رينو لوجان vs كيا سيراتو ٢٠١٥

[wael30003]

حبيت اعمل مقارنة بين سيارتين ممكن نقول مش نفس الفئة بس فى بعض المميزات تفوقت فيها اللوجان ...وسبب المقارنة انى كنت مالك للوجان٢٠١٢ سنتين ونصف عملت فيهم ٤٠٠٠٠كم واشتريتها زيرو
وكذلك السيراتو ٢٠١٥ عملت ١٥٠٠٠وبرده مستلمها زيرو
المقارنة على شكل نقاط غير مرتبة لانى هاكتب اللى بفتكره واللى شايفة فروقات جوهرية بالنسبة لى
المقارنة بين اول فئة كيا واعلى فئة لوجان ....طبعا مش منطقية ولكنها لنقل الخبرة فقط ليستفيد الكل خاصة انى مش حاسس بفرق يذكر بين الفئتين
١- الصالون ...اهم عنصر بالنسبة لى لانه هو اساس راحة الراكب او السائق ..وهو اول حاجة بادور عليها فى السيارة
وسع الصالون تقريبا متساويين فى الوسع
اللوجان : لكن فى الراحة اللوجان تتفوق ....

الكيا : غير مريحة السبب ان كرسى السائق او الراكب الامامى او الكنبة الخلفية غطسان لتحت ....كل اما اخرج كأنى باخرج من حفرة .....عكس اللوجان الكرسى عالى مستو مريح فى النزول بدون مقاومه

٢- التكييف : تانى اهم حاجة فى العربية بتهمنى
تقريبا متساويين لكن فى ملاحظات

اللوجان : توزيع اتجاه التكييف باقدر اوجهه على وجهى بالضبط
كيا : اتجاه الفتحة اليمين ما بتكونش على الوجه ومش قويه واليمين بتكون على الوجه بس مش بنسبة ١٠٠٪....فتحات التهوية مش فعالة قوى

