تقرير مبدئي عن نيو سيراتو بعد 2000 كيلو خليجي

[mo3tsem]

بصوا بقي .. ده التقرير الأول للعربيه
كنت هحس بالنداله لو ممكنتش كتبت غير سطر حتي .. بعد ما ساعدتوني في الأختيار :D
وإن شاء الله هتابع معاكوا
اولاً العربيه سيراتو خليجي 2014 بترولي عامله 2000كم
( ايرباج- تاتش سكرين - بلوتث - كاميرا - توكيل aaa )
بــ 142.5 الف ج

اولاً مميزات العربيه:

بسم الله ما شاء الله جميله جداً وواسعه جداً وسحبها كويس .. بس بقي احلي بعد ال الف كيلو عشان بقيت بجري بيها ( بعد التلين يعني )
1-بالنسبه للثبات كويس جداَ لحد 170
2-تقفيل العربيه من جوه عالي وخامات كويسه جداً
للعلم العربيه اول فئه خليجي
3-التكيف قوي
4-عاليه الي حد ما .. يعني محتش صراحه غير مره واحده غير لو كان فيه مطب عااالي اوي والعربيه كانت محمله محمله يعني
لكن لو 5في العربيه وفيه شنطه عاديه ورا العربيه مش بتحك في المطب

عيوب العربيه:

1- الفرامل ضعيفه شويه علي العربيه
2- شويه كده وتلاقي في صفاره بتروح وتيجي لما بتدوس فرامل ( بس بيتهيألي عادي يعني )
3- الكاوتش اللي نازله بيه مش حلو خااالص ( هغيروا واركبلها جنط سبور ان شاء الله )
4- العفشه ناشفه شويه ( بس بتتعدل حاجه بسيطه لما العجل يتنفخ نيتروجين )
5- ظهرت معايا مشكله كده في الفرامل كنت بهدي لقيت العربيه قفشت مره واحده ( بس حصلت مره واحده بس ولما روحت التوكيل قالولي الفرامل مفيش فيها حاجه ) قلت ممكن اكون انا دوست دوسه جامده ولا حاجه

انا قلت كل اللي حصل معايا وان شاء الله لو فيه هتابع معاكوا اول بأول
واي سؤال انا في الخدمه
والف شكر يا رجاله :)

[Dr . Mohamed]

ألف مبروك
ربنا يديك خيرها و يكفيك شرها
أغرب شئ ان حضرتك بتقول السيراتو عالية الى حد ما ، و فى نفس الوقت بتقول ان فراملها ضعيفة
العربية من رأيي ارتفاعها مناسب مش عالى ، و الفرامل أكثر من ممتازة ، أكيد حضرتك عندك مشكلة فى الفرامل
الكاوتش Nexen سئ نوعاً ما خصوصاً فى فواصل الكوبرى
لكن مجملاً سيارة ممتازة و الحمد لله

[mo3tsem]

ألف مبروك
ربنا يديك خيرها و يكفيك شرها
أغرب شئ ان حضرتك بتقول السيراتو عالية الى حد ما ، و فى نفس الوقت بتقول ان فراملها ضعيفة
العربية من رأيي ارتفاعها مناسب مش عالى ، و الفرامل أكثر من ممتازة ، أكيد حضرتك عندك مشكلة فى الفرامل
الكاوتش nexen سئ نوعاً ما خصوصاً فى فواصل الكوبرى
لكن مجملاً سيارة ممتازة و الحمد لله

انا مش قصدي انها عاليه عيب انا قصدي انها مش بتحك في المطبات والأرتفاع مناسب زي ما حضترك قلت
وبالنسبه للفرامل فهي فعلاً ضعيفه شويه علي العربيه .. ممكن يكون مشكله عندي انا فعلاً .. ربنا يسترها معاك ان شاء الله

[mr.moustafa]

الفرامل كويسة جدا و لكن الكاوتش بصراحة جيد بس يعني ناشف شوية و صوته عالي إلى حد ما

[Dr . Mohamed]

انا مش قصدي انها عاليه عيب انا قصدي انها مش بتحك في المطبات والأرتفاع مناسب زي ما حضترك قلت
وبالنسبه للفرامل فهي فعلاً ضعيفه شويه علي العربيه .. ممكن يكون مشكله عندي انا فعلاً .. ربنا يسترها معاك ان شاء الله

بالنسبة للفرامل ممكن تطلع طريق مفتوح و تجربها واحدة واحدة
و ممكن يكون مشكلة رجلاش
حضرتك عندك abs ؟ و لو انها عندى كويسة من غير abs
طيب هل بتسمع صوت من التيل او الطنابير ؟
مشوار دواسة الفرامل بعيد و لا شغالة كويس من اول لمسة ؟

