تجربتي الشخصيه مع كيا ريو 2013 خليجي سيدان

[ebeid_mahmoud]

انا اشتريت الريو سيدان خليجي من حوالي سنه و العربيه دلوقتي عامله 11000 العربيه موديل 2013 بس اجزاء الموتور مكتوب عليها نوفمبر 2012 العربيه شكلها جميل نسبيا مقارنة بالعربيات اللي في نفس الفئه. الباور بتاعها في منهي الجمال و تكيفها قوي وبالنسبه للوسع فالعربيه تبان انها صغيره انما هيا في الحقيقه صالونها معقول جدا وشنطتها يتشيل في السفر و بالنسبه لعفشة العربيه فالعفشه ناعمه قوي و ثبات العربيه مش بطال نيجي بقي للمهم وهو استهلاك البنزين و سحب العربيه و الكلام اللي ان حقولوا ده من الاخر علشان الناس ترتاح ------------- اولا استهلاك البنزين و انت طافي نظام ECO 240 وانت مشغله 270 طيب السؤال هل الاستهلاك ده عالي من وجهة نظري هو عالي شويه بس الموضوع مش كارثي ليه: لان العربيه دي سعة التنك يتاعها 43 و بتنور عند 33 بالضبط وممكن باردوا ال 33 لتر دول يدوك اكتر من 300 كيلو لو انت ما بتشغلش التكيف ليل نهار او لو يتمشي علي طرق دائريه او بتسافر حتلاحظ ان في وفر كبير في الاستهلاك. طيب موضوع السحب خلينا نقولها علي بلاطه سحب العربيه ضعيف مقارنة بعربيات تانيه بس الموتور بيقدر يجمع سرعات عاليه انا جبت 180 علي طريق السخنه و عربيتي التانيه لانسر 2007 ما بتجبش السرعه دي طيب ليه سحب العربيه ضعيف هل ده بسبب الموتور رايي الشخصي لا المشكله ان دواسة البنزين كهربا وده بيعمل تاخير في فتح بوبابة الرشاشات و كمان وحدة التحكم ممكن تحتاج تعديل لسوفت وير طيب وان كنت ان ما جربتش اعمل تعديل السوفت وير في ابو رواش بس روحت للقاهره اوتو وقالي انه مش محتاج تعديل. ملاحظه تانيه بالنسبه لموضوع السحب فتيس الريو باردوا تقيل سنه ويمكن ده يكون باردوا ماثر. طيب ايه نصيحتي لاي واحد عايز يضبط سحب عربيته؟ اولا اتكد ان البوجيهات اللي راكبه NGK IR ودي بوجيهات راديوم سنها بيقبي رفيع بالنسبه للبوجهات العاديه و المفروض انها نازله في موديلات 2012 فما فوق ولو مش كده سعرها في التوكيل 500 جنيه و بتعيش 80,000 كيلو في المتوسط طيب تعمل ايه لو عربيتك فيها بوجيهات راديوم و سحبها مش عاجبك في الزحمه او في المطالع مع التكييف. بش يا سيدي في سائل اسمه اوكتين بوستر Octane booster علبه صفراء بتتباع في بنزينات كتير تمنها 28 جنيه ده بيرفع اوكتان البنزين فا بينعكس علي استهلاك البنزين العربيه بتعمل 370 كيلو في التفويله و بتبقي طياره بس لازم يتحط علي تانك فاضي و تفول عليه الحاجه التانيه ودي انا عملتا بنفسي ولا الحوجه للميكانيكية و التوكيل اني اشتريت مفتاح بوجيهات و فتحت سن الببوجيهات ومن بعدها بطلت احط الاوكتين بوستر بس انا عملتها بالوايم انما الاحسن انها تتعمل بالضبط علشان ما يبقاش في ضرر علي الموتور العربيه بقي سحبها كويس بعد موضوع فتح سن البوجيهات بس احيانا بحس بخنقة الفتيس علي المطالع و البنزين دلوقتي 340 ك في التفويله وما ننساش انا بقصد لما اللمبه بتنور يعني 33 لتر بيدوني دلوقتي 340 كيلو لو بقي حد عايز يقرا عن موضوع فتح سن البوجيهات ممكن يعمل بحث علي جوجل: Spark plugs Gap ودي كانت كل خبرتي وياريت نسمع من الناس خبراتهم و ارائهم عن العربيه دي.