٣- قوة الموتور
مفيش وجه مقارنة وده لعدة اسباب اللوجان يدوى الكيا اوتوماتيك اللوجان ٨صباب ٩٠حصان الكيا ١٦صباب ٢كامه ١٣٠حصان لكن هعلق على الناتج العام فى القيادة
اللوجان :سحبها معقول مقارنة بعدد الاحصنة ولكن غير مرضى بالنسبة لى خاصة لو هاطلع او اعمل غرزة ...باوصل بيها ل ١٧٠كم /ساعة بصعوبة ...الاتزان متوسط او اقل
الكيا :طبعا فى السحب افضل من اللوجان وخاصة لما تكون واقف فى اشارة وتدوس بسرعة تسمع صرير العجل تحس ان موتورك قوى
عيبها لو حبيت تعمل غرزة عشان تعدى عربية احيانا مش بتساعدك ...الاوتوماتك بتاخد وقت شوية بس لو مانويل اعتقد هتفرق كتييييير
السرعة فى ال٧٠٠٠كم وصلت بيها ٢١٥كم /ساعة
ومن يومين عند١٥٠٠٠كم عملت كيك دون وصلت ١٩٩كم /ساعة ومش عارف ايه السبب هل رشاشات او ضبط زوايا او كهرباء .....الله اعلم
فى المجمل السحب احسن ومعدل التسارع افضل وده طبعا بذكره عشان بقارن بين مانويل واوتوماتيك
٣-الشنطة
اللوجان ٥٢٠لتر
الكيا ٤٨٥لتر
مش محتاجة تعليق
٤-مستوى الرؤيا وتحديد الابعاد
اللوجان : غير واضحة امامى وخلفى
الكيا :غير واضحة امامى وخلفى
٥- المرايا
اللوجان :كهرباء
الكيا :كهرباء
٦-الراحة فى القيادة
اللوجان :فى المسافات الطويلة بكون مستريح جدا لكن فى الزحام بتعب عشان الغيارات
الكيا :فى الزحام بكون مستريح عشان الاوتوماتك لكن فى المسافات الطويلة بتعب بسبب وضعية الكرسى الغطسان لتحت .
٧-الزجاج
الكيا :الاربع ابواب كهرباءاماكن الازرار فى الباب مريحة
اللوجان : الاربع ابواب كهرباء اماكن الازرار غير مريحة لكن مع التعود مش بتحس بالفرق
٨- لوك الابواب
الكيا : فيه عيب ان لما احب افتح الابواب بالليل النور الخاص بالزرار مش موضح رسمة الفتح
اللوجان :النور موضح القفل والفتح
٩-فتح الشنطة
الكيا :من الداخل او مفتاح من الخارج
اللوجان :لوك الابواب مشترك مع لوك الشنطة بمجرد ما تفتح الابواب ممكن تفتح الشنطة من الخارج بالضغط على القفل الخارجى الموجود على الشنطة ....مفيش مفتاح من الداخل للشنطة ...يعتبر اللوك هو المفتاح والقفل فى نفس الوقت
١٠-تنك البنزين
اللوجان : لازم تفتح بمفتاح السيارة عامل امان عشان ما تكونش السيارة دايرة
الكيا :تفتح من الداخل
١١-كمبيوتر الرحلات هوضح الاختلافات فقط
اللوجان :يوضح كمية البنزين المستهلكه ومتوسط الاستهلاك للرحلة
الكيا :يوضح الوقت المستهلك للرحلة
ويتساويان فى باقى المعلومات لكمبيوتر الرحلة
١٢-الكلاكس
اللوجان :جانبى فى الذراع فيه صعوبة فى الاول لكن مع التعود لا تجد صعوبة
الكيا : فى عجلة القيادة
١٣- الاطارات
اللوجان :١٥
الكيا :١٥
١٤-استهلاك البنزين
الكيا :٨.٦لتر /١٠٠كم مع وضع فى الحسبان تركها مدة تتراوح بين نصف ساعة وساعة واحيانا اكتر اثناء الانتظار لان الجو هنا حار جدا السعودية
اللوجان : انا كنت بشغل التكيبف ٣٦٥يوم فى السنة فى مصر وكنت بصفر العداد كل تفويلة وكانت بتعطى متوسط ٨ الى ٨.٤لتر /١٠٠كم
تقريبا متساويين او تتفوق الكيا لو خصمنا ساعات انتظار السيارة اثناء تشغيل التكييف
١٥-الكاسيت
اللوجان :ممكن فصل السماعات الخلفية عن الامامية او ايقاف الامامية وترك الخلفية والصوت جيد
الكيا :لا يمكن فصل السماعات وده عيب بالنسبة لى
١٦-ارتفاع السيارة
اللوجان :١٥سم وهى ميزة تحسب للوجان
الكيا :اقل فى الارتفاع مش فاكر كام بالضبط
١٧-الثبات
الكيا : اكثر ثبات خاصة مع السرعات العالية
اللوجان : ثبات معقول مقارنة بارتفاع السيارة
١٨-السرعة
اللوجان : عند الوصول لسرعة ١٢٠كم بحس ان العربية بتبذل مجهود
الكيا :شكة دبوس
١٩- صوت الموتور
اللوجان :صوت عالى نسبيا غير مزعج
الكيا : اقل من اللوجان
٢٠- البنزين :
اللوجان ٩٢
الكيا ٩٢
٢١-احساس الركاب بالراحة
اللوجان :احساس بالراحة والرضا وسعة الصالون وايضا للسائق نفس الاحساس
الكيا :غير مرضى
٢٢- مستوى الاضاءة :
اللوجان : معقول لكن غير مرضى
الكيا : افضل من اللوجان لكن غير مرضى
٢٣-بلوتوث يمكن الاتصال من خلاله
اللوجان :غير موجود ....لكن نزل السنة اللى بعدها
الكيا :موجود
٢٤-اللوك
الكيا :اللوك يقفل الابواب اتوماتك عند الوصول الى ٢٠كم
اللوجان : غير موجود
٢٥-فتح زجاج السائق
الكيا:يفتح من لمسه واحدة
اللوجان : يفتح بالضغط المستمر
٢٦-الشكل الخارجى
اللوجان :شكلها مرضى بالنسبة لى ولكنها فى الاخر اذواق
الكيا :شكلها اشيك وانسيابى
٢٧-مشاكل مستمرة
اللوجان : لم تقابلنى مشاكل تذكر ٤٠٠٠٠كم سنتين ونصف
الكيا :لم تقابلنى مشاكل سوى فى رائحة فى التكييف عند التشغيل اول مرة كل يوم ......ودى حاجة سيئة جدا ١٥٦٠٠كم خلال خمسةشهور
٢٨-الفوانيس الخلفية
اللوجان : شكلها عادى
الكيا :تحفة
٢٩- اضاءة الصالون
اللوجان غير مرضية
الكيا غير مرضية
٣٠-النعومة
اللوجان : العفشة ناشفة نسبيا ولكنها مرضية
الكيا :ناعمة ومرضية ولكن مش بشكل مطلق
٣١-المراة الوسطى للصالون
اللوجان : ثابتة وجيدة
الكيا :كل شوية تقع وتتخلع ...حاجة هم
٣٢-الاوتوماتيك للكيا
يمكن ان تعمل تتحول من الاوتوماتك الى اليدوى
ولكن السرعة القصوى على الاوتوماتك اعلى اليدوى
٣٣- ريموت سنتر لوك
اللوجان يوجد
السيراتو لا يوجد
٣٤-تنك البنزين
اللوجان ٥٠لتر
كيا ٤٥لتر

