ريو 2014 .. حادثة

[Ahmed.Essam]

السلام عليكم ورحمة الله ..

قبل اي كلام اسأل الله ان يحفظنا جميعا من شر الطريق ومن تهور عباده ..

انا هحكي تجربتي مع حادثة وانا اول مرة اتحط في موقف زي ده وربنا يجعله اخر مرة وما يكتبه على حد ابدا لانه احساس صعب ..

اولا انا مش من القاهرة .. انا من المنصورة وكنت في القاهرة لمصلحة شخصية وبالمناسبة انا شاب عندي 23 سنة

انا يا حضرات معايا ريو 2014 وبتعامل معاها بحسوكة محبش اسيبها متوسخة انا اسف في الكلمة ولا بهينها في مطبات وخلافه
ويوميا بشوف نظرات من عيون بعض الناس مليانة شر ربنا يحفظكم من امثالهم ومش بس نظرات لا ده كمان كلام
على سبيل المثال ( باشا عربيتك مفيهاش خدش ) ده بيحصل معايا شبه يوميا .. وده طبعا مخليني متأكد مية في المية ان الحادثة اللي حصلتلي بسبب عين واحد ربنا يسامحه بعد قضاء ربنا

المهم احكيلكم الحادثة اللي فعلا غريبة
اول حاجة كده اتخبطت وهي راكنة او بمعنى ادق وانا بركن
في مدينة نصر قدام مول سيتي سنتر بالظبط من 14 يوم تقريبا
الشارع كان فاضي
وولد عنده 18 سنة طااااااااااااااير بسبيرانزا 516
بيسابق مع واحد صاحبه ( على حسب كلام اتنين شافوا الحادثة وعرفوني )

انا مش هقول العربية حصلها ايه
شوفوا الصور









وطلبت ونش شال العربية للتوكيل في العبور
ودي ورقة بقطع الغيار المطلوبة واسعارها من المهندس حسن من التوكيل


ووالد الكابتن اللي خبطلي العربية الصراحة راجل محترم ومشكور على موقفه انه قالي هدفعلك فلوس التصليح اللي هي 27 الف !
دفع مقدم تحت الحساب يومها ولسه الباقي ان شاءالله
انا مش هتكلم على تهور الــ ... اللي خبطلي العربية اكيد كل واحد عارف ده يتقال عنه ايه .. انا عملتله محضر اثبات حالة
بس كل اللي هقوله انه لاقي اللي يدفعله فمش هامه حاجة
بس لو جت في روح بني ادم والده مش هيعرف يعمله حاجة
خصوصا ان في بنت كانت هتروح في الحادثة دي على حسب كلام ناس بردو شافوا الحادثة .. ربنا ستر الحمدلله

والصراحة رغم اللخبطة اللي كنت فيها لكن عجبني موقف الناس معايا انهم ع الاقل واسوني بكلمة .. المصريين لسه فيهم خير
وبالمناسبة يا جماعة لما حد يشوف عربية حلوة حتى لو قديمة قول ما شاء الله مش هتخسر حاجة دي كلمة جميلة وهتخليك تحس بالامل انك ممكن يبقى عندك زيها .. ربنا كبير وكريم وممكن يرزقك في اي لحظة باللي احسن من اللي انت شايفه

شكرا واسف اني طولت وقدر الله وما شاء فعل

[memo_p910]

الحمد لله
قدر الله وما شاء فعل
أنا والدي توفي نتيجة اتنين بيتسابقوا في طريق داخل البلد بكل رعونه واستهتار ولغاية دلوقت بعد 3 سنين محدش فيهم اتحاسب
ربنا يرحمه

[Ahmed.Essam]

الحمد لله
قدر الله وما شاء فعل
أنا والدي توفي نتيجة اتنين بيتسابقوا في طريق داخل البلد بكل رعونه واستهتار ولغاية دلوقت بعد 3 سنين محدش فيهم اتحاسب
ربنا يرحمه

مصيبة حضرتك اكبر كتير من مصيبتي دي قدر الله وما شاء فعل
الله يرحمه ويدخل فسيح جناته يارب
وهو ده اللي بقوله لو في العربية تتعوض لكن في الروح دي تمنها غالي اوي خصوصا لو باستهتار شوية عيال .. ربنا يسترها علينا ويهدينا

[ahmedelrayan]

قدر الله وما شاء فعل والحمد لله انا عارف الاحساس اللى حضرتك كنت فيه خاصة انى زيك بخاف على العربية ومهتم بيها جدا

[MR A7MED]

قدر الله وما شاء فعل
والحمدلله انك بخير

[Ahmed.Essam]