[amr011111]

معدل استهلاك البنزين فى الاتوماتيك كل 100 كم بيستهلكوا من 12 لـ 13 لتر

[El Prince]

معدل استهلاك البنزين فى الاتوماتيك كل 100 كم بيستهلكوا من 12 لـ 13 لتر

يعنى الاوتوماتك عموما مش بيكمل 200 كم فى صفيحة البنزين ؟

[amr011111]

يعنى الاوتوماتك عموما مش بيكمل 200 كم فى صفيحة البنزين ؟

على كلام الناس من المنتدى هنا فيه ناس بتقول اوفر بكتير من كده وكنت قرأت مشاركه برضه عن استهلاك البنزين فى الريو ناس بتقول بتعمل 700 كم
بس طبعاً ظروف الطريق وطريقة السواقه تفرق
بس انا من ساعة ما جبت العربيه
بفول لحد الزور والمره اللى بعدها بشوف مشيت كام كيلو وفولت كام لتر الاقى معدل استهلاك البنزين كده شتا او صيف

[ebeid_mahmoud]

12او 13 لتر / 100 كم هو فعلا استهلاكي قبل موضوع البوجيهات وزي ما قلت ده استهلاك عالي ويمكن اعلي من 1600 وده اللي خلاني اعمل حركة البوجيهات بس موضوع 700 كيلو في التفويله ده خيالي شويه انا احسن معدل عملته اول ما اشتريت العربيه كان 260 كيلو في الصفيحة وكنت مسافر ساعتها

[shiko85]

حساب معدل الأستهلاك مش سهل لان فيه ظروف كتير بتأثر على الأستهلاك

[mac os]

على حسب كلام الوكيل لو العربيه بتعمل 190 كيلو فى الصفيحه يبقى كده طبيعى

[S O P H O S]

معدل استهلاك البنزين فى الاتوماتيك كل 100 كم بيستهلكوا من 12 لـ 13 لتر

حضرتك تقصد الريو
ولا اي عربية اوتو

[prooo]

تقييم اكتر من رائع للفتيس والموتور ....... انا جبت 200 بالعربيه على طريق السخنه والعربيه كانت باقصى حموله ..... كمان حابب اضيف معلومه .... ان الفتيس مبيسقطش النقله كويس من التاني للاول خصوصا على المطالع او وانا مشغل التكييف يعني انا ساعات اجيب الدواسه للاخر وميرضاش يسقط اقوم جايبها مانيوال ....... بس للتوضيح ده مش عيب سوء فتيس ده عيب سوفت وير ..... مثلا برده الغيار التالت بيجيب مهايا لغايه 140 وده اقوى غيار في الريو ....... انا من رائي ان الفتيس ده لو بقه 6 سرعات العربيه كانت هتبقى حاجه تانيه ..... وبالنسبه للبوجيهات والبنزين انا عامل حكايه الاير جاب بتاعه البوجيهات دي من اول 3000 كيلو وفعلا فرقت معايا في السحب وال33 لتر يعملوا معايا 350 من غير تكييف جوه البلد وعلى الطرق السريعه ال 33 روحت بيهم الغردقه واللمبه نورت عند مدخل الغردقه والله ومشغل التكييف طول السكه ....... عموما مستنيين اي تحديث للسوفت وير ...... وانا في المجمل مبسوط الحمدلله من العربيه .... واي استفسارات انا في الخدمه

[ebeid_mahmoud]

