على ملاك و مستخدمى السيراتو تقييمها من ناحية الثبات و الامكنيات و الاتساع

[mohamedhamam]

مضى عام كامل على بدء توزيع سيارات الكيا بواسطة التوكيل الجديد و بعد استقرار توزيع الكيا بمصر بعد المشاكل التى كانت موجودة ، هذا الموضوع مخصص لتحليل اداء السيارة السيراتو من حيث الاداء كسيارة و التسارع و الثبات و الاتساع و الامكنيات او الكماليات الموجودة بالسيارة و ادق من يقيمون كل هذا هم ملاك و مستخدمى السيراتو لذلك نبدأ حلقة نقاش بخصوص هذا الموضوع بيننا نحن أعضاء المنتدى و كل عام و جميعكم بخير

[princemady]

يسرنى أستاذ محمد أكون أول الردود
مبدئياً عربيتى مانيوال LX موديل 2008 سوداء اللون عملت بيها حوالى 3000كم لحد دلوقتى
بالنسبة لتقييمى للعربية من واقع التجربة كالآتى :
الثبات رائع وشديد التميز .. كنت ماشى بيها على طريق مصر اسكندرية 150-160 طول الطريق والعربية بسم الله ما شاء الله فارشة على الطريق ولا حاسس بالسرعة خالص ووصلت بعض الوقت لحد 175 بس رجعت تانى لل160 مش لأنها قلقتنى ولكن أنا حسيت إن كده زيادة أوى .. كل ده والعربية راكزة أثناء تفادى السيارات والمطبات دون الشعور بأى قلق
الاتساع الداخلى ماشفتش اتساع كده فى فئتها .. أنا راجل طولى 190 سم ومرجع الكرسى لحد ما أخدت راحتى ومع ذلك اللى بيقعد ورايا بيقعد مستريح جداً .. أنا نفسى نزلت وقعدت فى الكنبة ورا الكرسى بتاعى لقيت نفسى مستريح جداً
التسارع كويس بس لو السرعة بطئت منك أوى محتاج تنزل نقلة عشان التجميع يكون أسرع .. بدون تنزيل النقلة التسارع على الغيار العالى والسرعة الواطية بيكون بطىء شوية
العفشة ناعمة وحنينة على الركاب .. ماتشعركش بهبد المطبات اللى شوارعنا مليانة بيها
استهلاك البنزين داخل اسكندرية وتقريباً بدون تشغيل التكييف 211 كم فى الصفيحة وعلى الطرق السريعة مع بعض السير داخل المدينة مع تشغيل التكييف على أقل درجة 315كم فى الصفيحة
الكماليات أنا شايفها مش بطالة باستثناء عدم وجود المرايات الكهربا .. بس سمعت من زميلنا براكوته إنهم نزلوا من المانيوال للسنة الجاية موديل EX مزود بمرايات كهربا وأغلى 2000جنيه من ال LX
الألوان المتاحة تقليدية جداً للأسف وده اللى خلانى أجيب الإسود وطالع عينى معاه بسبب شقاوة العيال فى الشارع والخرابيش اللى كل يوم أكتشف واحد جديد وهى مركونة
ده تقرير مبدئى وآسف للإطالة وأتمنى ربنا يوفقك لو ناوى تشتريها

[mohamedhamam]

بالعكس انت لم تطول بل اعطيتنا معلومات قيمة و ثرية للغاية من مستخدم حقيقى للسيراتو و عن تجربة عملية و ليس عن طريق السمع و لهذا السبب اتمنى من اعضاء المنتدى من سوف يشتركون معنا فى هذا الموضوع ان يكون من ملاك السيراتو لكى يثرى اعضاء المنتدى مثلك تماماً ، و لكن انا لى استفسار انا ارى ان سيارة مثل السيراتو يجب ان تنزل بمرايات كهرباء و ايضاً انا فوجئت بأن كل فئات السيراتو نازلة بدون ستوب لايت بالرغم من اهميته الشديدة فهل ذلك حقيقى أم غير صحيح و اشكرك مرة أخرى على المعلومات القيمة

[princemady]

بالطبع محمد باشا عيب أوى إن سيارة بإمكانيات وسعر السيراتو تنزل من غير مرايات كهربا .. أما بالنسبة للستوب لايت هى مش متركبه عندى فى ال LX واللى اعرفه إن العربية الخليجى بتنزل بستوب لايت والتوكيل فى مصرهو اللى بيشيلها .. يمكن عشان يقلل الجمارك
نسيت أقولك إن العزل فى السيراتو ممتاز مجرد إنك قافل الزجاج بتحس كأنك فى دنيا تانية منعزل تماماً عن العالم الخارجى ويا سلام لو مشغل الإم بى ثرى على درجة صوت 15 .. بجد بتكون فى دنيا غير الدنيا .. وبالتوفيق يا باشا إن شاء الله