استفسار عن كيا ريو

[ABDULLAH AHMED]

هيا عربية شكلها حلو

بس عايز اعرف سعر العربية

وبالتوفيق

[bakr_80]

السلام عليكم و رحمة الله,
أنا فعلاً من المهتمبن جداً بالسيارة كيا ريو و بفكر إن شاء الله أجيبها كأول سارة ليه .. أدعوا لي بارك الله فيكم .. انا أصلي كمان لسه بتعلم.
أول مرة أنا شوفتها كان عند محمد زكي اللي في القطامية وهو برده عنده مركز الخدمة علشان هو وكيل لكيا .. و من ساعة ماشوفتها دخلت دماغي اوي
بحكم أني لسة مش خبير في في القيادة و المواتير و الفنيات هاتكلم عن إنطباعي عنها كشخص عادي جداً, العربية من الداخل بسيطة بس في الوقت نفسه شيك أوي ماشاء الله وواسعة و المقاعد الخلفية مريحة واللي يقعد ورا هايكون مستريح وشكلها العام جميل أوي, فيها شبه كبير من الأكسنت الجديدة بس فعلاً اجمل و انا بصراحة بفضل كيا عن هيونداي
الشنطة ماشاء الله واسعة و عميقة و تشيل حاجات كتير و يوجد فيبر في الأجناب و الخلف زي اللي في الأكسنت بس أعرض و شكله اشيك بصراحة.
كيا ريو تدخل في مضمار سباق السيارات من 70000 إلي 85000 جنية بس أنا رأي المتواضع جداً أنها من أفضلهم بس مش واخدة حقها خالص.

سعرالمانيول 81000
الأتوماتيك 87000
إضافة بسيطة,,, الموديل الهاي لاين High line يزيد عن العادي:
1.بوسادة أمان هوائية عند السائق.
2. الزجاج الأمامي و الخلفي كهربائي.
3. الكاسيت الأصلي و ده بصراحة احلي حاجة في الهاي لاين, شكله شيك جداً و مخلي شكل التابلوه جامد.

التوكيل عنده الهاي لاين مانيول و أتوماتيك و المفروض ان سعرهم زي العادي بس تقريباً بالحجز . اللي يحب أي لإستفسار أنا معاي موبيل الراجل بتاع المبيعات و ممكن أبعته لآي حد يحب يعرف تفاصيل أكتر.
ياريت اللي عنده معومات أكتر يفيدنا بيها أن شاء الله.

أسف للإطالة

أبوبكر

[hanystar]

السلام عليكم

ممكن صور للعربيه وهو اخر شكل ده بينزل من سنه كام

ارتفاع العربيه عن الارض عامل ايه مع المطبات

جزاكم الله خيرا

إرتفاع العربية عن الأرض 14.7 سم
ودى صور ليها

[thunder_are]

الريو عربية محترمة جدا..
أنا لسه شاري ريو أتوماتيك 2008 الإصدار الخاص اللي فيه air bag و فيه 4 زجاج كهرباء وفيه السي دي بلاير الأصلي اللي بينزل من شركة كيا وهو صوته حلو جدا...
بس طبعا هوا مش متوفر حاليا كان عدد محدود جدا
والعربية عاملة 4000 كيلو لحد دلوقتي...
أهم ملاحظاتي على السيارة بشكل عام:
1. شكلها حلو وغير منتشرة ووسعها معقول على خلاف مايبدو عليها من بره.
2. سحبها جيد جدا واستهلاك بنزين معقول بس لما تشغل الturbo بتستهلك بنزين أكتر.
3. عربية قوية جدا في التحمل.

