ممكن سؤال لخبراء الكيا

[hythem82]

كيا برايد سيدان مصري أو كوري مش إيراني, أخر موديل نزل منها كانت سنة كام وإيه ظروفه (بيه عيوب ولا إيه) وكان نازل فيه كماليات إيه ومانيوال بس ولا مانيول وأوتوماتيك, وسعره لما نزل وقتها كان كام وسعره مستعمل الأن كام (بإفتراض أن حالة السياره جيده)
شكرا لمن إهتم وأجاب وشكرا لمن لم يستطع الإجابه

[max_ziro]

ولله اعرف عنها انها روعة متورها شدة حلو ز بتشم بنزين قطع غيارها زى ال 128 بس الله اعلم عفشتها ضعيفة شوية بس من الاخر روعن بكل المقاييس صغيرة و شديدة ..

[ahmed_wbt]

اخر موديل نزل من الكورى كان 99 ودى كانت 1100 كاربراتير

بعد كدا بقا موجود بس الايرانى ال 1300 انجكشن

سعرها دلوقتى بيتراوح بين 25 ل 30 على حسب اخر معلوماتى بس طبعا سوق المستعمل حاليا مش مستقر خالص ولازم تنزل تشوف بنفسك

كانت فاضيه خالص من الكماليات وكان فى الفول اوبشن تكييف وباور وسنتر وزجاج كهرباء بس ( عن نفسى مشوفتش الفول اوبشن دى خالص بس بس اللى اعرفه انها فعلا موجوده بس نادره )

العربيه حماله أسيه وبتاعت بهدله الصراحه وموفره فى البنزين وخصوصا لو جبت الانجكشن منها علشان الكربراتير مقرف

الصالون واسع والقعده فيها مريحه واى حد بيشتغل فيها وقطع غيارها رخيصه جدا ومتوفره

العربيه بتجرى وكنت بجيب بيها 160 عادى صحيح من بعد ال 100 بتحس انك بتجرى جامد ومتعرفش تناور بيها علشان هى خفيفه موت انما لو ليك فى الجرى مش هتقولك لا

عيبها بقا انها عايزه تكون ايدك فيها دايما ومتسكتش على اى حاجه تلاقيها مش مظبوطه علشان العربيه دى لما بتفتح بوقها مبتشبعش فلوس وخصوصا لما تجيبها مستعمله لازم تقعد فى الاول فتره تشيك على كل حاجه فيها كويس وتتاكد انها سليمه

العفشه ضعيفه نوعا ما ومش عايزه ترزيع كتير فى المطبات

كذلك حذارى وانت بتشتريها لو لقيت راكب فيها انذار اتأكد الاول ان كل الوصلات سليمه والعربيه مفيهاش اى تهييس فى الكهرباء علشان مشاكل الكهرباء فيها لو موجوده هتتعبك

ربنا يوفقك للخير وخد وقتك وانت بتشتريها علشان فعلا لو جبتها تمام مش هتندم ابدا انك ركبتها

[ramyfawzy]

الكيا برايد السيدان
تقفيل مصري
تبدأ من موديل 1998 لحد موديل 2002
1300 سي سي
مانيوال و اتوماتيك

كماليات المانيوال:
تكييف + زجاج كهربائي امامي + سنتر لوك + كاسيت
ويوجد بعض الموديلات من المانيوال غير مكيفة

كماليات الاتوماتيك:
تكييف + باور + زجاج كهربائي امامي + سنتر لوك + كاسيت + سبويلر على الشنطة

عيوبها الشائعة : الكبالن + بلي العجل + التقفيل المصري العظيم

سعرها حاليا:من 30 الف لحد 38 الف (على حسب الحالة والموديل)

تحياتي ،،،،،

[moataz200730]

طيب يا ريت يا جماعة حد يقولى رايه فى السايبا البرايد الايرانى هل كويسة و لا لا خاصة ان دى اول عربية ليا و معنديش استعداد اغير بعد كدة و استعمالى حيكون شديد و العربية دى هى المتاحة بالنسبة للمبلغ اللى معايا و يا ريت اعرف مين افضل دى و لا لادا 2107 من حيث كل حاجة و مستنى الرد ضرورى