[ضى القمر]

الف مبرووووك

[spidars]

حضرتك الفرامل عندك طنابير قدام وورا يعني الي وري زي القدام اصل حضرتك يتقول كلام غريب في موضوع قوه الفرمله

[Ros]

فى مشكله فعلا صوت فقط مع الفرامل من الخلف مركز كيا سيرفيس اللى فى المعادى بيظبطه فى3 ساعات بس غير ايام السبت و الاحد

[bakkarahmed]

انا مختلف مع حضرتك شويه في الانطباع العام
الارتفاع ..متوسط يعني لا واطيه ولا عاليه بس مناسبه
الفرامل اكتر من ممتازه ولو عندك الفرامل اللي ورا ديسكات كانت هاتبقي احلي واحلي
العفشه وسط بالمقارنه بالعربيات التانيه وهيا افضل بمراحل من الشيب اللي فات وافضل من الالنترا في موضوع تعويم الشنطه اللي ورا

متفق معاك في ان الكاوتش كان ممكن يبقي افضل من كده
الثبات والتكييف ممتازين

[mse920]

بالنسبه للصفاره اللي فى الفرامل أنا كنت فى التوكيل أبورواش وإشتكيت من الحكايه دي وبعد الكشف عليها قالولي إن الطنابير والتيل الخلفي محتاجين يتغيرو فى الضمان ( بس مكنش موجود عندهم وقتها والمفروض إنها لما توصل يكلموني ) علي الرغم إن الفرامل معايا كويسه والصفاره اللي كنت بسمعها أحيانا مفيش لها صوت حاليا
أنا أصلا إشتكيت من الفرامل وانا فى التوكيل كنوع من الدلع ( ضمان بقي ) والمفاجاة تيل وطنابير

الكاوتش سئ جدا( صوته عالي جدا)
العفشه احساسي انها اتحسنت مع الوقت

[omar.28]

الف مبروك و ربنا يعطيك خيرها و يبعد عنك شرها إن شاء الله كنت عايز أسال بس هو أنت نزلتها من الخليج و لا أشتريت من حد هنا،و لو منزلها إيه نظام الجمارك دفعت كام و كده لأني فكرت أنزل بس عايز أعرف تقديريا كام شكرا و مبروك مرة تانية

[mo3tsem]

يا جماعه العربيه مفيهاش abs
وفعلاً في صوت صفاره بس بتروح وتيجي يعني مش علي طوول
وبالنسبه للمطبات .. يمكن انا اللي بشل اللي ورايا وانا باخد المطب عشان كده مش بتحك .. ههههههههه

[mo3tsem]

الف مبروك و ربنا يعطيك خيرها و يبعد عنك شرها إن شاء الله كنت عايز أسال بس هو أنت نزلتها من الخليج و لا أشتريت من حد هنا،و لو منزلها إيه نظام الجمارك دفعت كام و كده لأني فكرت أنزل بس عايز أعرف تقديريا كام شكرا و مبروك مرة تانية

الله يبارك فيك يا باشا
بص يا باشا انا شاري العربيه من هنا من عند سمير ريان
وبالنسبه انك تجيبها من بره .. فأعتقد هي هي
كل اللي هيفرق معاك ان كل حاجه في العربيه بتكون اصليه ( زي الكاميرا والكاسيت ) مع اني الكاميرا عندي احسن من النوت 3 ( ربنا يبارك لنا فيها ) :d
دي وجهة نظري .. العربيه ضمان تربل ايه
وفي اعتقادي انه كويس ( يعتبر لسه مجربتهوش لأني عملت صيانه واحده بس )

وان شاء الله ربنا يدلك علي الأصلح ويباركلك في هتجيبه ان شاء الله

[mo3tsem]

الف مبرووووك

الله يبارك فيك يا باشا

[mo3tsem]

انا مختلف مع حضرتك شويه في الانطباع العام
الارتفاع ..متوسط يعني لا واطيه ولا عاليه بس مناسبه
الفرامل اكتر من ممتازه ولو عندك الفرامل اللي ورا ديسكات كانت هاتبقي احلي واحلي
العفشه وسط بالمقارنه بالعربيات التانيه وهيا افضل بمراحل من الشيب اللي فات وافضل من الالنترا في موضوع تعويم الشنطه اللي ورا

متفق معاك في ان الكاوتش كان ممكن يبقي افضل من كده
الثبات والتكييف ممتازين

انا الأنطباع العام عن العربيه .. ممتازه
انا الفرامل بتهدي من اول لمسه في السراعات بعد الــ 100 لكن تحت ال100 هتلاقي العربيه مش عاوزه تقف