الاحساس العام ....اللوجان مريحة فى الركوب اكثر من الكيا والسبب هو وضعية كراسى وكنبة الصالون ......طبعا البعض هيستغرب ....لكن ده رأيى وعن تجربة ....
لو افتكرت حاجة تانية هاضيفها فى المشاركات القادمة ....
واؤكد ان السيارتين ليسا نفس الفئة ....ولكن المقارنة للافادة ....وشكرا

[Omar_4ever]

اختلف معاك في نقطة

وهي وسع الصالون

وسع الكيا لا يقارن باللوجان، وبالنسبة للكراسي الواطية ديه فعلا وكمان بتضايق كبار السن، بس على فكرة كل البي ام دبليو كده

كراسي اللوجان وزاوية ظهر الكنبة الخلفية غير مريحة ابدا

[borio1704]

مع احترامي لوجهة نظر حضرتك....

بس انا مش شايف أي وجه للمقارنة من أساسه

اللوجان من فئة أصغر من السيراتو.. والسيراتو أصلا أوسع سيارة في فئتها هي والإيلانترا.
اللوجان أرخص من السيراتو بكتير..
فرق التكنولوجيا كبير بين الاتنين
فرق المواتير كبير..
فرق الاعتمادية كمان كبير..

فرق كل حاجة كبير يا صديقي..فلا وجه للمقارنة.

[wael30003]

مع احترامي لوجهة نظر حضرتك....

بس انا مش شايف أي وجه للمقارنة من أساسه

اللوجان من فئة أصغر من السيراتو.. والسيراتو أصلا أوسع سيارة في فئتها هي والإيلانترا.
اللوجان أرخص من السيراتو بكتير..
فرق التكنولوجيا كبير بين الاتنين
فرق المواتير كبير..
فرق الاعتمادية كمان كبير..

فرق كل حاجة كبير يا صديقي..فلا وجه للمقارنة.