قدر الله وما شاء فعل والحمد لله انا عارف الاحساس اللى حضرتك كنت فيه خاصة انى زيك بخاف على العربية ومهتم بيها جدا

الحمدلله
وربنا يحفظهالك يارب ويبعد عنك عيون و كلام الناس اللي حضرتك عارفه عشان كتر اوي وبقا بيتقال عيني عينك وبكل بجاحة

[Ahmed.Essam]

قدر الله وما شاء فعل
والحمدلله انك بخير

الحمدلله الف مرة

[aymanshebl]

والله الواحد مش عارف يقول ايه انت ملكش زنب و ربنا يعوض عليك و الحمد لله على كده و العين ديه للاسف الشديد نتيجة ان الناس فاضية و مورهاش حاجة غير النظر الى الاخرين و رضو بالتواكل على الله و عاملين زى تنابلت السلطان بره الناس مش فاضية تبوص على بعض زينا للاسف

[Ahmed.Essam]

والله الواحد مش عارف يقول ايه انت ملكش زنب و ربنا يعوض عليك و الحمد لله على كده و العين ديه للاسف الشديد نتيجة ان الناس فاضية و مورهاش حاجة غير النظر الى الاخرين و رضو بالتواكل على الله و عاملين زى تنابلت السلطان بره الناس مش فاضية تبوص على بعض زينا للاسف

والله فعلا العين ده بقت ملازمة كل واحد ماشي في الشارع بعربية ولا حتى من غير ولازم هيلاقوا اللي يبصولك فيه ان كانت عربية ولا لبس محترم ولا حتى وظيفة كويسة ربنا رزقك بيها
الحمدلله ,, وربنا يحفظنا من شرور الناس دي

[ARKOON]

حمدلله على سلامتك يا احمد باشا وربنا يكفينا شر العين .
الجنط ازاي بقى كدا بحاول افهم الحادثة جت ازاي يعني وانتا بتركن ودا بيتسابق في منطقة للباركينج ولا ايه نظامه !!!

[Ahmed.Essam]

الله يسلمك يا باشا تسلملي
حضرتك النجم ده كان ماشي مش اقل من 100 كيلو والله اعلم ..

انا كنت بركن لسه ولقيت العربية حصل فيها كده ملمحتوش من اساسه ومعرفش كان في دماغ سيادته ايه حب يعمل غرزه ولا ايه نظامه وده كان في شارع مكرم عبيد قدام مول سيتي سنتر قبل ما يدخل على طريق النصر على طول يعني اصلا لازم يهدي عشان يعرف يكسر ويدخل الشارع بس تقريبا فاكر نفسه راكب بورش هياخد يمين هتيجي معاه

[Abo.Moazz]

أيه ده ؟؟ بسم الله ماشاء الله الإكصدام مفيهوش ولا خدشة
متزعلش أنا بس حبيت أضحكك وأخليك تفك شوية

بس مش عارف أقولك ايه والله .. أنا دمى محروقلك
بس برده إحمد ربنا إنها جت على أد كده .. وإحمد ربنا بردو إنك عرفت اللى عملها واللى رضى يصلح ما أتلفه
ده أحسن ماتنزل من البيت وتلاقيها مخبوطة ومتعرفش مين اللى خبطها
قضاء أخف من قضاء
بس هوه حضرتك مش مأمن عليها ؟؟؟

[Ahmed.Essam]

أيه ده ؟؟ بسم الله ماشاء الله الإكصدام مفيهوش ولا خدشة
متزعلش أنا بس حبيت أضحكك وأخليك تفك شوية

بس مش عارف أقولك ايه والله .. أنا دمى محروقلك
بس برده إحمد ربنا إنها جت على أد كده .. وإحمد ربنا بردو إنك عرفت اللى عملها واللى رضى يصلح ما أتلفه
ده أحسن ماتنزل من البيت وتلاقيها مخبوطة ومتعرفش مين اللى خبطها
قضاء أخف من قضاء
بس هوه حضرتك مش مأمن عليها ؟؟؟

ههههه يا باشا براحتك

والحمدلله والله انا قولت نفس كلام حضرتك وبحمد ربنا انها جت على أد كده احسن ما كانت تيجي في حد
وللاسف مش مأمن عليها

[دكتور خالد]

قدر الله وما شاء فعل و ربنا ستر على قد كده - بس قطع الغيار غالية قوى يعنى القنطرة الخلفية ب 3830 جنيه - هيه دى اسعار التوكيل ؟

[Mohab555]

الحمد لله
قدر الله وما شاء فعل يا حماده
انا برده لسه عامل حادثة من 4 ايام فى التجمع .. الحمد لله