السلبيات:
1.حتى الآن أنا ملاحظ إن ثباتها مش جامد ... مقبول يعني ... وكمان التسارع بعد 140 بيقل شوية.
2.صوت الموتور أعلى قليلا من الأفيو

وأي استفسار أنا حاضر

[hbtsherif]

الريو عربيه جميله معايا بقالها شهرين ربنا يبارك لك فيها

[نور العمر]

هو في كيا ريو هاتش باك .. ولو مستعملة بكام موديل من 2004 مثلاً وإمكانياتها إيه
وشكرا

[د.أحمد سمير]

السلبيات:
1.حتى الآن أنا ملاحظ إن ثباتها مش جامد ... مقبول يعني ... وكمان التسارع بعد 140 بيقل شوية.
2.صوت الموتور أعلى قليلا من الأفيو

شعور إن الثبات مش جامد ده راجع لعفشتها الرياضية .. عدم الثبات يعني ضعف القدرة على التحكم في السيارة في السرعات العالية .. أو عومان السيارة أثناء الملفات على سرعة عالية ..
وعن تجربة لمدة سنتين العربية ثابتة لحد 200 كم ساعة يعني قرب تقفيل العداد ..
صوت الموتور بيعلى ويكون مسموع عند 3500 RPM لكن قبله على الوضع الاقتصادي بيكون هادئ للغاية ..
يمكن السلبية الوحيدة بتكون إن صوت التكييف عالي وبيحسسك بصوت الموتور .

[ah_mani]

انا كنت محتاج اعرف اعطالها ايه ؟ وكمان السعر العادل لموديل 2002 كام ؟واسعار قطع الغيار ؟ ولكم جزيل الشكر مقدما

[thunder_are]

شعور إن الثبات مش جامد ده راجع لعفشتها الرياضية .. عدم الثبات يعني ضعف القدرة على التحكم في السيارة في السرعات العالية .. أو عومان السيارة أثناء الملفات على سرعة عالية ..
وعن تجربة لمدة سنتين العربية ثابتة لحد 200 كم ساعة يعني قرب تقفيل العداد ..
صوت الموتور بيعلى ويكون مسموع عند 3500 RPM لكن قبله على الوضع الاقتصادي بيكون هادئ للغاية ..
يمكن السلبية الوحيدة بتكون إن صوت التكييف عالي وبيحسسك بصوت الموتور .

أنا معاك إن صوت الموتور قبل 3500 بيبقى هادئ..
ولكن مشكلة الثبات دي أكيده وخاصة فوق 140 أو 150 عشان وزن السيارة أصلا مش تقيل..
أنا أعلى سرعه جبتها بيها كانت 175 كم وطبعا محاولتش أجيب أكتر من كده عشان حضرتك عارف إنها مفيهاش أنظمة فرامل تخليك تفتح وأنت مطمن...
وعموما أنا شايف إنها سيارة عملية وموفرة في البنزين وشكلها شيك

شكرا على توضيحك

[د.أحمد سمير]

شكراً لذوقك

[tamohsen]

الريو عربية محترمة جدا..

2. سحبها جيد جدا واستهلاك بنزين معقول بس لما تشغل الturbo بتستهلك بنزين أكتر.

وأي استفسار أنا حاضر

ايه موضوع التربو؟
ممكن حضرتك تشرح اكتر؟

[hbtsherif]

السلام عليكم .
أنا معايا ريو 2006 بس مانيوال . العربيه ممتازه تتش وود بقالها 3 سنين بس معرفش التوكيل عامل إيه أنا ماتعاملتش معاه لغاية دلوقتى . إمكانياتها مناسبه جدا.

أتوكل على الله

[hbtsherif]

هو إيه موضوع التربو ده ومكانه فين فى العربيه. ومعدل إستهلاك البنزين معاه بيزيد قد إيه ؟

[GoldenEye]

ممكن ا عرف كيا ريو موديل 2001 1300 تعمل كام؟؟؟؟

[Eng_yahia_ali]

تربوا ده هو اعلى درجات التكييف

اعتقد ال تربوا ده هو اعلى درجات التكييف واستخداماته ونستخدمه بس اما تكون راكن العربيه تحت الشمس في الصيف وعاوز تبردها بسرعه