انا كررت اختلاف فئة كل سيارة وسعر كل سيارة واكدت على هذه النقطة بس حبيت انقل تجربتى واحساسى ....انا عايز اقولك انى مش حاسس غير بفرقين اتنين كمستهلك قوة موتور الكيا ....وراحتى اثناء ركوب اللوجان والراكبين معايا .....دول اكتر حاجتين حاسسهم كل يوم بركب فيه السيراتو .....مع اعترافى ان السيراتو عربية تكنولوجيا اعلى من اللوجان ....فى الاخر انا كمستهلك ما يهمنى هو الاستفادة من السلعة المشتراه

[mr_green]

أخى الفاضل ذى ما إنت قولت هى أذواق و آراء

إسمحلى أقول أنا كمان رأيى عن تجربة مش كلام

أنا ركبت اللوجان فتره مش كبيره ذيك بس ركبتها و موضوع الكراسى العالية ده كان خانقنى منها جدا

هو بيدى وسع بس وسع رأسى و ليس أفقى يعنى بيغير زاوية ضهرك و بالتالى المساحة بتوسع لرجلك

لكن ده بيتعب الضهر و الجسم فى المسافات بيخليك مش مأنتخ كده و غطسان فى الكرسى يعنى يديك إحساس إنك منتصب و ده مرهق

بعكس وسع السيراتو ما شاء الله بحس إن الصالون أنتخه أنتخه

فيه حاجات تانيه كثير مفيش مجال للمقارنه فيها ذى الفخامة مثلا و الفئة أنا بس حبيت أعلق على الوسع و عن تجربه

يمكن اللوجان أريح فى الدخول والخروج لكبار السن و لثقال الوزن مش أكثر

و على فكره تكييف اللوجان مقارنة بالسيراتو على قده قوى بالذات فى الزحمة

[volociximab]

السيراتو تتقارن بالفلوينس

[wael30003]

السيراتو تتقارن بالفلوينس

فعلا انا معاك
فئة السيراتو ....الكورولا ....الفلوينس ....الالينترا .....الشيفروليه كروز ....

بس يمكن انا قارنت بين سيارتين مختلفتين تماما عشان تجربة شخصية انا عايشها .....انا خدت طريق الرياض ....جدة حوالى ٩٥٠كم ....وتانى يوم ...رحت جدة مكة رايح جاى ٢٣٠كم وتالت يوم جدة مكة رايح جاى ٢٣٠كم ...وبعدها بيوم رحت المدينة وقعدت ٢٤ساعة ورجعت جدة ٩٠٠كم .....بدأت احس بتعب فى اسفل ظهرى ...طبعا كنت بريح فى الطريق وانام كمان ....يمكن ده سبب المقارنة بسبب عدم الراحة فى الصالون ..بالرغم من فارق السعر الكبير بين السيارتين .....

[salamoni]

السيراتو تتقارن بالفلوينس

المقارنة غير عادلة ... تحياتى

[wael30003]

المقارنة غير عادلة ... تحياتى

انت كده رميت قنبلة ومشيت....... تحياتى

[ashouhdy]

حيقتلوك :) هههههههههه

[Alaa hussein]

اعتقد انه كان من الافضل ان تكون المقارنة مع اللوجان الاوتوماتيك للاتي :
الموتور الاوتوماتيك 1600 cc -
2 كامة - 16 صباب - 110 حصان
السحب ممتاز جدا
الثبات حتي 160 جيد جدا
التكييف ثلاجة
مثبت سرعة
محدد سرعة
بلوتوث
طارة مالتي فانكشن
الاوبشن اعلي من اي فئة اخري

[wael30003]

اعتقد انه كان من الافضل ان تكون المقارنة مع اللوجان الاوتوماتيك للاتي :
الموتور الاوتوماتيك 1600 cc -
2 كامة - 16 صباب - 110 حصان
السحب ممتاز جدا
الثبات حتي 160 جيد جدا
التكييف ثلاجة
مثبت سرعة
محدد سرعة
بلوتوث
طارة مالتي فانكشن
الاوبشن اعلي من اي فئة اخري

لو فى حد بن حلال اشترى وجرب يقارن ....ويقول لنا الفرق

[Dr. Assem]

احمدوا ربنا بقى اني رحمتكم من المقارنة بين فيرنا 2007 مانوال و فلوانس 2015 e3

كان زماني اترشقت بالبيض و الطماطم