ازاى بتحمى عربيتك من السرقه

[blazer]

السلام عليكم ورحمة الله وبركاتة
ربنا يحفظ عربيات الجميع من السرقه
بس ازاى السيراتو و الالنترا خصوصا موديلات الشكل القديم الى مفيهاش immobilizer بتتحمى من السرقات بغض النظر عن كلابشات العربيات و الكلام دا
يعنى هل فيه جهاز انذار محترم بيتركب بيحمى العربيه انها تدور غير بمفتاحها و بيحميها من السرقه عن طريق كسر الزجاج والكلام دا
و اجهزه تتبع العربيه الى بتخليك تقدر تتحكم فيها عن طريق الموبايل اى اخبارها
وهل لو لا قدر الله العربيه اتسرقت الحرامى مبيعرفش ان متركب فيها جهاز زى دا
ولو عرف مكانه و شال جهاز الانذار هل العربيه هترجع تشتغل تانى؟
معلش اسألتى كتير شوية

[yasserelshakwe]

ياريت اي حد يكون عنده معلومة ويعرفنا ينوبه ثواب

[msobhy]

الموضوع ده قتل بحثا
والنتيجه النهائيه
اى وسيلة تأمين عاديه ما هيه الا محاولة لتعطيل الحرامى فقط لا غير
طيب تعمل ايه علشان تأمن عربيتك
الاول لازم تفكر بشكل معكوس
بمعنى .....
لو عربيتك لا قدر الله اتسرقت يبقى انت خسرت ما بين 80.000 - 100.000 جنيه
طيب لو رجعت ودفعت فديه يبقى انت خسرت ما بين 30.000 - 50.000 جنيه بالاضافه انك هاتصرف على العربيه على الاقل 10.000 جنيه علشان تظبطها بعد سرقتها
يبقى انت تحط أسوأ الخساير قدام عينك وتشوف انت هاتدفع كام علشان تتلافى حدوث الخسائر الباهظه ديه

يعنى تعمل ايه
اى وسيلة تأمين ينفع تعملها فى العربيه اعملها
اللى راكب النترا وسيراتو ومش مأمنها ب 3 أو 4 حاجات يبقى اكيد بيهزر
طيب أمن عربيتى بأيه ؟؟؟؟؟؟؟؟؟؟؟؟
مع احترامى للجميع انا هاقول تأمن عربيتك ازاى ما عدا كذا خطوه انا عملها فى عربيتى بأيدى ومحدش يعرف ايه هما غيرى انا بس - وده اللى لازم توصل له
وسائل التأمين
جهاز انذار محترم
جهاز انذار محترم تو واى
فصل طرمبة البنزين مع الانذار
كلابش دريكسيون
كلابش عجل
GPS tracker
أزرار زى زرار النور تتركب على الكبوت وتتوصل بالانذار
زرارين فصل فى مكانين مختلفين فى العربيه


بعد كده والكلام ده على كل العربيات
اركن عربيتك فى مكان موثوق منه وبس - جراج - قدام بيتك مباشره
فيه محلات قديمه ومتهالكه بتكون مغلقه - المحلات ديه بتتأجر فى السنه ب 2000 أو 3000 جنيه - أجر لك محل واعمله جراج خاص بيك
بيع العربيه واخلص من الصداع ده أو انك تعمل الحل السحرى - سيب مصر

[Mohamed_1414]

متابع جدا لاني بشوف احيانا علي الفيس ناس عندها عربيات سيراتو اتسرقت

[blazer]

جهاز انذار محترم
جهاز انذار محترم تو واى
فصل طرمبة البنزين مع الانذار
GPS tracker
أزرار زى زرار النور تتركب على الكبوت وتتوصل بالانذار

شكرا على مشركتك القيمة دى
بس معلش زياده فى الاستفسار ,, ايه لازمه تركيب جهازين انذار,, يعنى لو جهاز زى spy 2 way يبقى كافى
و كمان ازاى تفصل طرمبة البنزين مع الانذار ؟
و ال gps tracker أيه انواعه الموجوده و اسعارها و ميزات الجهاز ايه؟
و اخر نقطه دى انا مش فاهم ايه قصدك
ولو حد عنده ليناكت مواضيع قديمة نستفيد بيها لانى ملقيتش غير الينكين بتوع عرض جهاز انذار spy 2 way

[Ahmender]

قفل على الدركسيون بيخلى الحرامي يستصعب الموضوع .. بيبقى عاوز عربية سهله.
تفصل طلمبة البنزين بزرار يكون مكانه مفتكس ومش معتاد.. فى الشنطة.. تحت الفرش.. تحت كرسي.
ممكن تفصل الكهربا بزرار فى مكان مفتكس برضو (لو مفيش انزار).