
الطارة بتاعة الدركسيون مش بتثبت اوي يعني مش عدلة بتلعب علي طول مع الطريق,, انا مش عارف دة عيب في علبة الدركسيون و لا هو الباور الكهرباء كدة خفيف بزيادة و انا مش متعود عليه علشان كان معايا sunny 2009 قبل الكيا.
و كمان حاسس بحدفة خفيفة ناحية الشمال بس انا هروح اضبط الكاوتش نيتروجين النهاردة.

معلش طمنوني لاني قلقان اوي و خايف ليكون فيها عيب ولا حاجة .... شكرا

[الجنرال]

لا متقلقش .. عندي نفس المشكلة ورايح يوم الخميس ازبطها فى التوكيل

انت بتحتاج تزبيط زوايا .. ممكن تعملها بره (بس مكلفة اخر مرة سألت كانت ب 80 جنيه) او تروح تعملها فى التوكيل .. بس خلي بالك لازم تحجز زوايا

يعني لما تتصل بالتوكيل تحجز معاد للصيانة، لازم تقوله انا عايز احجز زوايا واتزان كمان (دي الخدمة الوحيدة اللى بتحتاج حجز قبلها علشان بتاخد وقت)

والف مبروك العربية الجديدة وربنا يديك خيرها ويكفيك شرها ويحفظهالك ان شاء الله

[hi_nmr]

اه البور الكهربا حفيف جدا دا العادي
بالنسبه للحدفه دي لازم تظبط زوايا
النيتروجين ملوش علاقه لا بالحدفه ولا بلعب الطارة

[amir_said7]

شكرا ليكم يا جماعة طمنتوني,,, بس هو معقول العربية لسة جديدة وعملة 150 كم و اعملها ضبط زوايا ؟؟؟

[spidars]

ده في الجنط 17 في السيراتو الجديده بحارب معاها علشان تحود يمين او شمال

[man_22]

شكرا ليكم يا جماعة طمنتوني,,, بس هو معقول العربية لسة جديدة وعملة 150 كم و اعملها ضبط زوايا ؟؟؟

أي عربية جديدة لازم تروح تربط عفشة يعنى تراجع على كل مسمار تتأكد انه تمام مع ظبط زوايا

[svneleven]

ممكن يكون الكاوتش الشمال مريح شوية عن الكاوتش اليمين.

[hi_nmr]

عادي جدا انا استلمت عربيتي كانت عامله 9 كم ولقيتها بتحدف شمال رجعتلهم تاني ظبطولي زوايا
بس انا في السعوديه واعتقد مصر نفس الحكايه

[Ahmed.Essam]

زود نتروجين وبعدين رصص وبعدين ظبط زوايا ولو الطارة معوجة يعني مش مستقيمة ظبطها بس من غير ما تلعب في علبة الدركسيون

[J A G U A R]

رصص واظبط زوايا والف مبروك

[2CODE]

بسيطة ان شاء الله ولا ازيد على كلام الاخوة لان كلامهم صحيح 100%

بالنسبة للباور هو خفيف جداً وبعتبر باور كيا عموماً احلى باور شفته في حياتي ممكن تحركه بصباعك الصغير مش بأيد واحده !!!!!!

[amir_said7]

لا متقلقش .. عندي نفس المشكلة ورايح يوم الخميس ازبطها فى التوكيل

انت بتحتاج تزبيط زوايا .. ممكن تعملها بره (بس مكلفة اخر مرة سألت كانت ب 80 جنيه) او تروح تعملها فى التوكيل .. بس خلي بالك لازم تحجز زوايا

يعني لما تتصل بالتوكيل تحجز معاد للصيانة، لازم تقوله انا عايز احجز زوايا واتزان كمان (دي الخدمة الوحيدة اللى بتحتاج حجز قبلها علشان بتاخد وقت)

والف مبروك العربية الجديدة وربنا يديك خيرها ويكفيك شرها ويحفظهالك ان شاء الله

ممكن حضرتك لما تروح و تزبطها تقوللي عملت اية بالضبط و تطمني,,, حضرتك رايح توكيل اية و عربيتك عاملة كام كم؟؟؟