شكرا لذوقك يا استاذ عمرو وبالنسبه لموضوع السوفت وير انا كنت عايز اعرف منك انت عملت تحديث قبل كده؟ وعربيتك موديل كام وخليجي ولا مصري لاني روحت لكيا /محمد ذكي اللي في القطاميه وقالولي ما فيش حاجه اسمعها تحديث (رد غريب اوي الصراحه) و روحت للقاهره اوتو فالمهندس المسئول وهو راجل محترم وصل العربيه باللاب توب وقالي انا حعملك تحديث ومن غير فلوس بس الصراحه ما حستش باي فرق في العربيه. اللي فرق معايا هو بس موضع فتح اطراف البوجيهات فلو انت عملت تحديث ياريت تقولي فين لاني انا حاسس ان موتور العربيه قوي انما الفتيس هو اللي خانقه وفعلا نفس الاعراض اللي انت قلت عليها بتحصل معايا في المطالع و الدليل اني لما بمشي علي المانيوال العربيه فعلا بتبقي حاجه تانيه خالص

[mhkorayem]

تقرير جميل عن العربيه وهي بصراحه عربيه جميله فعلاً الواحد مش نادم ابداً انه جابها
بس بخصوص البنزين اعتقد انه اتعدل لاني جايب العربيه من 3 شهور وكيل واستهلاك البنزين مش بيزيد في المتوسط عن 7 لتر لكل 100 كم والاستهلاك نصه في الزحمه والنص التاني طرق سريعه وبشغل التكيف تقريباً نص الوقت والسواقه بشكل عام سواقه هاديه يعني من غير شد وحرق وكلام من ده
سؤال بقى بخصوص التغير للقياده المانيوال هل له اي مشاكل على الجيربوكس مع الوقت والاستخدام الكتير ولا لأ عشان انا من ساعة ما جبت العربيه مستخدمتهوش
وهل له تاثير على استهلاك البنزين سواء بالزياده او النقصان

[prooo]

لا شكر على واجب ..... انا عربيتي خليجي سيدان هاي لاين موديل 2013..... واول مشتريت العربيه حسيت بموضوع الخنقه ده روحت توكيل كيا فرع روكسي وحطولي العربيه على اللاب توب وقاللي عربيتك محتاجه تحديث .... وبعد التحديث هيعملوا موضوع البوجيهات والعربيه ظبطت شويه بعد كده ... بس فعلا هيا ادائها ممكن يبقى احسن من كده بكتير لو اتظبط السوفت وير ..... عشان موضوع دواسه البنزين الكهرباء.....

[prooo]

تقرير جميل عن العربيه وهي بصراحه عربيه جميله فعلاً الواحد مش نادم ابداً انه جابها
بس بخصوص البنزين اعتقد انه اتعدل لاني جايب العربيه من 3 شهور وكيل واستهلاك البنزين مش بيزيد في المتوسط عن 7 لتر لكل 100 كم والاستهلاك نصه في الزحمه والنص التاني طرق سريعه وبشغل التكيف تقريباً نص الوقت والسواقه بشكل عام سواقه هاديه يعني من غير شد وحرق وكلام من ده
سؤال بقى بخصوص التغير للقياده المانيوال هل له اي مشاكل على الجيربوكس مع الوقت والاستخدام الكتير ولا لأ عشان انا من ساعة ما جبت العربيه مستخدمتهوش
وهل له تاثير على استهلاك البنزين سواء بالزياده او النقصان

طبعا ملوش اي تأثير لو استخدمته صح ولو مستخدمتوش خالص مفيش اي مشكله برده ..... وهو كمان عليه protection .... عشان لو استخدمته غلط ... بمعنى انك لو نسيت تنقل الفتيس هينقل لوحده .... ولو حبيت تجيب غيار مش وقته او مش مكانه مش هيخليك تنقل .....

[Mohab555]

تقرير ممتاز ... الف شكر على المجهود
رجاله الريو السيدان عاملين شغل عالى معانا ...