استلام كيا ريو 2015

[kimoo12]

السلام عليكم

انا الحمد لله حجزت كيا ريو 2015 dab + abs هاتش باك من عند الطارق في الاسكندرية

انا كنت عابز اعرف ايه الحاجات اللي ابص عليها و انا بستلم كمان هو مش بيدي اي هدايا هل ده عادي ؟؟

اصل الصراحة دي اول عربية ليا الحمد لله و مش عارف ايه المفروض اعمله وانا باستلم


و شكرا جزيلا ليكم

[Mohab555]

حاول تستلم العربية بالنهار افضل من الليل عشان تبص على صاج العربية وتطمن انه خالى من اى خرابيش او خبطات

2- انزع عند الاستلام الورق الملزوق على صاج السيارة سواء اللى على الكابوت او على السقف , وذلك للتاكد من بوية السيارة سليمة ولالا , لان الورق ده ممكن يكون مدارى تحت منه فرق لون لا قدر الله

3- شيك على الزجاج الكهرباء كله , وتاكد من فتحه وقفله , و تشوف هل فى صوت تزيق او اى مشكلة فى الزجاج لقدر الله

4- جرب الكاسيت وشوفه شغال ولالا , ومتنساش تسال هل بيجى معاه وصلة يو اس بى مثلا وليه ريموت ولالا بردوا , وياريت تكون واخد معاك اسطوانتين من نوعين مختلفين عشان تجرب الاتنين زي سوني وال جي مثلا, عشان محدش يتلكك ويقولك الاسطوانات نوعها وحش , وكمان خلى معاك فلاشة فيها قران مثلا اذا كان ينفع توصلها عليه

5- اسال على الضمان بتاع السيارة وضمان الكاسيت والكتالوج بتاع العربية

6- شيك على الروافع مثل : الولاعة بتاعت العربية وطفاية السجاير وعلى الاريال

7- شيك وبص على المياة بتاعت السيارة من ميه مساحات والقربة والردياتير والبطارية عشان بس لو فى حاجة نقصة مش تمشى على عماك وتزودها فى اقرب مكان

8- اتاكد من وجود الاستبن (الكاوتش الاحتياطى )

9- نبص على شنطة العدة

10- نقعد على الكراسى اللى قدام ونحرك فيها لقدام وكمان لورا عشان نشوف هل فيها اى مشكلة ولالا , وكمان احزمة الامان

11- تشغيل الانوار كلها ونجربها سواء الانوار الداخلية جوة السيارة من نور الصالون والطابلوه ومن بره الفوجات والكشافات الامامية ولمبة الاستوب والفوانيس الخلفية

12- تتاكد من عمل المساحة وتشغل المياه بتاعت المساحة كمان

13- تفتح الابواب الاربعة والكابوت والشنطة وتشوفهم بيفتحوا ويقفلوا بسهولة ومفيش مشكلة فيهم ولالا

14- نتاكد من ان السنتر شغال ونتاكد من الريموت شغال ولالا

15- ركز فى استلام المفاتيح , فى عدد المفاتيح والريموت اللى بيجوا مع السيارة

16- نبص على عداد الكيلومتر واهم حاجة انه لايزيد عن 70 كيلو وكدا كتير كمان

17- التاكد من ان التكيف شغال ,لانك حتشغله بعد 500 كيلو فتكون مطمن ان مفيش مشكلة .. كفائته مش حتكون قوية لان العربية لسه جديدة ومش حيبان تبريده فى اللحظة دى لانك حتشغله لمدة دقيقة او اتنين بالكتير عقبال ما ترغى مع البائع ,المهم عشان بس تكون مطمن ان كل حاجة تمام .. وتاخد بالك هل فى اى قلق وهى واقفة ولالا مع تشغيل التكيف

18- اتاكد من ان الماتور صوته ناعم وهادى فى بداية التشغيل

19- حرك الدريكسيون يمين وشمال عشان تتاكد من عدم وجود اى مشكلة وصوت تزيق , وكمان شوف ظبط الدريسكيون لفوق ولتحت اخباره ايه

20- سخن السيارة وبعد ماتسخن اتاكد من ان المروحة اشتغلت بتاعت الرديايتير ولالا

21- اذا كان السيارة فيها فتحة سقف , نطمن انها شغالة وكله تمام

اى استفسار تانى فى الريو تحت امرك

[kimoo12]

شكرا جزيلا
هو العربية بيجي معهاها العدة ؟

و موضوع الهدايا ده مش مع كل الوكلا ولا ايه ؟

[Mohamed_Ayman]

بص يا باشا الهدايا دى حسب المعرض واحيانا بتكون قابله التفاوض.
بس دايما مش بتكون قيمتها عالية اصلا فحتى لو مفيش كبر دماغك.

[DEVIL333]

الف مبروك

[Mohamed_Ayman]

بص يا باشا الهدايا دى حسب المعرض واحيانا بتكون قابله التفاوض.
بس دايما مش بتكون قيمتها عالية اصلا فحتى لو مفيش كبر دماغك.

تصحيح قيمتها مش عاليه


وألف مبرووك

[Ahmed G]

شيك علي الدواسات تكون بتاعت الريو الاصليه اللي هي سجاد وكتوب عليها بالعرض ريو
مش دواسات جلد وخلاص
الخطأ داه اخوك وقع فيه
والف مبروك ليك وربنا يباركلك فيها ويكفيك شرها :)

[S O P H O S]

مبروك مقدما تستلم علي خير ان شاء الله

[ahm.mega007]

باشا الطارق معرض محترم مبيدكش العربيه فيها حاجه بيجيب عربيات محترمه ولو لقدر الله فيها عيب صدقنى ده المصنع فقط لاغير ساعات بيبقا فية عربيات عيوب صناعه وتبقى صعب اى حد يعرفها ولله فى توكل على الله واشتريها انا جبت من عند الطارق جمب الناسجون لو تعرفة مسلم سيراتو هاى لاين سودا وهتلاقى مندوب هناك أسمو وليد دة بيخدم الى معاه جامد وبيجيب من الاخر لو عوزت رقمو هسبهولك انضف حاجه بصراحه محترم ومبروك مقدما

[axi0m]

مبروك عليك الريو

[kimoo12]

شكرا جزيلا ليكم بجد :)